Beblia

	Ika Bible Hosia 2


Save Notes

1
“Ogẹn ahụn, ụnụ k'a rị a kpọ umunẹ ụnụ ikẹnnyẹ ‘Ami’ ya wụ onyẹ nke Osolobuẹ; a kpọ umunẹ ụnụ ikpoho ‘Ruhama,’ ya wụ ‘onyẹ wẹ mẹni omikẹn.’

2
“Ụmụ m, gwakwọ nị nnẹ ụnụ Izrẹlụ-o! Ẹlẹzidẹ nwan nwunyẹ m; ẹlẹzi m di ẹ! Rịọkwọ n'a n'o bu ẹnya che ụzọ ohu, rebehi ẹhụ a!

3
Amamgbe m'a gba a ọtọ, e lee wẹ ọtọ a nọkẹ ụhụọhịn wẹ mụ a; e mẹ m'a gba okpokoro, gi ẹ họnrin alị ọkpọ-nkụn, gi ẹgụn mirin gbu ẹ!

4
Emẹkọ m omikẹn ụmụ a, makẹni ụmụ wẹ mụ ogbe kẹ wẹ wụ.

5
Nnẹ wẹ a gbaọlẹ ịgbaraja; nnẹ mụnị wẹ e mẹọlẹ ihiẹn ifẹnrẹn — o gi sị enwẹn ẹ, ‘M k'a gbasọnmẹ ndị mmẹ lẹ wẹ rị a sụọ, uwẹ e ye m ihiẹn m'e ri lẹ mirin m'a ra lẹ oruru lẹ ẹṅẹnrẹn-anụ m gi a kpa ẹwuru; uwẹ e ye m ofigbọn lẹ udẹn, e ye m manya m'a ra.

6
M k'e gi ogun kehunmẹ ẹ; m k'a gbahunmẹ ẹ ụgba ọ hụnkọzị ụzọ gha.’

7
O k'a gbasọn ndị ya lẹ wẹ rị a sụọ, kanị o kunrunkọ wẹ; ọ k'a chọ wẹ, kanị ọ hụnkọ wẹ; ẹnya e fọn ẹ, ọ sị, ‘M k'a laburu di m ibuzọ m — nị ogẹn ahụn mmẹ lẹ ịya kẹ ihiẹn ka mma.’

8
Izrẹlụ e gin'ẹ dọn nị mmẹ y'ẹ ọka, lẹ manya-ọhụn lẹ ofigbọn-olivu yezi ẹ goru lẹ siliva ahụn o gi rụa Baalụ.

9
Ufiri ẹ, ogẹn ọka ru, a napụ m wẹ ọka m; ogẹn manya-ọhụn ru, a napụ m wẹ manya ọhụn m — a napụzị m wẹ ẹṅẹnrẹn atụnrụn lẹ oruru m hụn m ye wẹ gi kparị ẹkwa kpumẹ ọtọ wẹ.

10
“M k'a gba a nwan ọtọ ihun ndị ya lẹ wẹ rị a sụọ, onwọnni onyẹ k'a gbapụha a ẹka m.

11
M k'a kụsị mmẹmmẹ wẹ ile: kẹ ndị wẹ e mẹ ahụa-ahụa, kẹ hụn Ifọn gi pụ kẹ Ụhụọhịn Ezumikẹn, mmẹmmẹ-ofufe ile wẹ tumẹni wẹ.

12
M k'e wiwipụ vaịnị lẹ figi wẹ kụn, hụn wẹ rị a sị nị ya kẹ ndị wẹ gbasọn gi kụ wẹ ụgwọ. M k'e gi alị vaịnị lẹ figi ndị ahụn ile họnrin ẹgboko, anụ-ọfịa e bu wẹ ile ri.

13
M k'e ye ẹ afụnfụn ọrọgbọ ile hụ o gi mụnị Baalụ ichẹn-ichẹn nsẹnsi; o gi rị e yi ihiẹn-ntịn a lẹ ihiẹn-mma a, a gbasọn ndị ya lẹ wẹ rị a sụọ — zọ mmẹ nwẹn. Osolobuẹ e kụgụọ a.

14
“M k'a rẹrẹrị a, we ẹ shi imẹ atụ ịhịan rịlẹni, gi ọnụ-ọma gwa a oku.

15
A nọ m ebẹhụ sị a d'e werizi alị-vaịnị a; e mẹ m Ọdanmgbugbu Nsọngbu họnrin ọnụmụzọ ihiẹn rị mma. Ọ nọ ebẹhụ mẹzi k'o mẹ mbụ, ogẹn o gi rị nwagbọọ ogẹn o gi gha alị Ijiptu pụha.

16
Osolobuẹ sị, ogẹn ahụn, ‘Di m’ kẹ Izrẹlụ k'a rị a kpọ m, ẹlẹzi ‘Di-nwọnni-m’ ẹfan Baalụ.

17
M k'e wepụ ẹfan Baalụ ndị ahụn ọnụ wẹ, akpọkọzị wẹ ẹfan wẹ.

18
“M k'e tini anụ-ọfịa lẹ nnụnụ iwu tini ihiẹn ndị a rịnị iwu, makẹ wẹ gha a rụ wẹ ẹhụ. M k'e wepụ ụta lẹ ọpịa-agha alịnị ịhịan ile e biri udọn-lẹ-ndọnkwa.

19
E mẹ m'i wụrụ nwunyẹ m jẹnrin ejẹn ghahanị ezi-omumẹ lẹ imẹ ihiẹn furuni ghahanị ihiẹn-ọsụsụọ lẹ omikẹn.

20
M k'e mẹ i wụrụ nwunyẹ m, gi mẹzu nkwa m; yụ nwẹn k'e kweyeni Osolobuẹ.

21
O ru ogẹn ahụn, m k'a za: m k'a za igwere oku, igwere e gi mirin za alị,

22
alị a za ọka lẹ mkpụrụ-osisi e ye manya lẹ ofigbọn-olivu, ihiẹn-oriri a za Jezriẹlụ, ‘ndị Osolobuẹ kụn.’

23
“M k'a kụnye Izrẹlụ alịnị kẹ ihiẹn m, e mẹni m ‘Omikẹn-arịa’ omikẹn ọsụọn'a nị m kpọ a ‘Omikẹn-arịa’; m k'a sị ndị nwẹn w'a kpọ ‘Ẹlẹ wẹ ndị nke m,’ ‘ndị nke m kẹ ụnụ wụ,’ a sị wẹ m, ‘Ịyụ wụ Chuku ẹnyi.’ ”


Ika Bible Public Domain