Beblia

	Ghomala New Testament 2002 1 TESALONIKA 1


Gardar notas

1
Myə̀ Polo pyə Silvano ba Timotio, bi cu'tə pɔ Kristo pɑ Tesalonika, cu'tə yə a bɑ m̀ nə Si Tá ba m̀ nə Cyəpɔ Yeso Kristo a. Gho' pu hwitə pɑ bi po.

2
Pyə̌ go'tə Si guŋ mcwə awɛ nə guŋ yɔ awɛ nə pa' pyə ŋkhe mtso mɔ́ nthʉ́m mcwyɛ'nyə mɔk. Guŋ mcwə awɛ,

3
pyə̌ ŋkhamtə́ piŋnthʉm yɔ yə a bɑ piŋnthʉm fa', ŋkhamtə́ ŋkhuŋnyə̀ fa' yə a bɑ yɔ́, biŋ ŋkhamtə́ yɔ kaktʉɔ nə mɔktə̀ nə Cyəpɔ yɔk pɑ Yeso Kristo dzə́ Si Tá yɔk pɑ̀,

4
bɑ shəŋtə́ jyə m̀ mfɑmfɑ́ gɑ wɔ́ pyə Si ŋkhuŋ wɔ a, a bɑ ě cwɔ' wɔ́.

5
Nə́ pa' Cuŋ pɑpúŋ yə pyə̌ siŋ a, a tə́ bɑ pu lě da'tə yá bi po pɑ́ da' pa' sobo mghɔm a pɑ́, a bɑ a lě shəŋtə́ da'tə gʉ' e shyə m nə Zhwenyə Dɔlɔ̌. A bɑ ywə yə pyə lə ghə cəcɑ̌ po nə pɑpuŋ yɔ a, a bɑ pǒ zhyə.

6
A biŋ bɑ́ bɑ po lě fo' wɔk, fo' wɔk pyə a Cyəpɔ, nə pa' a bɑ po lě ŋkwi Ghɔm nthʉ́m ghəghʉɔ tə dɑ pɑ ŋwɛnyə Zhwenyə Dɔlɔ̌ ŋkwi:

7
A po'o tə a bɑ pǒ cʉ' fo' nwə bi gúŋ pɑ piŋ pyə wap bɑ Makedonya ba m Akaya a.

8
Nə pa' Ghɔm Cyəpɔ tə bɑ a lě fɑ́ wə po gí da' Makedonya pu Akaya pɑ; a bɑ nwə piŋnthʉm yɔ nə Si lě sɛ nə́ guŋ mtsʉ' awɛ tə bi a pɑ́ pyə lə piŋ gɔm pɑ́.

9
Nə pa' bǎ wɑ̌lə́ bɑ gɔmnwə nə́ pyə́, gɔm pɑ nthi pa' po lə nə dɑ wɔk, ba nthi pa' po lə nə fɑ jʉ̌m mkətwɔk fɛ́ jap m jʉ́m Si a, po'o gɑ po pɑ fa' m bi Si nthʉɔtʉɔ, Si nyə́nyɔ́,

10
biŋ bɑ byap Mu e yə e lə yǎm e nə vʉ̌ a kɛbəŋ gɑ́ e sɔ' nthé wɔk pɑ nə yɛ̌lúŋ yə ǎ wə sɔ' a.


Galacian Bible 2002 Nouveau Testament Ghomala © Bible Society of Cameroon, 2002