A Samwɛl yeela a Israyɛl rooga gilli: «Sã n yaa ne y sũur fãa, la y lɛɛg n baood Soaala-Wẽnde, bɩ y yiis y sʋkã wẽn-sãamsã: a Baal la a Astarte rãmba. Rɩk-y y sũur n togl Naaba-Wẽnde, sak-y bãmb b yembr bala; la b na n fãag yãmb, Filisti rãmb nugẽ.»
B tigma taab Mispa. La b yõnga koom n bas Wẽnd taoore; b loe noor badaare n yetẽ: «Tõnd beega Wẽnnaam!» Yaa Mispa la a Samwɛl sɩd lebg a Israyɛl naaba la a bʋ-kaooda.
Filisti rãmba wʋmame t'a Israyɛl kamba tigma Mispa, tɩ nanamsa yik n na n wa zab ne a Israyɛl. B sẽn wʋm woto, a Israyɛl kamba diga Filisti rãmb rabeem,
A Samwɛl rɩka pe-bila sẽn ka bas bĩisim, n kʋ yũ-noog maoongo, n yõog-a bugum zãnga n kõ Soaala-Wẽnde. La a kelma ne Naaba-Wẽnde, a Israyɛl yĩnga; la b reega a kosgo.
A Samwɛl sẽn da waa n kõt maoongã la Filisti rãmb kolg n na n kaoog zabre ne a Israyɛl. Badaare, Naaba-Wẽnd tʋma sa-tãse, n yɛɛs Filisti rãmba al wʋsgo. A Israyɛl tõog-b lame.
A Samwɛl tãsa ne pãnga: «Sẽn ta marsã Soaala sõngr ka paoog-d ye.» Dẽ la a rɩk kugri n lugl Mispa ne tẽng a ye sʋka, n pʋd a yʋʋr tɩ Eben-Ezɛr, Wẽnd sõngr kugri. A ra yeelame: «Soaala-Wẽnd sõnga tõndo n ta marsã.»
Filisti rãmba sẽn dag n deeg a Israyɛl tẽns niynsã le leba a Israyɛl, sẽn sɩng Ekrõ n tɩ tãag Gat. Yɩɩ woto la a Israyɛl bogr kãng tɩlg ne Filisti rãmbã. Laafi zĩnda Israyɛl ne Amoritsa sʋk marsã.