1 TIMOTIO 4 - Sagrada Biblia [Ghomala New Testament 2002]

	Ghomala New Testament 2002 1 TIMOTIO 4


Gardar notas

1
Zhwenyə gɔm sɔsɔ̌ gɑ: A gɔ sɔ' pɑ́ nə mcwə jʉm shɑ́ pɔ kə́ŋnyə́ piŋnthʉm, pɑ la nɑ́ tsap pɑ nə mzhwenyə fʉ́tə̀ pu a nə mnwə myə́ a fɑ m̀ bi msata a,

2
bɑ mcwanwə, pɑ labǔ pyə a bɑ pu lə tʉɔ mɔk gə mtiŋ nə pu nə mtʉm map ghə wap pitə̀.

3
Wap gɔ sɔ' pɑ̀ kɔ lɔmdyə́, pɑ co' nə tsʉ shɑ́ potsə́, tə́ bɑ Si lə nyaptə tsə́ bɔ bi pɑ piŋ, wap pyə wap bɑ wap cəŋtə jyə́ nwə nyənyɔ a pɑ nə tsʉ̌ bɑ go'tə.

4
Nə pa' guŋ tsə́ awɛ tsyə Si lə́ nyaptə á bɑ ǎ púŋ, la' sɔm pɑ́ yə gwa'wǎ', nə cwə yə mǒ lɑ fa' gho'tə tə́ nə dzʉ́ a.

5
Nə pa' ghɔm Si pu a mcwyɛ'nyə̀ dɔnyə́ ywə bɔ.

6
La'tə guŋ nwə bɔ awɛ bi mfɑ̌mfɑ́: tə́ a pɑ́ po'o o pɑ kwa' gɛfa' Kristo Yeso yə pɑpúŋ yə a bɑ pú lɑ ghɔm piŋnthʉm ŋkhim e ba nwə pɑpuŋ yə o lə́ lɑ lo'nyə ji'tə a.

7
Sɔ' m nə tsə pomkəfeli nə kheŋnyə Si, mghɔm mbvo pɑ jwǐ, o wa' má. Pɑ ji'tə nə lɑ mku' biŋ.

8
Nə zhi'tə ywə m̀ nə nɑ́ mo na' ŋkwitə́, da' gɑ nə zhi'tə nə lɑ mku' bíŋ ŋkwitə nə guŋ ywə awɛ. A bɑ ǎ ghə mka'nyə vɔk, vɔk cwəlɔ ba yə vɔk yə a gɔ tə́ sɔ' a.

9
Ghɔm tsɔ̌ bɑ ǎ ku' pɑ bi a pɑ mo yap tʉ̌m nə a, ba m pa' bi a pɑ́ guŋ pɔ awɛ kwi a.

10
Nə pa' a bi a pɑ gɑ pyə̌ wə́ jɔgo' biŋ bɑwə do'shù, ba a bɑ gɑ́ pyə̌ jap yɔk mɔktə̀ nə Si yə e bɑ nthʉɔ, yə e bɑ gɛvɔk guŋ pɔ awɛ a, tə bɑ te'te' bɑ gɛvɔk pɑ piŋ a.

11
Yɔ ywə yə o gɔ yap piŋ zhi'tə a yɑ.

12
A sɔmmo kɑ wak o shyə m̀ nə gu'dzʉ́ tsǔ. O gɔ pɑ̀ cəcɑ̌ pɑpiŋ pɑ́ pɑ fo' nə ghɔ̀m, nə ghìŋ, nə ŋkhùŋnyə̀, nə piŋnthʉm ba nə pɑ dɔlɔ̌.

13
Nə pyap cwə yə gɑ̌ gɔ sɔ' a, bɑ nyəŋ nɑ o pɑ nə ke Ŋwa'nyə, nə səso nə ke pɔ, nə zhi'tə ywə.

14
Kɑ wak ywə gho' yə ǎ nə o, bɑ pu lə shyə m nə gɔmnwə pa' gɔm ghɔm Si a hɑ bu, bɑ m nə yap bǔ thə o yə mghətso lə yap a.

15
Yɔ ywə yə o gɔ cəŋtə́ yap nthʉm tʉm o a yɑ; yɔ ywə yə a gɔ ghə tə́ o pɑ ŋkhaktʉɔ a yə̌ŋ; po'o gɑ mnyə guŋ pɔ awɛ yɔ yu nə́ kaktʉɔ gɔ dzə̀.

16
Pɑ shəŋtə́ de nɑ o, ba ywə yə o ji'tə bi pɔmnəŋ a. Nyə́ŋ kaktʉɔ nə́. O gɔ pɑ́ ghə m po'o tə vɔk thə́ nɑ o ba pɔ pyə wap ju' o a.


Galacian Bible 2002 Nouveau Testament Ghomala © Bible Society of Cameroon, 2002