Beblia

	Ñwed Abasi Ke Ikọ Ibibio Ayo Mfịn 2020 Efisọs 1


Save Notes

1
Bọọd, keed ke atu mme abọsịd Krais Yisọs ke uduak Abasi. Ñwet nnọ mme ndisana nditọ Abasi ke Efisọs, mme andisọọñọ nda ke Krais Yisọs.

2
Ibọ mfọn Ye emem a-atooho Abasi ete ñnyịn Ye Abọọñ Yisọs Krais.

3
Itooro anie Abasi ye ete Abọọñ Yisọs Krais, a-amaakidiọñ ñnyịn ke ebekpo ubọọñ ye afịd-afịd edidiọñ sịbidịd ke Krais.

4
Sia anye ke idem amọ amaimek ñnyịn ke Krais mbemiso ekebot ederimbod nte adisana anyʌñ anana ndo ke anyen amọ. Ke ima

5
anye amaimek ñnyịn ke adiben ñnyịn mbon nte nditọ ato ke Yisọs Krais, nte asañake akekem ye inemesịd ye uduak amọ,

6
ke itooro ye ubọọñ mfọn amọ, a-anye inọọhọ ñnyịn ke mfọn ke anye a-anye amaaha.

7
Ke anye ke ñnyịn inie adifak ato iyiib amọ, adifeen mme idiọọkñkpọ, asañake akekem ye mme inie mfọn Abasi

8
a-anye akiduọiyọ ñnyịn ke idem. Ye afịd ekike ye adinam anwaña,

9
anye amaanam ñnyịn idiọọñọ ndedịbe uduak amọ nte asañake akekem ke inem amọ a-anye amaakedaduak ke Krais,

10
a-adiinam awuọ ada ke ini amaadikem ayọhọ-ayọhọ, nọ aben afịd ñkpọ ke abio Abasi ye ke isọñ adian keed ke idak ukara Krais.

11
Ke anye, emaenyʌñ imeemek ñnyịn i-imaikibaba tọọñọ ke aditọọñọ nte asañake akekem ke ubonoñkpọ anye a-anamma afịd ñkpọ asio nọ asaña ye ewʌhọ uduak amọ,

12
nọ ato do, ñnyịn i-ikidooho akpa adidot anyen ke Krais ikan adikwọ itooro mfọn amọ.

13
Ndin emaisịn ndufo ke Krais ke ini emaekekop ikọ akpanikọ, eti etob adinyaaña ndufo. Ke emaekenịm ke akpanikọ, emainịm ndufo idiọọñọ ke ufiikñkpọ Adisana Sịbidịd e-ekenwọñọke,

14
a-adooho ubiọñ adimʌm inie ñnyịn tutu ini adinyaaña mbon e-edoññoke inie Abasi, ke itooro mfọn amọ.

15
Ke ntak ami, tọọñọ ke ini a-ami ñkekoppo mbaña mbuọdidem ndufo ke Abọọñ Yisọs dian ima a-ndufo enieeghe enọ afịd nditọ Abasi,

16
ami ntreke adinọ ekọọm mbaña, nsʌk ñkakaiso itoiyo ndufo ke akam.

17
Nsʌk ñkakaiso mbeeñe mbo yak Abasi Abọọñ ñnyịn Yisọs Krais, Ete andibọ ubọọñ, inọ ndufo Sịbidịd ekike ye adiyaara, ma ediọọñọ anye ekan ami.

18
Ami mmenyʌñ mbọñ akam mbo yak anyen esịd ndufo anwaña nọ ato do ndufo ediọọñọ idodanyen a-anye ikoodo ndufo, ye uforo ke ubọọñ inie amọ ke ndisana nditọ Abasi,

19
mme anana mbiod akwa adudu inọọhọ ñnyịn mme andinịm ke akpanikọ. Adudu ado atie nte utom akwa adudu amọ,

20
a-anye akesịnne ke Krais ke ini anye akenamma anye aset ke ñkpa anyʌñ atem anye ke ubọk udom amọ ke mme ikpeghe ebekpo ubọọñ,

21
akoñ akan afịd adikara mme ukara, adudu ye adikan, mme afịd anyịñ ubọọñ e-ekemeke adinọ, idooho ke emana anye ami ikpọọñ ado ñko ke mfen a-adiidi.

22
Ndin Abasi amaasịn afịd ñkpọ ke idak ukod amọ anyʌñ amek anye adido ukeed ñkpọ nnọ ufọkabasi,

23
a-adooho idem amọ, uyọhọ anye a-anamma afịd ukeed ñkpọ ayọhọ ke afịd usʌñ.


Ibibio Bible 2020 Ñwed Abasi Ke Ikọ Ibibio Ayo Mfịn™ Mme anie unen ñwed ami tọọñọ ke isua © 2020 ado Biblica, Inc. Ebọ unyịmme eto Biblica, Inc. Emʌm afịd unen ke afịd ederimbod enọ Biblica. Ibibio Contemporary Bible™ Copyright © 2020 by Biblica, Inc. Used with permission. All rights reserved worldwide