Abasajja b'e Kiriyati-Yewarimu ne bajja, ne bakima Ssanduuku y'Omukama, ne bagiyingiza mu nnyumba ya Abinadabu, ku kasozi; ne batukuza Eleyazari mutabani we akuume Ssanduuku y'Omukama.
Ne bakuŋŋaanira e Mizupa; ne basena amazzi ne bagayiwa mu maaso g'Omukama. Ku olwo ne basiiba, ne beenenya nti: “Twasobya eri Omukama.” Samweli ye yali alamula Abayisirayeli e Mizupa.
Abafilisitiini ne bawulira nti Abayisirayeli bakuŋŋaanidde e Mizupa. Abafuzi b'Abafilisitiini ne bajja okulumba Yisirayeli. Abayisirayeli bwe baawulira, ne batya olw'Abafilisitiini;
Samweli yali akyaweereza ekitambiro ekyokye, Abafilisitiini ne basembera okutanula olutalo ku Bayisirayeli. Ku olwo Omukama n'abwatukira nnyo Abafilisitiini nga laddu mu ddoboozi eddene, bonna ne babuna emiwabo, ne bafufuggazibwa mu maaso ga Yisirayeli.
Ebibuga, okuva ku Ekuroni okutuuka ku Gati, Abafilisitiini bye baali banyaze ku Yisirayeli, ne biddizibwa Yisirayeli; n'ebitundu byabyo Yisirayeli n'abiggya mu mukono gw'Abafilisitiini. Ne wakati wa Yisirayeli n'Abaamori lyali ddembe.