Kanị ndị ndu-agha Filistia hụ nọ wemẹni Akishi iwe, sị a, “Sị okẹnnyẹni kin azụụn, n'ọ lakin ebe hụn i ye ẹ. O sọnjẹnkọ ẹnyi agha, amamgbe o ru imẹ agha maye ẹnyi ọgụn. Kị ya lẹ di-nwọnn'ẹ Sọlụ k'e gi nwan sụọkin hụn k'a karị igbuni di-nwọnn'ẹ ndị-agha ẹnyi, we isi wẹ jẹnn'ẹ?
Ya Akishi nọ kpọ Defidi, sị a, “Ma Osolobuẹ, y'e mẹkẹmẹkẹ onyẹ wẹ gi e dọn ẹnya, nkẹ ọ sụọ m nị mmẹ lẹ yụ a wị e jẹn agha. Makẹni a hụntuni m eje-ihiẹn ẹka ị gha ụhụọhịn ị bịa d'e kunrun m d'e ru kikẹnni; kanị, ẹlẹ ẹnya hụ kẹ ndị-ọkịkị ibe m gi e lee i.
Defidi nọ sị Akishi, “Kịnị kẹ m mẹ? Elee eje-ihiẹn kẹ i hụntu ẹka mmẹ wụ odibo i gha ụhụọhịn m bịa d'e kunrun i d'e ru kikẹnni? Kịnị k'a han m ejẹnlẹ d'a lụsọn ndị-iṅẹnrẹn yụ wụ eze nwọnni m agha?”