Beblia

	Ika Bible Ẹbụ-ọma 106


Save Notes

1
Ja nị Osolobuẹ mma! Kpanmịn nị Osolobuẹ, makẹni ọ rịka mma; ihiẹn-ọsụsụọ a rị jẹnrin ejẹn!

2
Onyẹ k'a s'ẹka kugụ okẹn-ihiẹn ile Osolobuẹ mẹ? Onyẹ k'a s'ẹka kuchanrịn ihiẹn ile w'e gi ja a mma?!

3
Ngọzi wụ nke ndị ghalẹni e mẹgbu ịhịan, ndị e mẹsọnmẹ ihiẹn furuni.

4
Osolobuẹ, dodo nyanhan m ị gha e mẹni ndị nke i ọhụnma, dodo zụọpụha m ị gha a zụọpụha ndị nke i;

5
kẹni m hụn ebe ihiẹn nọ rịzịnị ndị ị họrị mma; kẹni m sọn ndị alị ị ghọghọ; kẹni m sọn ndị nke i nyan isi.

6
Ẹnyi lẹ ndị nẹdi ẹnyi wẹ e mẹgụọ njọ; ẹnyi e mẹgụọ ihiẹn rịlẹni mma; ẹnyi e mẹgụọ eje-ihiẹn.

7
Ndị nẹdi ẹnyi wẹ aghọtanị ọrụn-atụmẹnya ị kẹ wẹ rị Ijiptu; anyanhannị wẹ okẹn ihiẹn-ọsụsụọ i gi sọn wẹ, wẹ nọ nupụ isi okpuru i mkpẹnrẹn Ohimin hụ, mkpẹnrẹn Ohimin Ufie, nupụ isi okpuru Onyẹ hụn Kachanrịnnị.

8
Kanị ọ nọ gi ufiri ẹfan a zụọpụhakwọ wẹ, kẹni ọ ghọsị ikẹn ẹ:

9
ọ jụgbọ Ohimin Ufie, ọ tahị; o we wẹ fetu akpakalị Ohimin ahụn nọkẹ sị alị-ọkpọnkụn rị imẹ atụ rọ.

10
Ọ zụọpụha wẹ ẹka ndị rị e we iwe wẹ; ọ gbapụha wẹ ẹka eṅẹnrẹn.

11
Mirin ahụn e rukpumẹ ndị-iṅẹnrẹn wẹ, akpụ onyẹ ohu ahọdụnị.

12
Ndị nke ẹ nọ gi oku ẹ dọn, wẹ nọ bụn'a ẹbụ ọjịja-mma.

13
Kanị, a zọ wẹ ihiẹn o mẹ ozigbo; echerikọ wẹ nụ uche ẹ.

14
Ihiẹn-oriri nọ lagbu wẹ ẹnya imẹ atụ ahụn, wẹ nọ chọma ihiẹn rị Osolobuẹ ọnụ.

15
Ọ nọ ye wẹ ihiẹn ahụn wẹ chọ, kanị ọ tụ wẹ eje-emu e fie ịhịan ẹhụ.

16
Ọ hụ a fụ wẹ imẹ atụ ebẹhụ nị Mozizi lẹ onyẹ ahụn Osolobuẹ dọn nsọ wụ Ẹrọnụ rị a kị.

17
Alị nọ kpupụ, bu Datanị lue, o kpumẹ wẹ ile wẹ lẹ Abiram wị;

18
ọkụn e benwunrun imẹ wẹ, ọkụn a dụngbu ndị-njọ ahụn.

19
E ru wẹ ugu Horẹbụ, ndị Izrẹlụ a kpụrụ nwa-efin; e femẹ wẹ mmọn hụ wẹ kpụ.

20
E gi wẹ okẹn-efin e ri ẹfịfịa hụn wẹ kpụ nọkin ẹnya Osolobuẹ hụn wụ Ọghọ wẹ.

21
A zọ wẹ Chuku hụn a zụọpụhanị wẹ, onyẹ hụn mẹsọnmẹ okẹn ihiẹn imẹ alị Ijiptu;

22
onyẹ hụn rụn ọrụn-atụmẹnya ndị hụ imẹ alị ụmụ Ham hụ, rụn ihiẹn ndị hụ a tụ egun imẹ Ohimin Ufie!

23
Ya kẹ Osolobuẹ nọ sị n'o tikpọ wẹ; omẹni ẹlẹ hụn onyẹ ahụn ọ họrị wụ Mozizi wuzo ẹgbata ya lẹ uwẹ, rịọma a, amamgbe o gi olulu tikpọ wẹ, nkẹ o tikpọ wẹ.

