|
| 1 |
|
| Filisxeeme Maganu Taaboota qafadduhu gedensaanni, Abeeniezeerinni kayisse Ashidoodi Katama haadhe hadhu. |
|
| 2 |
|
| Maganinsa Daagooni minira eessite mulesi wortu. |
|
| 3 |
|
| Ashidoodi manni soodo gute kae la"anno woyite, Daagooni Kaaliiqi Taabootira albaanni, baattote aana gombisame nooha affu. Hakkunni gedensaanni kayisse dargasi wortu. |
|
| 4 |
|
| Layinki soodono ka'e la'anno woyite, Daagooni Kaaliiqi Taabootira albaanni, baattote aana gombisame no; angasinna umisi hiiqqaqqante xullote ubbeenna gatino widi callu dargaho no. |
|
| 5 |
|
| Daagooni qeeseno ikkito, Ashidoodi Daagooni minira daannohu baalu techo geeshsha e'nanni waalcho kadikkinni qaafe sa"anno. |
|
| 6 |
|
| Kaaliiqi Ashidoodinna qooxeessinsara noo manna baala lowo geeshsha shettote giddo tuge masisino. Darshete dhibbinnino gawajjinonsa. |
|
| 7 |
|
| Ashidoodi manni konne coye afe, «Israeelete Magani ninkenna maganonke Daagooni gawajjanni noona, Gondooru Taabooti ninkewa keeshsha dihasiissannosi» yii. |
|
| 8 |
|
| Hakkunni gedensaanni Filisxeemete manni gashshaanonsa baala woshshe, «Israeelete Magani Taaboota hiissino?» yee xa'mi. Insano, «Israeelete Magani Taaboota haadhine Gaati yinanniwa masse» yitunsa. Mannuno Taaboota yitinowa haa're ha'ri. |
|
| 9 |
|
| Taaboota haadhe massitu katamano Kaaliiqi qorichishi. Mannano shettote giddo tugi; aja akkala yiikkinni baalanka darshete dhibbinni gawajji. |
|
| 10 |
|
| Hakkunni gedensaannino Maganu Taaboota Eqirooni Katama haa'ne ha'nanni gede assitu. Maganu Taabooti massinoonni katamira noo manni, «Israeelete Magani Taaboota kawiira abbitinohu ninke gudisiissaraati» yee raari. |
|
| 11 |
|
| Maganu lowo geeshsha shetisinonsahuranna reyono masissinonsa daafira mannu Filisxeemete gashshaano woshshe, «Israeelete Magani Taaboota kawiinni hooltine dayino dargira qolle. Hakkuyi ka'a kayinni goonfanni hee'noommo» yii. |
|
| 12 |
|
| Reyikkinni gatino manni darshe shetissinonsa daafira, iima gordo hige raari. |
|
|
|
|