Beblia

	EBIBILIA ENCHENU EMERENG’ANIO 25


Save Notes

1
Eye nero emereng’anio ya Sulemani, eyio abanto ba Hezekia omoruoti bw’Abayuda, basangereretie.

2
Nigo bore obonene bwa Nyasae kobisa amang’ana; korende nobonene bw’abaruoti gokora obotuki ase amang’ana.

3
Buna koreng’ana igoro ere aare mono etatukwe emanywe, na ayare ase ense inse boigo, ne chinkoro chi’abaruoti tichigotukwa chimanywe.

4
Rusia amabiria korwa ase efeta, na omoturi nanyore efeta akoroiseria egekorero ekiya.

5
Rusia abakori amabe korwa ase obosio bw’omoruoti, erio ekerogo kiaye ki’obonene nigo keragenderere gokong’igwa noboronge.

6
Tobaisa gwetang’anania ase obosio bw’omoruoti, gose tobaisa kwebeka aase abanene bare.

7
Nigo erabe buya mono ekero oratebigwe, “Inchuo gocha aa”, kobua gokoiranigwa gochia goikaransa nyuma ribaga ri’abanto abasike.

8
Toba omwango kogenda ase ekegambero. Inee! Inki orakore ase omoerio, ekero omonto oyio gwasoerete arakobue nobe nobosooku?

9
Onye aye omonyene kobwate amang’ana nomonto onde, kwana nere, korende tobaisa koorokia obobisi bw’omonto omoao.

10
Oise koboorokia, na omonto onde aise koigwa ayio, nigo aragosookie, na erieta riao risareke kogenderera botambe.

11
Ring’ana rigokwanwa ase enchera egwenerete nigo ringa buna amatunda amororo amaya mono abekire ase egekabu keroisirie korwa ase efeta.

12
Omonto omong’aini ogokurera oyokoigwera nigo are buna ebonyi ne chisonoi biroseirie chitahabu.

13
Omotomwa ore omwegenwa nigo are ase abwo bakomotoma buna amache amakendu ase engaki ye rigesa, ekiagera nigo akogera emioyo yabo yaba emeyia.

14
Omonto ogwetogia ng’a nare nomoyo omorabu, ko tari korua ebiegwa, nigo anga amare na omwaga bitari korenta embura.

15
Oboremereria nigo bokwororobia omogambi, na oromeme rw’obwororo nigo rokobuna riuga.

16
Onye kwanyorire obooke, karie ekerengo kegoisaine; oise kogeetania nigo oraboroke.

17
Amagoro ao tanara kona‐kogenda ase enyomba y’omosani oo, nigo arabaise korosa naye, erinde akogeche.

18
Omonto okoba kirori bw’oborimo ase omonto onde nigo anga buna enungu y’esegi, gose omoro, gose ensara enyonge.

19
Ogosemeria omonto otari omwegenwa ase engaki y’emechando, nigo enga buna erino ribunegete gose okogoro goteng’eretie.

20
Omonto ogotera amatera ’omogoko ase omonto obwate enkoro ere nobororo nigo anga buna okorusia eanga ase engaki y’obokendu gose kobeka egento ekeroro ase eriote.

21
Onye omobisa oo ore nenchara, moe endagera arie; onye ore nerang’o, moe amache anywe.

22
Igo nobeke omorero bw’amakara ase omotwe oye, na Omonene nakoe eng’eria yao.

23
Omwaga okogusa korwa sugusu nigo okorenta embura, naboigo nomonto omogenki akorenta okobeeana.

24
Mbuya komenya ase ekenunchi kia irongo igoro, kobua komenya ase enyomba amo nomokungu omonyariomana.

25
Amang’ana amaya akorentwa korwa ase ense y’aare nigo anga buna amache amakendu ase omonto ore nerang’o.

26
Omonyene oboronge okorua ribaga ase omokori amabe nigo anga buna orooche rore netintira na buna ensoko yasarekire.

27
Tari buya koria obooke obonge, na abwo bakwerigeria obonene, obonene bwabo nigo borabe bosa.

28
Omonto otamanyeti kwegambera omonyene nigo anga buna omochie chindwaki chiaye chiatagoirwe.


Gussi Bible 2020 OLD EKEGUSII BIBLE PROTESTANT EDITION ©Bible Society of Kenya, 2020