Beblia

	Ika Bible 2 Samuẹlụ 18


Save Notes

1
O mẹgụ, Defidi nọ kpọpụha ndị-agha ya lẹ wẹ wị, tumẹsọnmẹ ni wẹ ọkị-agha — ndị hụn sikọ d'a kị ndị-agha nnụ-uku nnụ-uku lẹ ndị hụn sikọ d'a kị ndị-agha ọgụn-isẹn ọgụn-isẹn.

2
Ya Defidi nọ dọnbe wẹ ụzọ ẹtọ, zipụ wẹ: Jụabụ kị itu ohu, nwẹnẹ Jụabụ wụ Abishaị nwa Zeruaya kị itu ohu, Itaị onyẹ Gatị kị itu ohu. Defidi nọ sị wẹ, “Mmẹ lẹ enwẹn m sikọ d'e sọnrịrị ụnụ.”

3
Kanị wẹ nọ sị a, “Y'e jẹnkọkwọ! O mẹ hụn ẹnyi e gi gba ọsọ, achụkọdẹ wẹ ẹnyi nwẹn; wẹ gbupụdẹ ahanmahan ẹnyi ile nchaị, o hikọkwọ wẹ mmanị isi i — isi i nọ nwan kẹ isi madụ nnụ-uku iri imẹ ẹnyi. Ọ ka nwan mma n'ị nọdị imẹ obodo ebeni, a kwadọn ẹnyi.”

4
Eze nọ sị, “Hụn ọwụlẹ rị ụnụ mma ẹnya kẹ m k'e mẹ.” Ya eze nọ wuzo ọnụ-mgbọn, ndị-agha hụ nọ pụhama nị wẹ buli: itu ọgụn-isẹn ọgụn-isẹn lẹ itu nnụ-uku nnụ-uku.

5
Eze nọ sị Jụabụ, Abishaị lẹ Itaị, “Gi ni ẹka alụlụa sọn nwata ahụn wụ Absalọm makẹ ufiri m.” Ndị-agha ahụn ile nụ kẹ eze rị a gwa onyẹ-onyẹ imẹ ndị ọkị-agha ahụn oku Absalọm.

6
Ndị-agha ahụn nọ shi imẹ ọfịa d'a lụsọn ndị-agha Izrẹlụ agha. Imẹ ẹgboko ẹgbẹrẹ Ifrem kẹ wẹ nọ lụ agha hụ.

7
Ndị agha Defidi nọ nọ ebẹhụ mẹri ndị-agha Izrẹlụ. Ndị wẹ gbu ụhụọhịn ahụn e bukẹ ọda: ndị-agha nnụ-uku mmẹbụọ (20,000) kẹ wẹ gbu.

8
Agha ahụn ghagbarị azụụn ahụn ile; ndị ẹgboko ahụn gbu ụhụọhịn hụ ka ndị ọpịa-agha gbu.

9
O mẹgụ, Absalọm nọ kunrun ndị-agha Defidi idẹnmizi. O nyinkọ anyịnyan-mulu ẹ; kẹ anyịnyan-mulu ẹ ghafekọ okpuru agalaba osisi-okuu hi ogbe, osisi ahụn nọ kọndọn Absalọm isi, Absalọm e kọnrin ebẹhụ, efeke — anyịnyan hụ o te nyinkọ a gbasọnmẹ.

10
Onyẹ-agha Defidi ohu a hụn a, jẹn d'a sị Jụabụ, “M hụn Absalọm kikẹnni ebe o kọnrin elu osisi okuu.”

11
Jụabụ nọ sị onyẹ hụ gwan'a “Kịnị! Y'a hụnghọ a? Kị haịn i gilẹni gbu ẹ tọ ebẹhụ? Nkẹ m'e ye i nwan akpụrụ siliva iri lẹ akpụkpọ-ukun odogun-agha.”

12
Kanị okẹnnyẹ ahụn nọ sị a, “Ọsụọdẹn'a wẹ kpọnpụha ibe siliva nnụ-uku kpọnye m, emẹkọ m nwa eze eje-ihiẹn! Ẹnyi a nụgụọ kẹ eze rị a gwa ịyụ lẹ Abishaị lẹ Itaị, ‘Gikwọ nị ufiri m dọnmẹ nwata ahụn wụ Absalọm ndụn.’ ”

13
Omẹni m te we isi m che ọb'ẹka gbu ẹ, onwọnni ihiẹn w'e zuemẹni eze; nkẹ ọ wa, y'a la m tọ.

14
Jụabụ nọ sị a, “Esọnkọ m'ị gbu ogẹn ẹnịna.” Jụabụ nọ kịrị obo ẹtọ, kpọ wẹ ye Absalọm obi elu osisi okuu hụ — ebẹhụ ọ rịkwọ ndụn.

15
Ya madụ iri ndị e che Jụabụ nche nọ fihunmẹ Absalọm, gi ọpịa-agha gbupụ a.

16
Ya kẹ Jụabụ nọ gbu opi-agha, ndị-agha nọ chụbehi ndị-agha Izrẹlụ, makẹni Jụabụ a sịgụọ wẹ kụsị.

17
Wẹ nọ buru Absalọm, tụ a ye imẹ mgbugbu hi-ogbe rị imẹ ẹgboko ahụn, kpọn ọmụma bu ọda kpu ẹ. Ndị-agha Izrẹlụ ile nọ gbayịya, onyẹ-onyẹ nọ la iwe ẹ.

