Beblia

	EBIBILIA ENCHENU 1 TIMETHEO 1


Save Notes

1
Inche Paulo, omotomwa o Kristo Yeso ase ogochika kwa Nyasae, Omotooria oito, na Kristo Yeso, ogosemeria gwaito,

2
ngokorikera nde aye Timotheo, omwana one bori ase okwegena: Obuya na amabera, na omorembe bikorwa ase Nyasae Tata, na ase Kristo Yeso, Omonene oito.

3
Buna nakoboretie ekero nare kogenda Makedonia, otigare Efeso, erinde okanie abande tiborokereria okworokereria konde okoao,

4
gose tibategerera emegano ao ao, gose chinderia chie chisokoro, chitari nomoerio. Ayio onsi nigo akorenta okobora‐boria, gose tari gokorera oboagacho bwa Nyasae ase okwegena.

5
Bono ekerenga ki’ogochika oko nakio eke, ng’a babe nobwanehani bokorwa ase chinkoro chindabu, ne chinkoro chitari kobagambia, na okwegena gotari nobong’ainereria.

6
Abande bamochete ayio, batantanire na koonchokera ogokwana kwa bosa.

7
Naende nigo banchete koba aborokia b’amachiko, korende tibamanyeti ayabagokwana, gose amang’ana aria bakomigereria ne chinguru.

8
Twamanyire ng’a amachiko namaya, onye omonto okoyakorera buna agwenerete gokorerwa,

9
na omanyete ng’a amachiko tabekiri ase omonto omoronge. Korende nigo abekire ase abasaria amachiko, na abatari koigwera, ase abatari aba Nyasae, na abanyabibe, ase abatari abachenu, baria bare ab’ense eye, ase abaiti abaise gose abang’ina, na abaiti bande,

10
ase abatomani, na abasacha abagwesaria ase abasacha, ase abakoiba abanto na kobaoonia, ase abanyaborimo, na abakoria chimuma chi’oborimo. Na korirabe ing’ana rinde rionsi ritabwataini nokworokereria kw’obogima,

11
koreng’ana nenchili y’obonene bwa Nyasae, oyore Ogosesenigwa okonene, eye inche negenirwe koyeraria.

12
Namoakeire Kristo Yeso, Omonene oito, oyombegete chinguru, ng’a mbuya mono, ekiagera andoche ng’a nigo inde omwegenwa. Akambeka ase obosomba bwaye,

13
nonya ritang’ani narenge komorama na komochanda, naboigo, narenge omochege. Korende ere akandorera amabera, ekiagera nakorete bo ase ogotamanya, na ase ogotegena,

14
na obuya bw’Omonene oito bwamentekanire mono amo nokwegena na obwanchani ebire ime ase Kristo Yeso.

15
Ring’ana eri neri’ekeene, rigwenerete gwancherwa kegima, ng’a Kristo Yeso nigo achete ase ense gotooria abanyene ebibe, na ase abwo inche noyo bwe ritang’ani.

16
Korende nkanyora amabera ase engencho eyio, ng’a asende inche ritang’ani Yeso Kristo aorokie oboremereria bwaye bwonsi, erio imbe ekiorokererio ase abwo barache komwegena ase okonyora obogima bwa kare na kare.

17
Ase Omoruoti o kare na kare, oyotakonyorekana nogosareka, oyotakororekana, nere Nyasae bweka, asare ere ogosika na obonene kare na kare. Amina.

18
Timotheo, omwana one, ogochika oko nakoeire, koreng’ana namang’ana ’obobani ayakwanetwe igoro yao, erinde ase ayio orwane esegi ere engiya.

19
Obe nokwegena na enkoro etari gokogambia, ebio abande babisereirie are, na ase amang’ana ’okwegena basirire.

20
Ase abwo mbareo Humenayo na Aleksanderi, abwo nabaeire Saitani, erinde borokererigwe tibarama Nyasae.


Gussi Bible 2020 OLD EKEGUSII BIBLE PROTESTANT EDITION ©Bible Society of Kenya, 2020