×

Ika Bible 2018

1 Samuẹlụ 4

1
Ozi Samuẹlụ rị e zini Osolobuẹ hụ e ru Izrẹlụ ile ẹhụ. Ndị Izrẹlụ jẹn d'a lụsọn ndị Filistia ọgụn. Ndị agha Izrẹlụ e weri ọnọdị agha imẹ Ebeniza, ndị-agha Filistia e weri ọnọdị imẹ Afẹki.
2
Ndị Filistia nọ dọn ndị-agha wẹ odidọn agha, maye ndị Izrẹlụ; a lụma wẹ, ndị Filistia nọ mẹri ndị Izrẹlụ, gbu ndị Izrẹlụ nnụ-iri ọgbọ-agha ebẹhụ.
3
Ogẹn ndị-agha Izrẹlụ gi kinhẹn ebe wẹ a nọdị, ndị-ichẹn Izrẹlụ nọ jụma enwẹn wẹ ajụjụ, a sị, “Kị haịn Osolobuẹ gi nị ndị Filistia mẹri ẹnyi? Nị ẹnyi d'e buhẹ ni Ẹkpẹti-nsọ Osolobuẹ rị Shilo, kẹn'o sọnjẹn ẹnyi, zụọpụha ẹnyi ẹka ndị iṅẹnrẹn ẹnyi.”
4
Wẹ nọ zi ikẹnnyẹ, wẹ nọ jẹn Shilo d'e buhẹ Ẹkpẹti-nsọ Osolobuẹ, Onyẹ hụ nwọn ikẹn ile, Onyẹ hụ ukpo ẹ rị ẹgbata mmọn-ozi ẹbụọ rị elu Ẹkpẹti hụ. Ụmụ Ẹlaị ẹbụọ hụ wụ Hof'ni lẹ Finẹhasị sọnhẹn Ẹkpẹti-nsọ Chuku.
5
Ogẹn Ẹkpẹti-nsọ Osolobuẹ gi ru ọgbọ ndị Izrẹlụ, ndị Izrẹlụ ile nọ yi okẹn oro hụn alị gi mẹhunmẹ.
6
Ogẹn ndị Filistia gi nụ ụzụn ahụn, wẹ nọ jụma, “Kị wụ oroni ile rị ọgbọ ndị Hibru?” Wẹ nọ chọpụha nị Ẹkpẹti-nsọ Osolobuẹ a banhangụọ ọgbọ ndị Izrẹlụ,
7
ya egun gha tụma ndị Filistia. Wẹ hụ a sị, “Mmọn ndịnị a bịalẹ ọgbọ, nsọngbu rọkwọ! Ihiẹn nọ ẹnịna emẹtuni.
8
Nke ẹnyi a gụ! Onyẹ sikọ d'a gbapụha ẹnyi ẹka okẹn-mmọn ndịnị? Uwẹ wụ mmọn ndị hụn gi eje-nsọngbu ile rị ichẹn-ichẹn sọn ndị Ijiptu imẹ atụ.
9
Ndị Filistia, ka nị ẹhụ! Mẹ ni kẹ ikẹnnyẹ — amakwọ mgbe ụnụ e họnrin igbọn ndị Hibru kẹ wẹ dọn wụ igbọn ụnụ. Mẹ ni kẹ ikẹnnyẹ; lụ nị ọgụn!”
10
Ya ndị Filistia nọ lụ ọgụn, mẹri ndị Izrẹlụ, onyẹ-agha Izrẹlụ ọwụlẹ nọ gbala iwe ẹ. E gbukẹ wẹ wẹ; madụ nnụ-uku iri-kwasị-ọgụn (30,000) kẹ wẹ gbu imẹ ndị Izrẹlụ gi ụkụ e jẹn agha.
11
Ndị Filistia e buru Ẹkpẹti-nsọ Chuku, gbuzikwọ ụmụ Ẹlaị ẹbụọ wụ Hof'ni lẹ Finẹhasị.
12
Ụhụọhịn ahụn, okẹnnyẹ ohu, onyẹ ebọn Bẹnjamini nọ gha ọgbọ-agha gbaha Shilo. Ọ dọkagụọ ẹkwa a, kpọn uzunzun ye isi.
13
Kẹ okẹnnyẹ hụ pụha, Ẹlaị nọdị alị ocho ẹ o bupụha mkpẹnrẹn ụzọ, e che, makẹni uhue Ẹkpẹti-nsọ Chuku hụ wẹ bushi agha rị e hue ẹ. Ogẹn okẹnnyẹ ahụn gi banhan imẹ obodo hụ, ku ihiẹn mẹni, obodo hụ ile nọ kwansusu.
14
Ẹlaị a nụ ụzụn ẹkwan hụ, ọ nọ jụma, “Kị wẹ rị a zụnnị ụzụnnị ile?” Okẹnnyẹ ahụn nọ ghafe, buru Ẹlaị ozigbo.
15
Ẹlaị nkẹ, hụn rị nwa ahụa ẹbụọ arịa ọgụn isẹn, arị eleghazị ụzọ.
16
Okẹnnyẹ hụ nọ sị Ẹlaị, “Ọnụ agha kẹ m ghahụ lala; tannị kẹ m ghahụ ebẹhụ gbaha.” Ẹlaị nọ sị a, “Kị rọ, nwa m?”
17
Okẹnnyẹ ahụn wẹhẹ ozi hụ nọ sị a, “Ndị Izrẹlụ a gbagụọnị ndị Filistia ọsọ, e gbuọlẹ wẹ ndị-agha Izrẹlụ bụ ọda. Ụmụ ị ẹbụọ wụ Hof'ni lẹ Finẹhasị rịzịkwọ ndị nwụnnị; ndị Filistia e burugụọ Ẹkpẹti-nsọ Chuku.”
18
Hụn o gihụ kpọ “Ẹkpẹti-nsọ Chuku” ẹfan, Ẹlaị nọ gha elu oche hụ ọ dịnọ ihun ọnụ-mgbọn danshi azụụn. Ọ nọ kpagi olu nwụnhụn, makẹni ọ kagụọ ẹgẹdi, kakpụkpọ. Ahụa ọgụnnaị k'o du ndị Izrẹlụ.
19
Nwunyẹ nwa a, nwunyẹ Finẹhasị, rị imẹ ogẹn ahụn; ọmụmụ e rumẹgụọ a. Ogẹn o gi nụ nị e burugụọ wẹ Ẹkpẹti-nsọ Chuku, nị nẹdi-di ẹ lẹ di ẹ a nwụnhụngụọ, imẹ nọ mẹmẹ ẹ, ọ nọ mụ, kanị isi ẹ a tọ a.
20
Ogẹn o gi rị a nwụnhụn, ikpoho rị e yen'ẹ ẹka nọ sị a, “Atụlẹ egun, y'a mụgụọ okẹnnyẹ!” Kanị ọ shịarịnị, o gọndẹni ntịn.
21
Ọ nọ gụn nwata hụ “Ikabodu”, hụn wụ, “Ọghọ a la!” Ihiẹn o gi gụn a ẹfannị wụnị e buru wẹ Ẹkpẹti-nsọ Chuku lẹni nẹdi di ẹ lẹ di ẹ a nwụnhụn.
22
Ọ sị, “Ọghọ Izrẹlụ a lagụọ — nị e bunarịn wẹ ndị Izrẹlụ Ẹkpẹti-nsọ Chuku.”
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes