Beblia

	Ñwed Abasi Ke Ikọ Ibibio Ayo Mfịn 2020 Efisọs 4


Save Notes

1
Nte awo ñkpakọb Abọọñ, ndin, ami ikpek ndufo mbo yak edu uwem a-adotto ikood a-ndufo ekebọọhọ.

2
Isuuho idem afịd-afịd, inyʌñ iba emem-emem; inie ime, iyọ keed aken ke ima.

3
Idomo afịd ukeme adinịm adidiana keed ke Sịbidịd ato ke adibọbọ keed ke emem.

4
Idem keed ye Sịbidịd keed aba kpa nte ekikoodo ndufo ke idodanyen keed ke ini ekikoodo ndufo;

5
Abọọñ keed, mbuọdidem keed, uduọkmmọọñ keed;

6
Abasi keed ye Ete afịd awo, a-abaaha anọ afịd awo, ato afịd anyʌñ ado afịd ñkpọ.

7
Ado einọ ñnyịn keed-e-keed mfọn naña Krais adeeme.

8
Ami ado ntak ikọ Abasi abooho: “Ke anye amaakedọọk ke anyọñ, anye amaadat mbon e-ekesịneke ke ukad usʌñ anyʌñ adeeme mme enọ anọ mme awo.”

9
(Nso-o ke “anye amaakedọọk” awuọọñọ, ke miibọhọke ke anye ñko amaasọiyọ adʌk mme nnenịme mme ikpeghe isọñ?

10
Anye a-akesọiyọke anyʌñ ado anye a-akedọọkkọ akoñ akan afịd mme ebekpo ikpaanyọñ, nọ anye ayọhọ afịd unadod.)

11
Ado Krais ke idem amọ akenọ usʌk awo edo mme abọsịd, usʌk edo mme brọfed, usʌk edo mme bastọ ye mme atitia,

12
adibeeñe mbon Abasi idem mbaña utom unwam, nọ ekan ebọp idem Krais

13
tutu afịd ñnyịn inie adidiana keed ke mbuọdidem ye ke ifiọk ke Ayịn Abasi inyʌñ ikappa isọọñ ikisịm afịd udomo ñkpọ ke uyọhọ Krais.

14
Ke ntodo ñnyịn idiidooho nsek nditọ a-adooho afịm anək aka edem anək aka iso, anyʌññọ ado afuud adi mi afuud aka ko, ke afịd afịm ukpeeb ye afịd ñkara ye ndukanna mme awo ke nsu ammọ.

15
Utu ke ado, ke aditañ akpanikọ ke ima, ñnyịn ke afịd ñkpọ iyaikpoon idʌk ke anye a-adooho iwuod, a-adooho Krais.

16
Ato ke anye afịd idem, e-emaekekama nsio-nsio ñkek ikood idian atọ keed isọọñọ, akọt anyʌñ abọp idem amọ akama ke ima, naña ñkek keed-e-keed enam utom ammọ.

17
Ke ntodo, ami idọkkọ ndufo, mmaana nsọọñọ mbo ke idak Abasi, ke inaaha ndufo eka iso edu uwem aba nte mme Yentaid enamma ato ke uyaha-uyaha akikere ammọ.

18
Ifiọk ammọ ado ñkịm-ñkịm, anyʌñ asịkke akpọñ edu uwem Abasi ato ntak unana adidiọọñọ a-asịneke ammọ ke idem ato ntak isọñesịd ammọ.

19
Sia afịd eti ntụụk ke idem ammọ amaakesop, ammọ ediyak idem esịn ke mme nsio-nsio ndiọi uwem, enyʌñ esʌk ekaaka iso ke mme ndiọi nduwʌd mfen.

20
Ado ndufo ikidieeghe ididiọọñọ Krais ke utọ usʌñ ado.

21
Ke akpanikọ ndufo emaekop ebaña anye, emaenyʌñ ikpeeb ndufo ke anye nte asañake akekem ke akpanikọ a-asịneke ke Yisọs.

22
Ekikpeeb ndufo ebaña ñkaan eduuwem ndufo, ekebo esioño ñkaan idem e-emaebiaara ato ke mme ndubio-ndubio udọñ,

23
nọ enam ndufo edo ufa ke eduuwem ye ke akikere;

24
enyʌñ esịne ufa idem, e-ekebotto nọ aba nte Abasi ke nnen-nnen ido ye adisana uwem ke akpanikọ.

25
Ke ntodo ana afịd ndufo ekọññọ nsu esio enyʌñ etañ akpanikọ enọ mbọhọidʌñ ndufo sia afịd ñnyịn idoñño ñkek idem keed.

26
“Ke iyadesịd ndufo ikiinam idiọọk.” Kuuyak utịn asuuhọ adusịme ye iyadesịd,

27
ñko kuunyʌñ unọ andidiọọk ndomo mbeñe ufañ adiboiyo ndʌk.

28
Anye a-asiyịppe inọ inaaha ayịp aba, ado anam utom, anam ñkpọ se ifọn ke ubọk amọ nọ anye anie se akeme adideeme nnọ mbon unana.

29
Ikiiyak idiọọk ikọ ndomokeed iwuọ ndufo ke inua, ado sʌk se ikeme adinwam adibenne mme awo ke unana ammọ, nọ mbon e-ekpañña utọñ ebọ ufọn ñko.

30
Ikiinyʌñ inọ Adisana Sịbidịd Abasi mbʌññọ esịd, anye e-ebenne isọọñọ ndufo tutu usen adifak.

31
Top idiọọkesịd, utọk ye ifiobesịd, añwan ye ikọ, ubiad anyịñ ye afịd-afịd udod awo uyo duọọk.

32
Fọn ido nyʌñ kop mbọm baña emọ-emọ awo, feen nọ keed aken kpa naña Abasi akefeen inọ ndufo ke Krais.


Ibibio Bible 2020 Ñwed Abasi Ke Ikọ Ibibio Ayo Mfịn™ Mme anie unen ñwed ami tọọñọ ke isua © 2020 ado Biblica, Inc. Ebọ unyịmme eto Biblica, Inc. Emʌm afịd unen ke afịd ederimbod enọ Biblica. Ibibio Contemporary Bible™ Copyright © 2020 by Biblica, Inc. worldwide