Beblia

	Baoule Bible 1996 1 Pierre 1


Save Notes

1
'Mor :Piteh' :or no-a :Yusu' 'Klae-a'a: dboo-nyor, 'mor 'ye a-uh, a :mor Nyorsoa gan-a, 'de :or no-a 'duhba⧾ dha yao 'zorn, 'de :or gboba:-a 'bluhba⧾-a' klehkpeh ken dih, 'Pantor-bluhba-: :Gale'tia-bluhba-: 'Kapado'sia-bluhba-: 'Esea-bluhba-: 'dekorn: :Behfi'nia-bluhba-:.

2
:A :Baa' Nyorsoa gan a 'weh see, :ka or no-a eh-a' 'dhu-a'. Or-a' :Zulu: mo-: no-eh, 'de a :dhe-dih-eh: 'for 'i 'do or bo, 'de a 'ye 'o :Yusu' 'Klae-a' 'tele' dih dhe, 'de or-a' nyomor 'ye a-a' deh⧾-zon⧾ worlor:. 'Nyi mla-: 'dekorn: wlu-' dih 'worn-eh-: en 'kpuhba: ken dih 'do a bo.

3
:Yee' a po Nyorsoa-a' 'nyne ya, :or 'dhu-a :a-a' :Gwlor :baa' :Yusu' 'Klae :Baa'. Or-a' :wehlih-a' 'bleh 'bleh, me-: no-eh, 'de :a 'wluh :dele' ka, :a 'ble :gwlii' :dhe-deh:, :eh-a' 'bor-dih:-a nyor⧾ 'bluhbor. :Yusu' 'Klae-a' nma-dih-deh 'di 'wluh-eh:, eh-: or :yi-dih:-', 'de :a 'wluh :dele' ka.

4
'De :a pobo 'de :bhorlie'-Nyorsoa dhe-a dih 'do or-a'a: nyor⧾ bo, eh-a' :gwie 'i. :Bhorlie' :daa, or dhe-eh-: dih 'de or 'bli yai', 'do a bo, :dha eh :se-a' 'zorn-dih: i, eh :se-a' 'kor-dih: i, 'de mor eh :se-a' worn :gweh i.

5
A-a' :Yusu' 'Klae-a' dhih 'jeh-' :po-eh: no-eh, 'de Nyorsoa-a' 'kpih :kan-dih: a ken :chio'lo:, 'de eh 'ye :de 'bor-dih-we-eh ken :yeh-dih:. :Yee' or mu a 'puh-dih:, :yeh or 'dhu-a :dee' see, or 'ye-a' no.

6
A 'yi-dih: 'mona-: dih, 'do deh⧾-a' klehkpeh :daa bo, keen' :mloror' :kana :naa deh⧾ :nee' :nee' :korn en 'ye a 'kle 'ye-dih:, 'do ti-kpor-bei 'di.

7
:Yee' a mu 'goo: :or 'dhen-eh dih 'de neh-' :gweh. 'Kle 'ye-dih-deh:⧾ :daa, en yi-: 'de, 'de nyor⧾ 'ye-eh' yubo: :ka a-a' :Yusu' 'Klae-a' dhih 'jeh-' :po-eh: :eh 'kpa-a deh ken, :eh :zi-a 'o 'goo-', :or no-a 'koror'-deh, eh no-a dhih 'jeh-' :po-eh: 'jeh neh, 'jeh ka. :Yee' 'do 'we-eh: :Yusu' 'Klae-a mu-a 'de :ya 'di, Nyorsoa-a mu a dhih bo :po, 'de or 'ye a dhih-a' 'i 'beh-a'-: 'dekorn: deh-' 'ye-eh-: 'nyi.

8
Keen' :mloror', a 'see-or 'ye, jorwor: a ybeh-or' 'weh 'gboror:. 'De mor a 'see-or 'ye :naa, a po or-a' dhih dhih 'jeh-' 'weh :chio'lo:, 'de a 'yi-dih: 'mona: :klaba'-' dih, :or nyor se-a ken dih zela-eh 'beh-dih:.

9
Deh no-eh, a 'ye a-a' dhih 'jeh-' :po-eh-a' geli' :za-dih-deh: :eh 'dhu-a a-a' 'puh-a'-'.

10
:Yee' Nyorsoa-a' wele-eh: :po-nyor:⧾ :on :za-a mla Nyorsoa-a mu-a a bo :po, or-a' dhih-', mo-: 'o, :on 'wla :gwluhuh' dih, 'de :dhehehn: ka 'di, on pobo: 'de 'puh-a' :daa 'di.

11
'Klae-a' :Zulu:, mo-: ne-uh', 'de on sie ti de, on za-eh' :ka or mu-a 'kle 'ye-:, 'de mor or mu-a dhih-a' 'i 'beh-a' 'ye-: :ke, :mor or-a' 'kle 'ye-dih-eh 'wluh 'o :gwie 'i. On vorn-', on 'ye ti eh mu-a :no-eh-: 'dekorn: :ka eh mu-a no-a' :no-: on 'ye-ih' yubo:.

