|
| 1 |
|
| Samueli ku yaakuzire, yaataho abatabani kuba abaramuzi b'Abaisiraeli. |
|
| 2 |
|
| Omutabani ow'omujigaijo akaba naayetwa Yoeli, n'ow'omushubiro naayetwa Abiiya, bari abaramuzi omuri Beerisheba. |
|
| 3 |
|
| Kwonka abo batabani tibaratwarize nka ishebo, ahabw'okuba bakataishuka, baareka emitwarize ye, baitwa omururu gw'okutunga, baaguma nibarya enguzi, nibaita emanja z'abantu. |
|
| 4 |
|
| Ekyo kyareetera abakuru b'Abaisiraeli kweteerana, bakaija Raama ahari Samueli; |
|
| 5 |
|
| bakamugira bati: Reeba, okuzire, kandi batabani baawe tibarikutwaza nkaiwe. Mbwenu otuhe omugabe w'okututegyeka, tube nk'agandi mahanga. |
|
| 6 |
|
| Haza eky'okugira Samueli ngu otuhe omugabe w'okututegyeka kikamugwisa kubi; yaakyebuuza ahari Nyakubaho. |
|
| 7 |
|
| Nyakubaho yaamugira ati: Yorobera eki abo bantu barikukugambira. Manya tiiwe bangire, kureka niinye bangire kuba omugabe waabo. |
|
| 8 |
|
| Ebi barikukukorera ni nk'ebi batuura nibankorera okwiha obu naabareeta nimbaiha Misiri n'okuhitsya eri izooba, nibaanyimuura, nibeehongyera baaruhanga abandi. |
|
| 9 |
|
| Mbwenu nu, hurira eki barikugamba; kwonka obeehanangiririze kimwe, noobashoboororera oku oriba omugabe waabo aribatwaza. |
|
| 10 |
|
| Samueli atyo agambira abo bantu barikumushaba omugabe byona ebi Nyakubaho yaagamba. |
|
| 11 |
|
| Abagira ati: Egi niyo eriba emitwarize y'omugabe oribategyeka: Aryatwara batabani baanyu, abahindure abaserukare b'okurwanira aha bigaari bye n'abandi ab'okurwanira aha mbaraasi ze n'abandi babe ab'okugyendesa ebigyere beebembeire ebigari bye. |
|
| 12 |
|
| Reero abandi abateho kuba bakuru b'engabo ze rukumi, rukumi n'ataano ataano; abandi babe ab'okuhinga emisiri n'okugimugyeshera kandi abandi babe ab'okumuheeshera eby'okurwanisa n'eby'okukoresibwa ab'ebigaari bye. |
|
| 13 |
|
| Haza atware bahara baanyu babe ab'okukora eby'emigaju, abateeki b'eby'okurya n'ab'emigaati. |
|
| 14 |
|
| Aryabanyaga emisiri yaanyu emirungi ey'emizaabibu n'ey'emioliva, agigabire abagaragwa be. |
|
| 15 |
|
| Aryatwara kimwe kya ikumi ky'ebyokurya byanyu by'enjuma n'eby'emizaabibu, abigabire abakungu be n'abaheereza be. |
|
| 16 |
|
| Aryabaaka abahuuku baanyu n'abazaana baanyu n'ente zaanyu enungi n'endogoya zaanyu, abikorese emirimo ye. |
|
| 17 |
|
| Aryabanyaga kimwe kya ikumi ky'amatungo gaanyu g'embuzi n'ag'entaama, kandi naimwe mube abahuuku be. |
|
| 18 |
|
| Omuri obwo bunaku muryarira, mwefuuze eki mwatooraniire ogwo mugabe; haza obwo Nyakubaho aryabeetsiza. |
|
| 19 |
|
| Kwonka abantu baayanga kuhurira ebi Samueli yaabagambira, baagira bati: Ngaaha! Nitwenda omugabe w'okututegyeka; |
|
| 20 |
|
| naitwe tube nk'agandi mahanga, omugabe waitu atutegyekye, abe omwebembezi waitu, kandi aturwanire engamba. |
|
| 21 |
|
| Samueli ku yaaherize kuhurira byona ebi abantu baagamba, yaagyenda yaabituurira Nyakubaho. |
|
| 22 |
|
| Na Nyakubaho yaamugarukamu ati: Ikiriza ebi baagamba, obahe omugabe. Samueli nikwo kuragiira Abaisiraeli ati: Nimwirooko! Buri muntu agarukyeyo owaabo. |
|
|
|
|