Beblia

	Ñwed Abasi Ke Ikọ Ibibio Ayo Mfịn 2020 Ibru 12


Save Notes

1
Ndin sia utọ akwa udịm mme ntiense ami ikannake ñnyịn akʌk, yak ñnyịn itoomo afịd mme ñkpọ e-esibiọñọke ñnyịn iduọọñọ, nduọhọ a-asiñyʌññọ imʌm ñnyịn ukad iduọọñọ, ñko yak ñnyịn isịn ifịk ifeghe itọk mbuba e-ekemekke inọ ñnyịn.

2
Yak ñnyịn iwuuk anyen ñnyịn ke Yisọs, andido ntọọñọ ye andinam mbuọdidem ñnyịn afọn ama, a-akedooho ke ntak inemesịd e-ekenịmme ke iso amọ, anye akeyọ krọs, amiim ndọk amọ, anyʌñ asuuk atie ke ubọk udom ke ebekpo Abasi.

3
Kere baña anye a-akeyọọhọ utọ mfiomo ado ke ubọk mme ndiọi awo, mbaak afo udukop mmemidem unyʌñ uduọ esịd.

4
Ke ndutʌkkọ mfo adibọkkọ idiọọkñkpọ, unwanake dion ukuwuọ itie adiduọk iyiib mfo.

5
Ñko, nte ndufo emefre ikọ nsọọñọukod i-ikotto ndufo nte nditọ? “Ayịn mmi, kuudat ntʌnọ Abasi nte ado mfefeere ñkpọ, ñko kuunyʌñ uyak esịd uduọ ke ini anye asuaaha unọ,

6
sia Abọọñ asitʌnọ mbon a-anye amaaha, anyʌñ anọ mbon a-anye akoodo adat ufen.”

7
Iyọ nsọñọñkpọ nte ntʌnọ Abasi asʌkkọ ikama ndufo nte nditọ, sia anie ayịn ke ete mmiitʌnọke?

8
Adieke ndufo miibọọhọ ntʌnọ (ndin afịd awo e-ebọ ntʌnọ) awuọ ndufo idooho ata nditọ.

9
Ñko, afịd ñnyịn imainie mme ete abʌkidem e-eketʌnọke ñnyịn, ñnyịn ñko imaikpono ammọ ke ntak ado. Ke die ndin ke ñnyịn idiitre adisuuk idem nnọ Ete mme Sịbidịd ñnyʌñ ndu uwem!

10
Mme ete ñnyịn emaitʌnọ ñnyịn ke etək-etək ini ke usʌñ ake ammọ ekekịtte ebo ke afọn; ado Abasi itʌnọ ñnyịn ke ufọn ñnyịn, nọ ñnyịn ikeene iwuana ke nsana mma amọ.

11
Ntʌnọ ndomokeed inieeghe inem ke ini afo abọọhọ anye, ado akama ubiak. Ado akem ko-o, anye adat idọk eti uwem ye emem asọk mbon e-emaekebọ ukpeeb ke anye.

12
Ke ntodo, inam mme ubọk ndufo e-emaekemeem ye mme edọñ ndufo emaana esọọñ!

13
“Inam afañ usʌñ ndufo ada ukem-ukem inọ ndufo,” mbaak afekke ukod adikappa mbʌñọ, ado abọ nsọñidem.

14
Inwana ke afịd usʌñ adiba ke emem ye afịd awo ye adinie adisana uwem; adisana uwem mmiibaaha, awo ndomokeed idiikịtte Abọọñ.

15
Ikịt ibo ke awo ndomokeed itịppe mfọn Abasi, ñko ke idod-idod adʌñ ikọttọ idinam mfịna inyʌñ ibiad umiañ.

16
Ikịt ibo ke ndufo ndomokeed idooho asịn efịbe me anana Abasi, inyʌññọ iba nte Isọ, a-akedooho ke ntak usan ndidia keed anye akenyam unen udeme amọ nte andikpon ñkan nte akpa ayịn.

17
Nte ndufo ediọọñọke, akema, ke ini anye akediyemme unen mfọn ado, emaesịn anye. Anye ikikanna inam nọ ekpəhọ esịd, akpesʌk ado anye aketuaaha mmọọñayịd ayem adidiọñ ado.

18
Ndufo idieghe ibịne abod e-ekemeke adituuk, a-anyʌññọ asak ikañ; ke akịm, ukuud ye ayobio;

19
me uyom adukpəñ me utọ uyo a-atañña mme ikọ a-mme andikop ekpeiyeke-kpeiye ebo ke mmimọ iyemme adikop utọ ikọ ado aba,

20
sia ammọ ikikanna iyọ aba se ekenọ ewʌhọ ebaña: “Akpedodo unam atuuk abod ado, ana etọ ke itiad.”

21
Ndise amaanie ndịk tutu Moses amaabo, “Idem adiinyeenyek ye ndịk.”

22
Ado ndufo emedi Abod Sayọn, Yerusedem ake abio ubọọñ, idʌñ aduuwem Abasi. Ndufo edi adikịt tọsịn mme tọsịn mme enyere ke mboho idaara,

23
ke ufọkabasi mme andikito mmana, e-emaekewet anyịñ ammọ ke abio ubọọñ Abasi. Ndufo emedi ebịne Abasi, akpe ikpe afịd awo, edi ebịne mme Sịbidịd mme nti awo e-emaekenam efọọn ema,

24
edi ebịne Yisọs andida ubiọñ ke ufa edioomo, ye ke adisiime iyiib a-atañña ikọ a-afọnnọ akan iyiib ake Ebeed.

25
Ikịt ibo ke ndufo isịnne anditañ ikọ ami. Adieke ammọ mmiikibọkkọke ke ini ekesịnne adikop uyo anye a-aketañña ikọ anọ ammọ mi ke isọñ, die ndin ke ñnyịn idiibọkkọ, adieke ñnyịn ikannake iso ikpọñ anye a-atieeghe ke abio ubọọñ Abasi atañ ikọ inọ ñnyịn?

26
Ke idahado uyo amọ amaanyek isọñ, ado idahami anye a-añwọñọ abo, “Ini keed mfen, ami ñyaanyeeñe, idooho ederimbod ikpọọñ ado mme ikpaanyọñ ñko.”

27
Mme ikọ ami, “ini keed mfen” ewọt adibenne mfep afịd ñkpọ se ekeme inyeeñe a-adooho mme ñkpọ se ekebobot nọ ato do afịd se awo mmiikanna inyeeñe esʌhọ.

28
Ke ntodo, sia ñnyịn ibọọhọ abio ubọọñ a-ñkpọ miikanna inyeeñe, yak ñnyịn inọ ekọọm inyʌñ ikpono Abasi ke eti usʌñ ke uteñe ye ata ndịk,

29
sia “Abasi ñnyịn ado ikañ a-ataahata.”


Ibibio Bible 2020 Ñwed Abasi Ke Ikọ Ibibio Ayo Mfịn™ Mme anie unen ñwed ami tọọñọ ke isua © 2020 ado Biblica, Inc. Ebọ unyịmme eto Biblica, Inc. Emʌm afịd unen ke afịd ederimbod enọ Biblica. Ibibio Contemporary Bible™ Copyright © 2020 by Biblica, Inc. worldwide