ka Filistia sapashinnim’ daa bɔhi, “Bɔ ka Hiburunim’ ŋɔ mi lee bɔri kpe?” Ka Akishi daa garigi yɛli Filistia sapashinnim’ maa, “Dauda ŋun nyɛ Izraɛl Naa Sool sapashin’ la m-bala, o be n sani paai yuma shɛm. O mi ni daa zo n-kuli n sanna saha shɛli hal ni zuŋɔ, n na bi nya o galimi.”
Amaa ka Filistia sapashinnim’ maa daa je suli niŋ Akishi ka yɛl’ o, “Chɛ ka o lab’ kuli ti be a ni zaŋ tiŋ’ shɛli ti o la ni, o ku dol’ ti chaŋ tɔb’ ni, di pa shɛli ka o ti leei ti dima nimaani. Dama wula ka o yɛn niŋ ka o naa maa lan deeg’ o, ka di pala o ŋmala ti niriba ŋɔ zuɣuri ti o.
Di saha ka Akishi daa boli Dauda ti yɛl’ o, “Hal ka Yawɛ ŋun be ŋɔ zuɣu, a nyɛla ŋun ʒe ma yim, ka man’ sani, di simdi ni a pahi dol’ ti chaŋ tɔb’ maa ni, dama dahin’ shɛli a ni kuli n sanna hal ni zuŋɔ, n na bi nya a galimi. Amaa di zaa yoli, nanim’ maa bi saɣi ni a dol’ ti chaŋ.
Amaa ka Dauda daa bɔh’ o, “Taal’ bɔ ka n lee tum? Dahin shɛli man’ ŋun nyɛ a dabili ŋɔ ni kana ti kpe a tuma ni hal ni zuŋɔ, tuun’ bɔ ka n lee tum ka di bi tiɣ’ a nini, ka di zuɣu chɛ ka n ku tooi doli chaŋ ti tuhi n-dan’ naa dimnima?”
Ka Akishi daa garigi yɛli Dauda, “M mi ni a ka galimi shɛli kaman Naawuni malaika ni ka galimi shɛm la, amaa di zaa yoli, Filistia sapashinnim’ maa yɛliya ni a di dol’ ti chaŋ tɔb’ maa ni.