Beblia

	EBIBILIA ENCHENU ABAGALATIA 1


Save Notes

1
Inche Paulo, omotomwa, tinatometwe korwa ase mwanyabanto gose goetera ase omonto, korende goetera ase Yeso Kristo, na Nyasae Tata oyomobogetie korwa ase abakure,

2
amo nabaminto bonsi abare amo nainche, nkobarikera tore inwe abanto be chikanisa chia Galatia:

3
Obuya bobe asemore na omorembe bikorwa ase Nyasae Tata oito, na ase Omonene Yeso Kristo,

4
oyobweruete ere omonyene ase engencho y’ebibe biaito, erinde atotoorie korwa ase ense eye embe ya bono, koreng’ana nogwancha kwa Nyasae Tata oito.

5
Obonene nobwaye kare na kare. Amina.

6
Nakumirie ekiagera mokomotiga iga bwango ere oyobarangeretie ase obuya bwa Kristo, na koonchokera enchili ende eng’ao.

7
Enchili ende eng’ao teri, korende abanto bande mbare bakobachanda na korigia koonchorana enchili ya Kristo.

8
Korende onye nintwe, gose omomalaika korwa igoro, tokobaranderia enchili ende eng’ao, otatiga eria twabaranderetie, aragererigwe.

9
Buna konya twakwanire ritangani, bono ninkwane naende: Onye omonto okobaranderia enchili ende eng’ao, otatiga eria mwanyorete, aragererigwe.

10
Bono inee! Nigo nkorigia ogwancherwa korwa ase mwanyabanto, gose korwa ase Nyasae? Gose nigo nkorigia kogwenera mwanyabanto? Onye nabete nkogwenera mwanyabanto goika bono, anga tinabete omosomba o Kristo.

11
Naki baminto, nimbamanyie ng’a enchili eye nabaranderetie tiyarwetwe na mwanyabanto.

12
Naki tinayenyorete korwa ase mwanyabanto, gose tinorokereretigwe na monto, korende nigo nayenyorete ase okomaanorerwa korwa ase Yeso Kristo.

13
Naki mwaigwete amang’ana ’orogendo rwane ase amatuko aetire ase edini y’Abayahudi buna nachandete ekanisa ya Nyasae goetania ekerengo, na buna nateemete koyesaria.

14
Na inche natang’anete ase edini y’Abayahudi, nkabua abange abarenge b’ekegori kiane ase egesaku kiane, ngakora omokia mono ase okobwata chingencho chie chisokoro chiane.

15
Korende Nyasae oyonchorete ekero narenge ase enda ya baba na akandangeria ase obuya bwaye,

16
agancha koorokia Omwana oye ime asende erinde, imorandie ase egati y’abanto b’Ebisaku. Erio tinarigia gosemania na mwanyabanto onde bwensi;

17
gose tinatiirete kogenda Yerusalemu ase abwo barenge abatomwa be ritang’ani asende, korende nkagenda Arabia, naende nkairana Damesiki.

18
Erio nyuma y’emiaka etato ngatiira kogenda Yerusalemu gokwania Kefa, nkamenya amo nere amatuko ikomi na atano.

19
Korende tinaroche motomwa onde otatiga Yakobo, momura omwabo Omonene.

20
(Ayio nkobarikera, rigereria, ase obosio bwa Nyasae, tindi gokwana oborimo!)

21
Erio nyuma nkagenda chinsemo chia Siiria na Kilikia.

22
Na inche tinamanyekanete ase chikanisa chia Kristo chiare Boyahudi.

23
Korende barabwo nigo bare koigwa rioka ng’a, “Ere oyotochandete ritang’ani, bono nkorandia are okwegena koria aare gosaria agwo ritang’ani.”

24
Bagatogia Nyasae ase engencho yane.


Gussi Bible 2020 OLD EKEGUSII BIBLE PROTESTANT EDITION ©Bible Society of Kenya, 2020