Beblia

	Ñwed Abasi Ke Ikọ Ibibio Ayo Mfịn 2020 Yemsi 1


Save Notes

1
Yemsi ayịnufọk ake Abasi mme ake Abọọñ Yisọs Krais, Anọ esion duop mme iba e-esuanake ke atu mme idịd: Ekọọm.

2
Dat ami ke ata idaara, mme nditọete mmi, ini ake ndufo ekịtte ndutʌkkọ ke nsio-nsio usʌñ,

3
sia ndufo emediọọñọ ke adidomo mbuọdidem ndufo anam ndufo e-enie ata ime.

4
Ime ana akweeñe utom amọ nọ atoodo ndufo ediọọñọ idem ayọhọ-ayọhọ, inanake ñkpọ ndomokeed.

5
Adieke awo ke atu ndufo ndomokeed ananake ifiọk akpena anye abịp Abasi, a-anọọhọ afịd awo ke ntadubọk, ikịtte ndudue ndomokeed, ndin ayaanọ enye.

6
Ado anye amaabịp, anye ana anịm ke akpanikọ ndin inieeghe eyịghe, sia awo a-anieeghe eyịghe aba nte mbufuud mmọọñ, a-afịm afịtte anyʌñ atop.

7
Utọ awo ado akekere ke imọ iyaabọ ñkpọ ndomokeed ito Abọọñ;

8
anye ado awo esịd iba, inieeghe iwuuk ke afịd se anye anam.

9
Mme andinịm Abasi ke akpanikọ ke usuuk itie akpena enie uko sia ammọ ekpon ke iso Abọọñ.

10
Ado anye a-amọiyọke imọ akpena anem esịd ke ini Abasi asuuhọ anye itie, sia anye ayaaboiyo afep nte frawa ke ikọd.

11
Sia utịn asakka mme akpọsọñ ufiop anyʌñ ayeeme se etọ; mme nseghe amọ eduọññọ ndin ebiad uyai amọ. Ke ukem usʌñ ado, awo imọ ñko ayaayeeme ke ini anye asʌkkọ akaiso ke mbubeghe amọ.

12
Afọfọn anọ awo a-anieeghe ime ke ini anye akịtte idomo sia anye amaakan idomo anye ayaabọ anyanya uwem ake Abasi amaakeñwọñọ anọ mbon e-emaaha anye.

13
Ke ini idomo, awo ndomokeed akuubo, “Abasi andomo miin.” Sia idiọọkñkpọ ikemekke adidomo Abasi, anye ñko inyʌññọ idomo awo ndomokeed;

14
ado edomo awo keed-e-keed ato ke idiọọk udọñ amọ, edʌt anye esio ndin etap anye.

15
Ndin, ke idiọọk udọñ amaayommo udọñ ami, anye aman idiọọkñkpọ, ndin idiọọkñkpọ amaakpon ama, aman ñkpa.

16
Kuuyak ubiaña fiin, mme ndima nditọete mmi.

17
Afịd ntiñkpọ ye afịd mfọnmma enọ ato anyọñ, asọiyọ ato Ete unwana anyọñ, a-mmiikpəhọke nte mme ndukpọñ ekpuuñọke.

18
Anye amaamek adibon ñnyịn ito ke ikọ akpanikọ, nọ ato do ñnyịn ido nte akpa mfịd, ke atu afịd se anye abot.

19
Mme ndima nditọete, idat ukpeebñkpọ ke ami: Afịd awo esọp adikop, ekuusọp aditañ, ekuusọp ñko ediyaad esịd.

20
Sia iyadesịd awo idatta adinen uwem a-Abasi ayemme idi.

21
Ke ntodo, isịññe mme afịd mbubiam edu uwem ye mme idiọọkñkpọ e-ebañake ewak ini ami, ndin ke nsuukidem inyịmme ikọ e-etọọhọ ke esịd ndufo a-akemeke adinyaaña ndufo.

22
Ikiikpañ utọñ ikop ikọ kpọd, ndin ndufo ebiaaña idem ndufo. Enam se ikọ atañ.

23
Awo ake adodo akeakoppo ikọ ami ado inamma se anye atañ aba nte awo a-aseeghe iso amọ ke ukịdiso,

24
ndin, amaase idem amọ ima inyʌñ idakka, ke ndo-ndo ado anye afre naña anye aba.

25
Ado awo a-asọññọ anyen ase mfọnmma ibed a-asiooho awo ke ufịn anyʌñ akaiso adinam ami, ifreke se anye akekop, ado akaiso anam anye eyaediọñ anye ke se anye anam.

26
Adieke mme awo edatta idem ammọ nte mme anam ikọ Abasi ado ammọ imʌmmọ edeme ammọ ke akpọsọñ ubọk, ammọ ebiaaña idem ammọ ndin ikọ Abasi ammọ ado ikpu-ikpu.

27
Ikọ Abasi Ete ñnyịn adatta nte nsasana ndin inieeghe ndo ado ami; adise ñkpọ mbaña mme nditọ anana ete mme eka ye mme ebeakpa ke ini nnan anyen ammọ ye adinyʌñ nnịm idem amọ asana mbaak ederimbod adibiad anye.


Ibibio Bible 2020 Ñwed Abasi Ke Ikọ Ibibio Ayo Mfịn™ Mme anie unen ñwed ami tọọñọ ke isua © 2020 ado Biblica, Inc. Ebọ unyịmme eto Biblica, Inc. Emʌm afịd unen ke afịd ederimbod enọ Biblica. Ibibio Contemporary Bible™ Copyright © 2020 by Biblica, Inc. Used with permission. All rights reserved worldwide