現代台語譯本漢字版
|
| 1 |
| 有一個 便雅憫 支族的人,叫做 基士 ,是 亞別 的子, 洗羅 的孫, 比歌拉 的曾孫, 亞斐亞 的元孫;伊是好額人。 |
| 2 |
| 伊有一個子,叫做 掃羅 ,勇壯閣英俊。 以色列 人無一個會當及伊比;伊比別人較高一粒頭。 |
| 3 |
| 掃羅 的老父 基士 拍毋見幾若隻驢母。 基士 給 掃羅 講:「你導一個僕人去尋許個驢仔。」 |
| 4 |
| 𪜶行透 以法蓮 山區、 沙利沙 地區、 沙琳 地區,後來到 便雅憫 地區,攏尋無。 |
| 5 |
| 𪜶到 蘇弗 地區的時, 掃羅 給伊的僕人講:「咱轉來去。若無,老父無煩惱驢,煞煩惱咱。」 |
| 6 |
| 僕人講:「等咧,此個庄社有一個上帝重用的人受大家敬重;伊所講的攏會實現;咱來去尋伊;無定著伊會給咱指示去叨位尋驢。」 |
| 7 |
| 掃羅 給僕人講:「咱若欲去見伊,有什麼通送伊?咱袋仔內已經無食物,嘛無禮物通送彼個上帝重用的人。咱猶有什麼無?」 |
| 8 |
| 僕人閣應 掃羅 :「我有一塊細塊銀仔,通送互彼個上帝重用的人,請伊給咱講佇叨位會尋著驢仔。」 |
| 9 |
| (以前 以色列 人欲求問上帝,會講:「咱來去尋先見。」較早的先見今仔日叫做先知。) |
| 10 |
| 掃羅 給僕人講:「好,咱來去。」𪜶就去上帝重用的人住的城。 |
| 11 |
| 𪜶上山坪欲入城的時,抵著幾若個查某囝仔出來欲汲水,就問𪜶:「先見有佇遮無?」 |
| 12 |
| 查某囝仔應講:「有,伊佇遮;抵佇恁頭前。緊去,伊今仔日抵好來此個城,欲佇山頭壇為民眾獻祭。 |
| 13 |
| 恁一下入城,佇伊猶未上山頭壇食祭物以前會尋著伊。因為民眾𣍐當先食,著等伊祝福祭物了後,受請的人才會當食。恁此陣去,就會尋著伊。」 |
| 14 |
| 掃羅 及伊的僕人就繼續行。𪜶欲入城的時, 撒母耳 抵抵向𪜶行來,欲出城去山頭壇。 |
| 15 |
| 掃羅 猶未到的前一日,上主已經給 撒母耳 啟示講: |
| 16 |
| 「明仔載此個時陣,我欲差一個人對 便雅憫 地區來你遮;你著給伊抹油,設立伊做我的子民 以色列 的統治者;伊會救我的子民脫離 非利士 人的手。我有看著我的子民的困苦,聽著𪜶哀求的聲。」 |
| 17 |
| 撒母耳 一下看著 掃羅 ,上主就對伊講:「此個就是我給你講欲治理我的子民彼個人。」 |
| 18 |
| 掃羅 佇城門內行倚 撒母耳 ,給伊問:「請問,先見的厝佇叨位?」 |
| 19 |
| 撒母耳 應 掃羅 講:「我就是先見。你先上去山頭壇。今仔日恁欲及我做夥食飯;明仔早起我會送你轉去;你啲煩惱的代誌我會給你講。 |
| 20 |
| 你三日前拍毋見許個驢仔,你毋免煩惱,已經尋著啦。 以色列 人所啲渴慕的是什麼人?豈毋是你及恁老父的家族?」 |
| 21 |
| 掃羅 應講:「我是 便雅憫 人,屬 以色列 人上細的支族;阮家族閣是 便雅憫 支族中上細的。你哪給我講諸個話?」 |
| 22 |
| 撒母耳 導 掃羅 及伊的僕人入去客廳,互𪜶佇所請的人中間坐大位;所請的人客大約有三十個。 |
| 23 |
| 撒母耳 給煮食的講:「我交代你收起來彼份通捧出來。」 |
| 24 |
| 煮食的就將特選的大腿捧出來,下佇 掃羅 面前。 撒母耳 講:「此份是為著你留的,請你食。佇我邀請人客的時,就預先準備,留到此個時陣。」彼日 掃羅 就及 撒母耳 做夥食。 |
| 25 |
| 𪜶對山頭壇落來,入城, 撒母耳 及 掃羅 佇厝頂講話。 |
| 26 |
| 透早天昲光的時, 掃羅 猶佇厝頂啲睏 , 撒母耳 叫伊:「起來,我送你倒去。」 掃羅 就起來;伊及 撒母耳 兩人出去外面。 |
| 27 |
| 𪜶行到城的角頭, 撒母耳 給 掃羅 講:「叫僕人先去。」僕人就去。 撒母耳 閣講:「𫢶遮小等一下,我欲給你傳達上帝的話。」 |
| 保存笔记 |
https://beblia.bible:81/BibleAudio/chinesettvh/1samuel/009.mp3
31
9