Beblia

	Filimoon 1


Save Notes

1
Yesuus Kiristoos bikkina karamummi iinniinsi Phaawuloosiinsii niyyabbaayyi Ximootoosiinsii iittantaattoo niinninne maqire baxxoo Filimoonina

2
ki minenne wixxitam amma'nnaanina, niyyaayya Afiibanaa ee'isam niinninne maqirem mishiraachchi sagarina gaadaa'nnisa ihu Arkiphaasinaa asse'amu asso.

3
Niyyanni Waa'iinsii ni Moollanni Yesuus Kiristoosiinsii eroommii xummii ki'nnuwwinne maqire ihona.

4
Iyyabbaayyi Filimoona, at Waa'i oos hundam iittitoo'isaa Moollanni Yesuusanne yoo ki amma'nnatoo macceesummi bikkina Waa'a uunxeena hincummi amman hundam keese sawwoommi ammane i Waa'a galaxxoommo.

5
Odim neese Kiristoosan inkummi bikkina niina yoo er luwwi hundam erisa laqqaa ki amma'nnato mulli keenina kurimminne qoxxitoo'isina Waa'a uunxoommo.

6
Iyyabbaayyo, keesenne amma'nnaa'n wodan usheexxu bikkina ki iitti eese lobakata liiransaakkoo qoxxisaakkoo.

7
At iina Kiristoosinne abbaayyi ikkitti bikkina at issimmi hasisoo luwwa issitona keese iggimminne ijaajeena xanam hee'ummo.

8
Ihukkaarem an keese iittoommi bikkina malaayyinnette ihoo'n iittinne uunxoommo. Mashka'oomim an lommancho; odim Yesuus Kiristoos bikkina karamaammoohane.

9
An keese uunxoommok karaxxi minenne hee'ummuuyyi Kiristoosinne i qachchi issummi Anaasimoos bikkinatte.

10
Ixxi kanniinsi illageen kiina awwaadam hee'ukkoyyo. Ihukkaarem ka lasage iinam kiinam awwaadookko.

11
Ixxom ki beyyo dabaraa asse'aammo. Ixxo ki beyyo dabaraa asse'ummuuyyi an i gagoomim ki beyyo waarummaannisa xigoommo.

12
An ka beyyonne mishiraachchi saga'l bikkina karamaa yoommaannonne ixxi iina ki bikkenne ihaa hara'mmoo'isina iinninne maqire hee'uta'n iittam hee'ummo.

13
At eese hara'mmitona hasoommok ki doo'llinnette bagaan malaayyinnette ihubee'i bikkina at iittitoo'n maham isseena hasoommoyyo.

14
Ayyi la'ukko Anaasimoos hofqax ammanina kiinniinsi annanni ihukkok ka lasage hundi ammanem kiinninne maqire hee'eenatte ihookko.

15
Ixxi ka lasage kiinninne maqire hee'ookkok agishshisa ihaatette ihoo'n agishshiinsi lophphaa iittamaakkoo abbaayyisa ihaatette. Ixxi iina iittamaakko abbaayyo. Lophphaatim kiina maarinne agishshi ihukkaarem Moollanninne abbaayyo.

16
Ee bikkina at eese ki beshichchi issitaa moo'lloohan ikkilas ixxom i'isa issitaa aa'e.

17
Ixxi keese hawwodu luwwi te'im kiinniinsi liqaayyo aa'u luwwi yoohaare ee badano eesenne yoo'isa issitaa xige.

18
An Phaawuloos ee badano miqeena i anginnem iittamaa kitaabaammo. Ihona bagaan at Kiristoosanne amma'nnitoo'isa issummok anette ihummi bikkina hore'em at ki gagim i bada'n manchi ikkittisa kiina tiissiisimmi hasisooyyo.

19
Iyyabbaayyo, ee bikkina ka er luwwa issitoo'isina Moollanni summinne uunxoommuulla. Neese Kiristoosinne abbaayyuwwi inkummi bikkina i wodano liiranse.

20
An ka kiina kitaabummoka issitoo'isa amma'nnoommo. Hore'em an yummaanniinsi lonsitaa issitoo'isa la'oommo.

21
Odim Waa'i ki'nnuwwi uunxato macceesaa ki'nnuwwi beyyo daba'lloommisa issoo'isa amma'nnoommi bikkina iina koyyina'n mine gudise.

22
Yesuus Kiristoos bikkina iinninne maqire karamaa yoo Ephphaafir xummaato asse'aakko.

23
Odim i bax beshshuwwi Maarqoos, Arisxirookoos, Deemaasii Luqaasii xummaato asse'llo'ookko.

24
Moollanni Yesuus Kiristoos eroommi ki'nnuwwinne maqire ihona.


Hadiyya Bible Hadiyya Bible - None