18
Ogẹn Absalọm gi rị ndụn, o zumẹgụọlẹ ọmụma ohu ye Ọdanmgbugbu-Eze kẹni w'e gi ẹ a nyanhan a, makẹni ọ sị enwẹn ẹ, “Amụnị m okẹnnyẹ hụn w'e gi a nyanhan ẹfan m.” Ya ọ nọ gụn ọmụma hụ ẹfan a. Ihiẹn w'a kpọkwọ a nwan d'e ru tannị wụ “Ịnyanhan Absalọm.”

19
Ahimaazị nwa Zadọkụ nọ sị, “Nị m gba ọsọnị, nị m d'a gwa eze nị Osolobuẹ a zụọpụhagụọ a ẹka ndị-iṅẹnrẹn ẹ.”

20
Jụabụ nọ sị a, “Ẹlẹ ịyụ jẹnkọ d'e zi ozi tannị. N'i zighọ ozi ogẹn ọzọ, kanị ẹlẹ nke tannị, makẹni nwa eze wụ onyẹni nwụnhụnnị maị.”

21
Jụabụ nọ sị onyẹ alị ọzọ, onyẹ Ẹtiopịa rị ndị-agha Defidi, “Jẹn d'a gwa eze ihiẹn ị hụn.” Onyẹ Ẹtiopịa ahụn nọ bini Jụabụ, gbajẹnmẹ.

22
Ahimaazị nwa Zadọkụ nọ sịzị Jụabụ, “K'ọrịlẹ, dodo nị m gbasọnmẹ onyẹ Ẹtiopịa.” Kanị Jụabụ nọ sị a, “Nwa m, kịnị k'ị rị a chọnị n'ị jẹn? Ozi hụnnị ẹlẹ hụn w'e gi ye ịhịan ihiẹn.”

23
Ọ nọ sịzị Jụabụ, “K'ọrịlẹ, m chọ nị m gba ọsọnị.” Jụabụ nọ sị a, “Gba nwan!” Ahimaazị nọ gbajẹnmẹ, ghashi ụzọ alị-aradan ụsụọ Jọdanị, gbaghafe onyẹ Ẹtiopịa.

24
Defidi nọdị alị ẹgbata ọnụ-mgbọn hụn rị imẹ lẹ hụn rị azụụn ezi, onyẹ-nche nọ nyinrin d'a nọdị mmughẹ ụlọ-nche rị elu ọnụ-mgbọn hụ. O lee ẹnya, ọ nọ hụn okẹnnyẹ ohu ya sụọ gbala.

25
Onyẹ-nche hụ nọ kpọcheni eze, gwa a ihiẹn ọ hụn. Eze nọ sị, “Omẹni ịya sụọ wị, ya wụnị ozi rị mma rọ.” Okẹnnyẹ hụ gbalanị hụkwọ a gbazụnhan ọgbazụnhan-ọgbazụnhan.

26
Onyẹ-nche hụ nọ hụnzị onyẹ ọzọ ya sụọ gbala, ọ nọ kpọcheni hụn e che ọnụ-mgbọn, sị a, “Lee o, o nwọnzi onyẹ ọzọ ya sụọ gbala!” Eze a sị, “Ozi rị mma k'o welazịkwọ.”

27
Onyẹ-nche hụ nọ sị, “Hụn bu ụzọ gbakọ kẹ Ahimaazị nwa Zadọkụ.” Eze nọ sị, “Ezigbo ịhịan rọ. Ozi rị mma k'o wela.”

28
Ahimaazị nọ kpọcheni eze, sị, “Ihiẹn ile a rịgụọ mma!” Ọ nọ gbuni eze osekpu, sị, “Ịja-mma ya rịnị Osolobuẹ wụ Chuku i! O wegụọ ndị bunụmanị eze nwọnni m ye ẹ mẹri.”

29
Eze nọ jụ a, “Ndemẹ nwata hụ wụ Absalọm hụ mma?” Ahimaazị nọ sị, “Ihiẹn mẹ ya-ya-ya nị Jụabụ d'e zi odibo i onyẹ Ẹtiopịa lẹ mmẹ nwẹn wụ odibo i, kanị amarịn m ihiẹn ọ wụ.”

30
Eze nọ sị a, “Wuzo ụsụọ; cheri ebeni.” Ọ nọ shi ụsụọ, turu ebahụn.

31
Onyẹ Ẹtiopịa hụ nọ pụha, sị, “Eze nwọnni m, nụ ozi rị mma! Osolobuẹ a zụọpụhagụọ ị tannị ẹka ndị ile hụn bunụman'ị.”

32
Eze nọ jụ onyẹ Ẹtiopịa, “Ndemẹ nwata hụ wụ Absalọm hụ mma?” Onyẹ Ẹtiopịa nọ sị a, “Ndị-iṅẹnrẹn eze nwọnni m lẹ ndị ile rị a chọ a njọ, ihiẹn mẹ nwata hụ ya mẹ wẹ.”

33
Ihiẹn o ku nọ mẹhunmẹ eze. Ọ nọ nyinshi mmughẹ hụ rị elu ọnụmụzọ rị ọnụ-mgbọn, a kwan. K'o jẹnkọ, ọ hụ a sị, “Absalọm nwa m-ee! Euu, nwa m-ee! Absalọm nwa m-ee!! K'ọ rị m, mmẹ nwụnhụn, ẹlẹ ịyụ — Euu Absalọm; nwa m-ee! Nwa m-ee!”


Ika Bible Public Domain