Samuwel pas berka' ka kennengnganna Eli, laju mator, “Ponapa, Pa', abdina me' edikane?” Saodda Eli, “Enja', sengko' ta' ngolok ba'na, kassa' la dhung-tedhung pole.” Daddi Samuwel pas abali ka katedhunganna.
PANGERAN adikane Samuwel pole, tape kana' jareya ta' tao ja' se ngolok jareya PANGERAN, sabab sabellunna jareya PANGERAN ta' tao abu-dhabu ka aba'na. Daddi Samuwel jaga pas entar ka Eli laju mator, “Badha ponapa, pa', abdina me' edikane?” Saodda Eli, “Enja', na', sengko' ta' ngolok ba'na; kassa' la dhung-tedhung pole.”
PANGERAN adikana Samuwel katellokaleyanna; Samuwel jaga, pas entar ka Eli laju mator, “Badha ponapa, Pa', abdina me' edikane?” Eli pas apangrasa ja' PANGERAN se adikane kana' jareya,
Dhabuna PANGERAN ka Samuwel, “Sengko' madhatengnga settong kadaddiyan se talebat nako'e ka bangsa Isra'il, sampe' sapa'a bai se ngedhing tanto pas bingong.
Bi' Sengko' Eli la ebalai ja' saessena bengkona bi' Sengko' eokoma salanjangnga sabab na'-ana' lake'na ya-nyeya Sengko'. Eli tao ja' na'-ana'na jareya ngalakone dusa jareya, tape bi' Eli epanneng bai.
Samuwel pas tedhung pole sampe' gi' laggu, saellana jaga pas mokka'e bang-labangnga Padalemman Socce. Aba'na ta' bangal abala ka Eli parkara se etangale'e malemmanna jareya.
Daddi bi' Samuwel kabbi ecareta'agi ka Eli; tadha' se ealengngagi. Dhabuna Eli, “Se adhabu jareya PANGERAN; dina apa se eanggep paleng becce' me' olle elampa'agi.”
Lantaran jareya ommat Isra'il sanagarana padha ngakone ja' Samuwel jareya nabbina PANGERAN. Mon Samuwel abu-dhabu, ommat Isra'il padha ngedhingngagi kabbi. PANGERAN terros ngaton e Silo, kennengnganna Salerana se ngaton ban abu-dhabu dha'-adha'na ka Samuwel jareya.