Psalms 29 - Heilige Bybel [Afrikaanse Bybel 1933/1953]

	Afrikaanse Bybel 1933/1953 Psalms 29


Stoor notas

1
'n Psalm van Dawid. Gee aan die HERE, o hemelinge, gee aan die HERE eer en sterkte!

2
Gee aan die HERE die eer van sy Naam; aanbid die HERE in heilige sieraad!

3
Die stem van die HERE is op die waters, die God van eer donder; die HERE is op die groot waters.

4
Die stem van die HERE is met krag; die stem van die HERE is met heerlikheid.

5
Die stem van die HERE breek seders; ja, die HERE verbreek die seders van die L¡banon;

6
en Hy laat hulle opspring soos 'n kalf, die L¡banon en Sirjon soos 'n jong buffel.

7
Die stem van die HERE slaan daar vuurvlamme uit.

8
Die stem van die HERE laat die woestyn bewe; die HERE laat die woestyn van Kades bewe.

9
Die stem van die HERE laat die takbokke lam en maak die bosse kaal; maar in sy paleis sê elkeen: Heerlikheid!

10
Die HERE het gesit oor die Watervloed; ja, die HERE sit as Koning tot in ewigheid.

11
Die HERE sal sy volk sterkte gee, die HERE sal sy volk seën met vrede.


Afrikaans Bible 1933/1953 © Bybelgenootskap van Suid-Afrika 1933, 1953. Gebruik met toestemming. Alle regte voorbehou