1
Ū Sang'weli aho wanamhaala, ūbatūūla a bitūnja bakwe kūbiza balamuji ba Baisilaeli,
2
būyūtūmama mu Beeli-sheba. Ī lina lya ng'witūnja ū ntaale walī Yoeli, ū wa kabīlī Abiya.
3
Alīyo a bitūnja bakwe baalī batashimīzīlaga ū mu nzīla jakwe; bakagalūka bandya kwikūmvwa mihayo ya būnyeecha na kūyanukūla sabo ja kūhongwa; ū mu gīko ū būlamuji wabo būbiza būtī wa būtūngīlīja.
4
Na lūūlū a banamhala ba Baisilaeli bikuminga, biza ī Lama ū kūlī Sang'weli.
5
Būng'wīla, “Ī haha ū bebe wakūlaga, alīyo a bitūnja bako batūshimīzīlaga ū mu nzīla jako; alilūūlū tūsolelage ntemi abize nsugi wise gīt'ūmo galī a mahanga a gangī.”
6
Gwike ū mhayo gwenūyo gūūleka ū kūnyeja ū Sang'weli; na lūūlū ūnomba ū SEEBA.
7
Ū SEEBA nang'hwe ūng'wīla, “Badegelekage a banhū benaba mu yose īyo balīkūwīla; batūkūlemaga bebe ū kūbiza ntemi wabo, balīnilema nene.
8
Īyo balīkwītīla ū bebe, hū'īyo bakanīītīlaga nū nene, nguno kūfuma lūshikū lwa kūbīnja mu sī ya Misili kūshisha lelo, bakanileka bandya kūtūmamīla bamulungu bangī.
9
Na lūūlū badegelekage, gwike bahūgūlage mu welwa ng'holò, badeebe īyo akūbīītīla ū ntemi ūyo alabasuge.”
10
A banhū abo baanombaga ū Sang'weli abinhe ntemi, ūbawīla pyī ī mihayo ya ng'wa SEEBA.
11
Ūhaya, “Ū ntemi ūyo alamusuge akūyūng'wītīla mihayo īyī: Akūyūbasola a bitūnja bing'we wabatūūla ha nīmo gwa kūtūmama mu magogoteni gakwe ga būlūgū, na kūlang'hana falasa jakwe; na kūyūpeela nhambo batongelile kū būtongi wa magogoteni gakwe.
12
Bamò akūbatūūla kūbiza bataale ba mabità ga bashilikale shihūmbī shihūmbī, na ba mabità ga makūmi atanò tanò; na bangī kūbiza balīmi ba migūnda yakwe na bagesi ba shilīwa shakwe; bangī hangī akūbīīta kūbiza babeeja ba shilanga sha mu būlūgū, na shikolo sha kūtūūla ha magogoteni gakwe.
13
A bashīke bing'we nabo akūbasola babize babeeja ba būlenji wa kwibila bo ng'waso gwawiza, na bazugi na boocha ba myocho mu mazugīlo.
14
A malaale ging'we a gawiza nī migūnda ying'we ya mizabibu nī ya mizeituni ī yawiza, akūyūmutaaja wabinha batūmami ba ha ng'wakwe.
15
Akūyūmusoja Zaka kūfuma ū mu matwajo ga shilīwa shing'we, nū kūfuma ū mu migūnda ying'we ya mizabibu, wabinha bagunanhi na batūmami ba ha ng'wakwe.
16
Na a batūmami bing'we a bagosha na a bakīma, hamò nī ng'ombe jing'we nī nzobe jing'we akūyūmusoja watūmamīla wei.
17
Akūyūmutaaja īmò ya ng'wikūmi ya madaale ga mitugo jing'we, hūna a bing'we mukūbiza basese bakwe.
18
Ū lūshikū lwenūlo ūlū lūshika, mukūlīla no gīkī mugunanhwe kūlwa nguno ya ntemi wing'we ūyo mukūnsola, alīyo ū mu lūshikū lwenalo ū SEEBA atūmushokeja mhayo gose gose.”
19
Gwike a banhū batalīdegelekile ī lilaka lya ng'wa Sang'weli; būhaya dūhū, “Yaya ī gīko, a bise tūtogolwe ntemi wa kūtūsuga.
20
Tūtogilwe tūbize gīt'ūmo galī a mahanga a gangī, tūpandīke ntemi wa kūtūtongeela na kūja hamò nise, na kūyūtūlwīlīīla mu būlūgū wise.”
21
Ū Sang'weli aho wīyigwa pyī īyo bakīhaya a banhū, nang'hwe wīshisha ū kūlī SEEBA ūūkīsomboola gīt'ūmo īlī.
22
Ū SEEBA ūng'wīla, “Badegelekage ūbinhe ū ntemi.” Hūna ū Sang'weli ūbawīla a Baisilaeli benabo, “Jagi kaya lūūlū tame, būlī ng'wene kū nzengo gwa ng'wawe.”
Sukuma Bible 2019
Sukuma Bible Society of Tanzania, 2019