12
Nyorsoa :to-dih-eh on-: 'i, :ka deh⧾ an za-a-', en se-a 'de on bo :korn, jorwor: en :korn 'de a bo. Deh⧾ :daa, me-: a 'worn :naa, :en 'wluh-a 'de nyor⧾ :an po-a Nyorsoa-a' tubo-wlu:⧾ 'jeh bo, :yuh Gban 'i :ne :Zulu: :on 'wluh-a 'de Nyorsoa 'bli yai', :yi-dih:-a-', 'de :an po-ih-a 'de a bo. Deh⧾ :daa, 'enjor-nyor:⧾ :sloror'-a 'bhorn on 'ye-ih' dih 'worn.

13
:Yee' eh-a' dhih, nyor :or :korn-a or-a' 'jeh, or po or-a' 'dlu 'di dih :na-dih-deh :dha :due', a 'ye deh :no-eh ken 'kpa. A :korn a-a' 'jeh wlu 'ken, a :ne-' deh-zon no. A po 'de a-a' :porluh⧾-a' klehkpeh 'de mla Nyorsoa-a mu-a a bo :po bo, ti :Yusu' 'Klae-a mu-a 'de :ya.

14
:Yee' :ka a 'dhu-a 'nynuu: :an dhe-a 'o Nyorsoa-a' 'tele' dih-', :yee' a-a' :zi 'o 'bhororn'-deh⧾-zon⧾ klei' :neheh', :yih a zi-a 'o klei' :dee', ti a se-a :Yusu' 'Klae yubo:.

15
Jorwor: :ka Nyorsoa :or 'da-a a-uh, or :gweh-a :vlehehn'-', :yee' a :gweh :vlehehn' 'do deh⧾-a' klehkpeh a mu-a :no bo.

16
Deh no-eh, eh 'chle-eh:-' 'de Nyorsoa-a' 'chlee-deh 'di, or 'da, A :gweh :vlehehn'. Deh no-eh, 'on :gweh-' :vlehehn' :ke.

17
:Yee' a 'da-dih Nyorsoa a :Baa', :or zi-a nyor⧾-a' zabe :ka on no-a :koan-a' no-a', :or-a' :za-' :gwie-for :due'. Eh-a' dhih, a-a' 'kmo :ne-eh-a' klehkpeh :eh gweh-a 'duhba⧾ 'i, dha 'bluhba ken, 'nyi eh 'nyi Nyorsoa deh-' 'ye-eh.

18
A zelie-eh:-' 'do deh⧾ a :bai'-a' :bai' :torne: a-uh 'zorn, :en se-a deh 'di :ne. A yubo-eh', eh :se 'goo-: 'sebla-: :en no-a 'koror'-deh⧾ en :se-' :plo-eh: :weh, 'de a :se-' zelie-eh:.

19
Jorwor: 'Klae-a' nyomor :or 'kpa-a deh ken 'gabaa, or-: 'o or no, 'de or zelie: a-uh, 'Klae :or gweh-a 'blae'-yu: on :za-dih:-a 'slaa, :eh se-a fan-: 'dekorn: dhih-: 'bhun :ne.

20
Nyorsoa gan-or' :dee' see, 'de jorwor: 'bluhba-a mu :no-eh. Jorwor: a-a' dhih :oo', eh-: no-eh, 'de Nyorsoa :to-dih-or a 'i, dha ti :daa bo, :en no-a :de 'bor-dih-ti.

21
'Klae-a' 'jeh :dao', or-: no-eh, 'de a po Nyorsoa-a' dhih dhih 'jeh-', :or za-or 'de nma-dih-deh 'di, 'de :or 'nyi-or dhih-a' 'i 'beh-a'. :Yee' eh-: :korn dhih, 'de a-a' dhih 'jeh-' :po-eh-: 'dekorn: deh :gwlii' :dhe-eh-: en :ne 'de Nyorsoa bo.

22
:Yee' :kana :naa, :ka a gweh-a a-a' :porluh⧾ :vlehehn'-', 'do dhih-a' 'yor-eh-a' 'tele' dih :dhe-eh bo, 'de a :ybeh a-a' 'Klae :de-di'-boi'-', 'de :ka 'jeh nor 'di, :yee' 'nyi a :ybeh-dih: deh 'jeh, 'do a-a' :porluh⧾-a' klehkpeh bo.

23
Deh no-eh, Nyorsoa :or 'dhu-a a :Baa', or-: 'nyi a :febeh' :dele'. Or :se 'meheh'-Nyorsoa, jorwor: or-: 'kmo :ne-Nyorsoa :oo'. 'De or no or-a' wlu, :on :ne-a 'kmo-', 'de :on :se-a zii-deh:, 'de on 'nyi a :febeh',

24
:ka eh no-a 'chle-eh 'de Nyorsoa-a' 'chlee-deh 'di, eh no-a, :Gwlor-nyor⧾-a' klehkpeh gweh :peli'. 'De an-a' dhih-a' 'i 'beh-a' gweh :peli'-a' 'voma'e: :en :ne-a 'de 'kwla. :Peli'-a 'meh-', 'de en-' 'voma'e-a 'kele 'o.

25
Jorwor: :Gwlor :baa'-a' wlu-a mu dih :nyna :ka ti-a mu-a 'dlu-' :tehn. :Yee' Nyorsoa-a' tubo-wlu:⧾ 'jeh :en :po-eh 'de a bo, me-: 'o.


Baoule Bible 1996 © Bible Society in Liberia, 1996