Beblia

	Naawuni Kundi Kasi 1 Pita 5


Save Notes

1
N ni mali yɛtɔɣ’ shɛli ni n yɛli cheechi toondaannim’ bɛn be yi ni m-bɔŋɔ: Man’ gba nyɛla cheechi toondaannim’ ni yino, ka lan nyɛ Masia wahala dibu shɛhiralana ni ŋun min’ o ti yɛn laɣim nya o jilima shɛli din ti yɛn yi palo la. Dinzuɣu n kpamdi ya jaande:

2
Guliya Naawuni piɛ’ shɛba o ni zaŋ niŋ yi nuu ni la. Niŋmiya li la yi suhuri ni yu lala zuɣu, ka pa ni muɣisigu bee liɣiri zuɣu, amaa di lee simdi ka di nyɛla yi suhuri n-ye lala niŋbu zuɣu.

3
Di zaŋya fukumsi biɛɣu su piɛ’ shɛb’ Naawuni ni zaŋ niŋ yi nuu ni la, amaa lee maliya biɛhigu shɛli din simdi ni bɛ doli di naba.

4
Ka Piɛgul’ Kpɛm’ la yi ti kana, yi ni deei nam zuɣupila din mali jilima ka di viɛlim ku kpaai.

5
Lala n-nyɛ li, yinim’ bɛn nyɛ bipala la: Zaŋmiya yimaŋa ti cheechi toondaannima, ka yi zaa zaŋ maŋsiɣisibutali kaman binyɛrigu la ye n-sɔŋdi yi taba, dama di sab’ Naawuni Kundi ni yɛli, “Naawuni zaɣisiri karimbaannima, amaa ka niŋdi anfaani niŋdi bɛn siɣisiri bɛmaŋ’ ni.”

6
Dinzuɣu siɣisimiya yimaŋa Naawuni nuu din mali yiko la ni, ka di chɛ ka o ti duhi ya o ni yu saha shɛli.

7
Zaŋmiya yi suhuri ni zɔhiri shɛlikam zuɣu yɛla niŋ o nuu ni, dama o baɣa be yi ni.

8
Gbibiya yimaŋa, ka yirigimiya yimaŋ’ zuɣu! Yi dim’ ŋun nyɛ Sintani la kul chanimi gindi ŋumdi kaman gbuɣinli la m-bɔri ni o gbaai so ŋubi.

9
Ʒiɛnya yim yi yɛda niŋbu puuni ka zaɣis’ o, dama yi mi ni yi mabihi bɛn be dunia ŋɔ luɣ’ shɛlikam zaa nyarila wahala shɛŋa yi gba ni nyari maa tatabo.

10
Ka yi yi di wahala ka di yuui biɛla, Naawuni ŋun nyɛ anfaanizaalana ka boli ya ni yi mini Masia ti laɣim nya o jilima din ka bahigu la maŋmaŋ’ chɛ ka yi nya din simdi ya sɔŋbu zaa, ka chɛ ka yi ʒe yim, ka tin ya yiko mini kpiɔŋ.

11
Ŋuna n-simdi yiko subu hal ni saha din ka bahigu! Ami!

12
N sabi yɛtɔɣa biɛla din be gbaŋ ŋɔ ni n-tin ya la Silvanus ŋun nyɛ n ni lihi so m mabia ŋun ʒe yim la sɔŋsim ni. M bɔri ni n kpaŋsila yi suhuri, ka lan yɛli ya ni dimbɔŋɔ nyɛla Naawuni daanfaani maŋli yɛla. Dinzuɣu ʒiɛnya di ni dɛde.

13
Yi mabihi bɛn be Babilɔn ka nyɛ Naawuni ni pii shɛb’ kaman yinim’ la puhiri ya; ka m bia Maak gba puhiri ya.

14
Puhimiya tab’ yurilim puhigu! Naawuni tim’ yinim’ bɛn nyɛ Masia ni su shɛb’ la zaa suhudoo!


Dagbani Bible 2011 Red Letter Dagbani Bible © Bible Society of Ghana, 2011