Beblia

	EBIBILIA ENCHENU ZABURI 106


Save Notes

1
Motogie Omonene! Moakere Omonene ng’a mbuya mono, ekiagera ere nomuya, na obwanchani bwaye nigo bogendererete goika kare na kare.

2
Ning’o oranyare goteba ogokora okonene kw’Omonene, gose koraria obonene bwaye bwonsi?

3
Mbasesenirie abanto abwo bagokora ekeene, abwo bagokora oboronge ase chingaki chionsi.

4
Omonene, ong’inyore ekero okororera abanto bao amabera, onchichere, ontoorie!

5
Erio inyare korora amaya abanto bao abachore baranyore, na inche inyare kogokera omogoko bw’abanto bao, naende inyare gwetogia amo nabanto bare omwando oo.

6
Intwe twakorire ebibe buna chisokoro chiaito chiakorete; twakorire ayare amabe mono, ee, twakorire ayare amabe.

7
Ekero chisokoro chiaito chiarenge Misiri, tichiarengereretie igoro y’emeremo yao y’ogokumia; tichiainyorete obwanchani bwao obonge bogendererete botambe, korende chigasaria asore aaria ase Enyancha Embariri.

8
Nonya naboigo Omonene akabatooria ase engencho y’erieta riaye, ng’a anyare komanyekania okobua kwaye okonene.

9
Nigo atogonyerete Enyancha eria Embariri egakamoka, erio agaetia Abaisraeli aroro buna nase ense enyomo.

10
Naboigo Omonene akabatooria korwa ase amaboko ay’ababagechete na kobabooria korwa ase chinguru chi’ababisa babo.

11
Amache akamera kegima abachandi baria babo; onde tatigarete ore moyo nonya noyomo.

12
Erio bakegena ring’ana ri’Omonene, agwo bagatera ase okomotogia.

13
Korende ase obwango bakeba ogokora kwaye, tibaganyete Omonene abasemie.

14
Barabwo nigo babete nobotoonu bw’okogania endagera. Bagateema Nyasae agwo ase erooro.

15
Ere akabaa egento baboretie baegwe, korende akabatomera oborwaire bw’okobareyia.

16
Ekero abanto b’egetwori babete ne ribero ase Musa, na ase Haroni, oyio orenge omochenu o Nyasae,

17
riroba rikabwereka rikamera Datani, na rikamumekeria abanto b’ekeombe ki’Abiiramu.

18
Boigo omorero ogatuboka agwo ase egati y’ekeombe kiabo, ekebemberi ki’omorero kegasamba abakori amabe baria.

19
Abanto bakaroisia omogwekano bw’emori agwo Horebu, erio bagasasima omogwekano oria obombire.

20
Barabwo bakaonchoreria oyorenge obonene bwabo, bakaonchokera omogwekano bw’eng’ombe ekorisia obonyansi.

21
Bakeba Nyasae, Omotooria obo, oria okorete amang’ana amanene aaria Misiri;

22
oria okorete ogokora kw’ogokumia ase ense ya Hamu, naende agakora amang’ana ay’okoondokia aaria ase Enyancha Embariri.

23
Ase ayio Omonene akarengereria ng’a abasirie, korende Musa, omochore oye, agatenena ase obosio bwaye buna omobwatania, ase ogotanga endamwamu yaye teita abanto.

24
Abanto bagachaya ense eria yarenge engiya, ekiagera tibegenete eira y’Omonene.

25
Ekero barenge ase chiema chiabo ime nigo bemurunganetie, tibaigwera eriogi ri’Omonene.

26
Ase ayio akarambora okoboko kwaye igoro yabo, agatiana ng’a abatige bakwere agwo ase erooro,

27
naende ng’a asiarere abanto b’ororeria rwabo, bagende komenya ase egati y’abanto b’ebisaku ase chinse ao ao.

28
Abaisraeli bakabwatana na Baali, enyasae ya Peori, bakaria ebing’wanso biarenge koruegwa ase chinyasae chitari moyo.

29
Ase igo ogokora okwo kwabo gokagechia Omonene goika akaba nendamwamu, na oborwaire bogoita bogatuboka ase egati yabo.

30
Erio Finehasi agatenena agaakanera amabe ayio akoretwe, na oborwaire boria bogatiga goita abanto.

31
Ase engencho y’ogokora okwo Finehasi akabarwa ng’a nomonyene oboronge aare, ebiaare ase ebiaare kogenderera botambe.

32
Abanto bakagechia Omonene agwo ase amache a Meriba, na ase engencho yabo Musa agasoa ase emechando.

33
Nigo bagechetie enkoro ya Musa, goika agakwana amang’ana nobororo, ase ogotarengereria buya.

34
Abaisraeli tibaitete basirie kegima abanto b’ebisaku, buna Omonene konya achikire.

35
Korende nigo basang’ananete nabanto abwo bakeorokereria ogokora kwabo.

36
Nigo bakorerete emegwekano yabo baare gosasima, na eyio ekaba amareba asebare.

37
Barabwo nigo baruete abana babo, abamura na abaiseke, bakaba ebing’wanso ase ebirecha.

38
Bagaitera amanyinga ’abana babo, abamura na abaiseke, abatari na komocha, abwo baruete bakaba ebing’wanso ase emegwekano bagasasima ase ense ya Kanani; na ense eria ekaba eyetachenegeti ase engencho y’ogoiterwa kw’amanyinga ayio.

39
Ase ayio abanto abwo bagesoyia ase ogotacheneka ase engencho y’ogokora kwabo, bagakora obonyaka tibaba abegenwa.

40
Erio Omonene akaba nendamwamu ase abanto baye, na akagechigwa nabanto bare omwando oye.

41
Akababeka ase amaboko ’abanto b’ebisaku, erinde abanto abwo babagechete bakaba bakobagambera.

42
Ababisa babo bakabakorera bobe, bakababua bakababeka inse y’obogambi bwabo.

43
Ase chingaki chinyinge Omonene nigo arenge kobatooria, korende ase ogosemania kwabo bagachora gosaria asare: ase igo bakaba bagochandeka mono ase engencho y’ebibe biabo.

44
Nonya naboigo nabechanderete ase emechando yabo, akaigwa ekerero kiabo.

45
Ase engencho yabo nigo ainyorete okobwatana kwaye kw’ogotianania, akabarorera amabeebe, ekiagera are nobwanchani bogendererete botambe.

46
Nigo agerete abwo babagoosete bakabarorera amabera.

47
Aye Omonene, Nyasae oito, totoorie; tosangererie amo, otorusie korwa ase abanto b’ebisaku, erio tonyare gotogia erieta riao richenu, na gochengera obonene bwao.

48
Omonene, Nyasae bw’Abaisraeli, atogigwe korwa kare goika kare na kare; na abanto bonsi pi batebe, “Amina.” Togia Omonene!


Gussi Bible 2020 OLD EKEGUSII BIBLE PROTESTANT EDITION ©Bible Society of Kenya, 2020