×

Ika Bible 2018

1 Samuẹlụ 5

1
Ogẹn ndị Filistia gi bunarịngụ Izrẹlụ Ẹkpẹti-nsọ Chuku, wẹ nọ gha Ebeniza wẹ nọ lụ agha bu ẹ shi obodo wẹ ohu wụ Ash'dọdụ.
2
Wẹ nọ buban Ẹkpẹti hụ imẹ ụlọ mmọn wẹ wụ Dagọnụ, bu ẹ che ụsụọ Dagọnụ.
3
Eki e fọn, ogẹn ndị Ash'dọdụ gi tẹnhin ụz'ụtụntụn, e lee Dagọnụ, ọ dangụọ, we ihun kpumẹ alị ihun Ẹkpẹti Osolobuẹ! Ya wẹ nọ pashi ẹ elu, dọzị a ye ọnọdị a.
4
Kanị e tẹnhinzi wẹ hụn eki gizi fọn, e lee Dagọnụ, ọ dangụọ, we ihun kpumẹ alị ihun Ẹkpẹti Osolobuẹ! Isi ẹ lẹ ẹka a ẹbụbụọ a kpagipụgụọ, danye ọnụmụzọ. Ẹhụ Dagọnụ sụọ họdụ.
5
Ya haịn o gi mẹni d'e ru tannị, kẹ ohẹn-mmọn Dagọnụ kẹ onyẹ ọwụlẹ bankọ ụlọ iyi Dagọnụ rị Ash'dọdụ e ṅọnfe ọnụmụzọ ebahụn e ṅọnfe.
6
Osolobuẹ nọ mẹshimẹ kẹ ndị obodo Ash'dọdụ kẹ ndị ọzọ ile nọkunmẹni wẹ ikẹn, tụ wẹ ihiẹn-ofifi.
7
Ogẹn ndị Ash'dọdụ gi hụn ihiẹn rị e mẹni, wẹ nọ sị, “Ẹkpẹti mmọn ndị Izrẹlụ anọkọkwọ imẹ igunrun ẹnyi ebeni, makẹni Osolobuẹ rị e mẹshi kẹ ẹnyi kẹ mmọn ẹnyi wụ Dagọnụ ikẹn ọda-ọda!”
8
Ya wẹ nọ kpọkikomẹ ndị-ọkịkị obodo isẹn rị alị Filistia, jụma wẹ sị, “Nanị ẹnyi e mẹ Ẹkpẹti mmọn ndị Izrẹlụ?” Ndị ahụn rị a kịnị nọ sị wẹ, “Bu ni Ẹkpẹti-mmọn Izrẹlụ shi obodo Gatị.” Ya wẹ nọ bu Ẹkpẹti Chuku Izrẹlụ la obodo wẹ ọzọ wụ Gatị.
9
Kanị e buhẹgụ wẹ Ẹkpẹti hụ Gatị, Osolobuẹ nọ bunụmanị obodo Gatị nkẹ, bu okẹn egun che imẹ wẹ, tụ ndị obodo hụ ihiẹn-ofifi, kẹ ụmụ-ẹka kẹ ndị ka-ẹhụ.
10
E buzi wẹ Ẹkpẹti Chuku shi obodo wẹ ọzọ wụ Ẹkrọnụ. Hụn Ẹkpẹti Chuku gihụ banhan Ẹkrọnụ, ndị Ẹkrọnụ nọ kwan ụya, sị, “E buhẹ wẹ Ẹkpẹti mmọn Izrẹlụ d'e gbu ẹnyi lẹ ndị nke ẹnyi!”
11
Ya wẹ nọ kpọgbama ndị-ọkịkị Filistia, sị, “Dodo, bupụ nị Ẹkpẹti mmọn Izrẹlụ; ya lakin ọnọdị a, amamgbe o gbuchanrịn ẹnyi lẹ ndị nke ẹnyi.” Wẹ ku ẹ makẹni uhue ọnwụn e jungụọ obodo ahụn ile; Chuku a lụmagụọ wẹ ọda-ọda.
12
Ndị nwụnlẹni e buru ihiẹn-ofifi, ẹkwan ndị obodo Ẹkrọnụ ahụn a hanrughọdẹ elu-igwere.
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes