Beblia

	Ñwed Abasi Ke Ikọ Ibibio Ayo Mfịn 2020 Adiyaara 1


Save Notes

1
Adiyaara Yisọs Krais a-Abasi akenọọhọ anye ediwọt mme andikpono anye mme ñkpọ se idiisọp itịppe. Ndin anye akenam ediọọñọ ñkpọ ami ke adinọ enyere amọ esọk ibed amọ Yọọn,

2
a-atieeghe ntiense abaña afịd ñkpọ se anye akekịt–ado ado ikọ Abasi mme ikọ ntiense Yisọs Krais.

3
Afọfọn anọ awo andikood mme ikọ brọfesi ami, anyʌñ afọn ñko anọ afịd awo se ikop inyʌñ idat ikọ ami isịn ke awọñ esịd se ewed ke esịd ammọ, sia ini akpere.

4
Yọọn, Anọ etob ami asọk mme ufọkabasi itiaba e-ebaaha ke Esia: Mfọn ye emem ato anye a-abaaha, a-amaakebaba, a-adiinyʌñ itịmme idi, ibọ ñko ito mme sịbidịd itiaba e-ebaaha ke iso ebekpo amọ,

5
anyʌñ ato Yisọs Krais andinọ ntiense akpanikọ, akpa ke atu mme andised ke ñkpa ye Andikara mme ndidem ederimbod. Ubọọñ mme adudu enie anye i-imaaha ñnyịn, a-anyʌññọ adat iyiib amọ ayet ñnyịn asio ke ndiọiñkpọ,

6
ndin anam ñnyịn ido mme abio ubọọñ ye mme aku adinam ñkpọ nnọọ Abasi mme Ete–itooro mme adudu anie anye ke nsi-nsi nsi-nsi! Amen.

7
“Sese, anye asʌk adi ke ntọñanyọñ,” ndin “afịd anyen eyaekịt anye, idem mbon e-ekekịmme anye”; ndin afịd-afịd uduod awo ke isọñ “eyaefʌhọ ke ntak amọ.” Ntodo ke adido! Amen.

8
Abọọñ Abasi atañ, “Ami ndo Arfa ye Omeka, a-abaaha, a-amaakebaba, a-adiinyʌñ itịmme idi, Andikoñ Ñkan.”

9
Ami Yọọn, ayịnete ye nsaña ndufo ke edibọ ukuud ke ntak abio ubọọñ mme ediyọ ke ime a-adooho ake ñnyịn ke Yisọs, ñkeba ke isuọ Badmus ke ntak ikọ Abasi mme ntiense abañake Yisọs.

10
Ke usen Abọọñ ñkeba ke Sịbidịd, ndin mmaakop ata ekamba uyo nte adukpʌñ ke edem mmi,

11
naña abo: “Se afo akịd wet ke ikpañwed, nyʌñ nọ esọk mme ufọkabasi itiaba: e-ebaaha ke Efisọs, Simina, Bekamọm, Tiatira, Sadis, Fidadefia ye Daodisia.”

12
Mmaawọññọ mbo nse uyo anditañ ikọ mme ami. Ndin ke mmakewọññọ mmaakịt mme eto kandịd nte kood itiaba,

13
ndin ke ufọọd mme eto kandịd itiaba ami awo amaada “nte ayịn awo,” asịne anyan ewrọ a-anyiọọñọ asịm anye ñkpaha, abọbọ nte kood afọñ ke ikpanesịd amọ.

14
Iwuod mme ided amọ ekebiod afia ided edọñ, enyʌñ esana nte asino, ndin mme ñkpasi anyen amọ akeyamma nte edeme ikañ.

15
Ndin ñkpad amọ ekebit brọnsi e-esʌkkọ efọp ke ikañ, ndin uyo amọ akeba nte uyom akwa inyañ ibom.

16
Ke ubọk nnasia amọ anye amaakama ntantaafiọñ itiaba, ndin ke inua amọ anye amaafịbe iso edem iba eduad a-asọppọ tutu. Iso amọ akeyamma nte utịn a-ayamake ata akpọsọñ-akpọsọñ.

17
Ke mmaakekịt anye, ami mmaaduọ nna anye ke ukod nte akpo awo. Ndin anye amaaben ubọk udom amọ andot miin anyʌñ abo ate, “Kuukop ndịk. Ami ndo Akpa ye Akpatre.

18
Ami ndo anye adu uwem; Ami mmaakpa, ndin kase Ami ndudu ke nsi-nsi. Ami ñnyʌñ ñkama ukpọhọde ñkpa ye Abioekpo.

19
“Wet, ndin, mme ñkpọ se afo akịd, mme ñkpọ se iba idaha ami ye mme ñkpọ se idiiba ke ini iso.

20
Ndịbe-ndịbe ñkpọ a-abañake mme ntantaafiọñ itiaba a-afo akekịtte naña ensịne ke eka ubọk udom ye eto kandịd nte kood itiaba edo ami: Mme ntantaafiọñ itiaba edoñño mme enyere ufọkabasi itiaba ndin mme eto kandịd itiaba edoñño mme ufọkabasi itiaba.”


Ibibio Bible 2020 Ñwed Abasi Ke Ikọ Ibibio Ayo Mfịn™ Mme anie unen ñwed ami tọọñọ ke isua © 2020 ado Biblica, Inc. Ebọ unyịmme eto Biblica, Inc. Emʌm afịd unen ke afịd ederimbod enọ Biblica. Ibibio Contemporary Bible™ Copyright © 2020 by Biblica, Inc. Used with permission. All rights reserved worldwide