×

Ika Bible 2018

1 Samuẹlụ 8

1
Mgbe Samuẹlụ gi kagụ ẹgẹdi, ọ nọ tumẹ ụmụ a ikẹnnyẹ nị w'a hannị ndị Izrẹlụ eṅẹn.
2
Ẹfan okẹnnyẹ ibuzọ a wụ Juwẹlụ, nke ọb'ẹbụọ wụ Abija; wẹ wụ ndị a han eṅẹn imẹ Biẹshẹba.
3
Kanị, ụmụ a ikẹnnyẹ ndịnị esọnni nzọmụkụ a. Wẹ hụ a chọsọnmẹ eje-erere, a narịn egho-azụụn, a han eje-eṅẹn.
4
Ya ndị-ichẹn Izrẹlụ ile nọ zu, bịa d'e kunrun Samuẹlụ imẹ Rama.
5
Wẹ nọ sị a, “Y'a kagụọ ẹgẹdi, bụ ụmụ ị ikẹnnyẹ anọnị kẹ ịyụ. Tumẹni nwan ẹnyi eze k'e duni ẹnyi, nị ẹnyi nwọnrin eze kẹ alị ndị ọzọ ile.”
6
Ogẹn wẹ gi sị, “Tumẹni ẹnyi eze k'e duni ẹnyi,” ẹfọ asụọnị Samuẹlụ ụsụọ, ya ọ nọ mẹ ekpere jụ Osolobuẹ.
7
Osolobuẹ nọ sị a, “Kweri ihiẹn ile wẹ rị a gwa ị; ẹlẹ ịyụ kẹ wẹ rị a jụ kanị mmẹ, mmẹ kẹ wẹ jụ n'e mẹkọzị m eze wẹ.
8
Ẹrịra kẹ wẹ mẹl'a kete m ghalẹ alị Ijiptu wepụha wẹ, a gbakitọ m azụụn, e fe mmọn-lẹ-iyi ichẹn-ichẹn. Ẹrịra kẹ wẹ rị nwan e mẹ i.
9
Kweyeni wẹ nwan; ka gbakẹnmẹ wẹ mkpịnsịn-ẹka ẹnya, mẹ wẹ marịn ihiẹn eze sikọ d'e mẹ wẹ.”
10
Ya Samuẹlụ nọ we ihiẹn ile Osolobuẹ ku gwa Izrẹlụ rị a sị a ye wẹ eze.
11
Ọ sị wẹ, “Lekwọ nị ihiẹn eze hụ k'a kịnị ụnụ k'e mẹ: O k'e gi ụmụ ụnụ ikẹnnyẹ họnrin ndị-agha a hụn e nyinn'ẹ ụgbọ-ẹshin ẹ lẹ ẹshin ẹ, e burun'ẹ ụzọ o nyinkọnị ụgbọ-ẹshin ẹ;
12
o sikọ d'e tumẹ ụfọdụ nị w'a kịn'a ndị-agha: ndị k'a kị madụ nnụ-uku lẹ ndị k'a kị madụ iri kwasị ọgụnnaị; o tumẹ ụfọdụ nị w'a rụnn'a ugbo, a ghọn'a ihiẹn-ugbo; ndị ọzọ jẹnkọ d'a wụrụ ndị a rụnn'a ihiẹn-agha lẹ ihiẹn ụgbọ-ẹshin;
13
o k'e gi ụmụ ụnụ ikpoho họnrin ndị e mẹmẹ udẹn, ndị e shi ihiẹn-oriri lẹ ndị e mẹmẹ kẹ brẹdi kẹ wẹ ile;
14
O sikọ d'a napụ ụnụ hụn ka mma imẹ ugbo ụnụ lẹ alị vaịnị ụnụ lẹ ugbo olivu ụnụ, weye ndị-ọrụn a.
15
O k'e weri ohu-ohu imẹ ọka lẹ mkpụrụ-osisi iri ọwụlẹ ụnụ rụnpụha, we ẹ ye ịhaịmẹ ẹ lẹ ndị ọrụn a;
16
O k'e weri igbọn ụnụ ikẹnnyẹ lẹ ikpoho lẹ efin lẹ jaki ụnụ ka mma, gi wẹ mẹ ihiẹn ọ chọ;
17
o k'e weri atụnrụn lẹ ewu ohu-ohu imẹ iri ọwụlẹ ụnụ nwọn; ọnụ nwẹn jẹnkọ d'e họnrin igbọn ẹ.
18
Ogẹn hụ, ụnụ jẹnkọ d'a kwanma ẹkwan, rịọma nị wẹ d'a zụọpụha ụnụ ẹka eze hụ ọnụ hanrịn, kanị ụhụọhịn hụ, Osolobuẹ azakọ ụnụ.”
19
Kanị ndị Izrẹlụ egọnni Samuẹlụ ntịn. Wẹ sị, “Mba! Ẹnyi chọ eze k'a kịnị ẹnyi,
20
kẹni ẹnyi nọ kẹ alị ndị ọzọ, nwọn eze hụn a kị ẹnyi, e du ẹnyi, a lụnị ẹnyi agha.”
21
Samuẹlụ a nụgụ ihiẹn ile wẹ ku, ọ nọ gwaghọsịchanrịn Osolobuẹ ya.
22
Osolobuẹ nọ sị a, “Mẹ kẹ wẹ ku: ye wẹ eze.” Ya kẹ Samuẹlụ nọ sị ndị-ichẹn Izrẹlụ hụ bịa d'a hụnn'a, “Onyẹ ọwụlẹ lashi obodo ẹ.”
Ika Bible 2018
2018, Mission for Language Translation/Ika Bible Translation Committee. 2018, Wycliffe Bible Translators, Inc
:
Save Notes