24
Wẹ nọzị legberi alị ọma hụ Osolobuẹ wejẹnkọ wẹ, egini wẹ nkwa a dọn.

25
A nọ wẹ ọdụ wẹ dẹnnwịnwịnma, jụ nị emẹkọ wẹ ihiẹn Osolobuẹ ku.

26
Ya kẹ Osolobuẹ nọ kishi ẹka elu, kun enwẹn ẹ, sị o k'e mẹ wẹ nwụntọsọnmẹ imẹ atụ ahụn,

27
n'o k'e mẹ ụmụ wẹ nwụntọsọnmẹ alị ichẹn-ichẹn, feyịya ụmụ wẹ alị ndị ọzọ.

28
E wezighọ wẹ enwẹn wẹ kwanị mmọn wụ Baalụ alị Pioru, rimẹ anụ wẹ gi chụnyeni ndị-mmọn ẹjan.

29
Wẹ nọ gi ihiẹn ndị hụ wẹ rị e mẹ kpasu Osolobuẹ iwe, ọnwụn nọ gbumẹ wẹ.

30
Kanị Finẹhasị nọ lihi, mẹ ihiẹn olulu Osolobuẹ gi rọ, ọnwụn nọ gbubehi wẹ.

31
Ya kẹ Finẹhasị gi wụrụ onyẹ ezi-omumẹ ẹnya Osolobuẹ, gha agbọ pụ agbọ, jẹnrin ejẹn.

32
Wẹ nọzị gi oku mirin kpasu Osolobuẹ iwe imẹ Mẹriba, oku wẹ nọ sehẹni Mozizi eje-ihiẹn,

33
makẹni isi wẹ nnupụ fụru ẹ akpobi, ọ nọ kufie oku.

34
Egbuchanrịnnị wẹ ndị alị ichẹn-ichẹn kẹ Osolobuẹ dọn gwa wẹ.

35
Kama, e sọn wẹ alị ndị ahụn e mẹgbama, mụnarịn wẹ ihiẹn wẹ e mẹ.

36
E femẹ wẹ mmọn alị ndị ahụn, gi ẹ dan ọnyan.

37
E gi wẹ ụmụ wẹ ikẹnnyẹ lẹ ikpoho chụnmanị eje-mmọn ẹjan,

38
gbumẹ ụmụ wẹ ikẹnnyẹ lẹ ikpoho nwọnlẹni ihiẹn wẹ mẹ, e gi wẹ a chụnyeni mmọn ẹjan mmọn ndị rị alị Kenaanị; ẹdeke ndị ahụn ile wẹ gbu nọ mẹrụ alị.

39
E mẹrụchanrịn wẹ enwẹn wẹ yeni ihiẹn ndị hụ wẹ rị e mẹ, gi ẹ họnrin ịgbaraja ẹnya Osolobuẹ.

40
Ya kẹ Osolobuẹ nọ gi olulu sọn ndị nke ẹ, ize ndị nke ẹ nọ zemẹ ẹ;

41
o bu wẹ che ẹka alị ndị ọzọ, ndị rị e we iwe wẹ nọ kịma wẹ.

42
Ndị-iṅẹnrẹn wẹ nọ kịgbumẹ wẹ, bu wẹ che okpuru.

43
Imẹrinmẹ ogẹn kẹ Osolobuẹ gbapụha wẹ, kanị a tọ wẹ e nupụ isi ebe wẹ rị e ro nke wẹ, d'e ru ni njọ wẹ e budan wẹ.

44
Kanị, ọ tọ a tụnị wẹ ụya ogẹn nsọngbu, ọ nụ arịrịọ wẹ.

45
O gi ufiri wẹ a nyanhan nkwa a, e mẹni wẹ omikẹn, yeni okẹn ihiẹn-ọsụsụọ a.

46
Ọ nị omikẹn wẹ e mẹ ndị ile gini wẹ.

47
Osolobuẹ Chuku ẹnyi, dodo zụọpụha ẹnyi dodo wepụha ẹnyi alị ndị gisọnmẹni ẹnyi, kẹni ẹnyi kpanmịn ẹfan nsọ ị, a ja ị mma, e gi ẹ a dụ ẹka obi.

48
Ịja-mma ya rịnị Osolobuẹ wụ Chuku Izrẹlụ ya rịn'a jẹnrin ejẹn, jẹnrin ejẹn! Ịhịan ile wẹ sị, “Isẹẹ!” Ja nị Osolobuẹ mma!


Ika Bible Public Domain