Beblia

	Iu Mien Bible 2007 Cong-Mengh Waac 23


Save Notes

1
Meih caux zoux hlo nyei mienh juangc dieh nyanc hnaangx, oix zuqc samx longx haaix nyungc yiem meih nyei nza'hmien.

2
Se gorngv meih zoux mauv nyanc nyei mienh, oix zuqc zorqv nzuqc zaeng jienv ganh nyei jaang-ndiev.

3
Maiv dungx mauv nyanc ninh kuv haic nyei ga'naaiv, weic zuqc se nduov mienh nyei lai-hnaangx.

4
Maiv dungx laauh luic weic lorz zinh zoih, oix zuqc maaih cong-mengh gaux haih dingh njiec.

5
Meih kungx bungx m'zing mangc maiv lamh longc nyei zinh zoih fai? Weic zuqc zinh zoih liemh zeih hnangv cuotv ndaatv, yaac hnangv domh jaangv nor, ndaix faaux lungh.

6
Maiv dungx nyanc mienh njapv mienh nyei lai-hnaangx, yaac maiv dungx mauv ninh kuv nyei ga'naaiv.

7
Weic zuqc ninh se hnangv dauh yiem hnyouv gu'nyuoz saauv jienv nyei mienh. Ninh heuc meih, “Gunv nyanc gunv hopv,” mv baac ninh nyei hnyouv maiv hnangv naaic.

8
Meih nyanc liuz wuov deix diqv dien lai-hnaangx zungv zuqc lov cuotv, meih gorngv nyei waac-longx yaac ndortv mi'aqv.

9
Maiv dungx gorngv waac bun mienh hngongx mienh muangx, weic zuqc ninh oix mangc piex meih nyei cong-mengh waac.

10
Maiv dungx suiv loz-hnoi deic-jaaix nyei dongc, fai zorqv guh hanh fu'jueiv nyei lingh deic,

11
weic zuqc Zuoqc Ninh Mbuo Wuov Dauh Ziouv se henv haic. Ninh mbuo gox meih, Ziouv oix tengx ninh mbuo caengx sic.

12
Oix zuqc longc hnyouv muangx mienh njaaux, baeng m'normh muangx wuonh zaang nyei waac.

13
Meih oix zuqc mborqv njaaux fu'jueiv, maiv dungx guangc. Meih longc biaav fitv ninh, ninh maiv daic.

14
Se gorngv meih longc biaav fitv, meih ziouc tengx njoux ninh nyei maengc maiv zuqc mingh yiem yiemh gen.

15
Yie nyei dorn aah! Se gorngv meih nyei hnyouv maaih cong-mengh, yie nyei hnyouv yaac a'hneiv.

16
Se gorngv meih nyei nzuih gorngv zien nyei waac, yie nyei hnyouv ziouc orn-lorqc haic.

17
Maiv dungx maaih hnyouv mueic jieqv zuiz-mienh, oix zuqc hnoi-hnoi taaih Ziouv.

18
Hnangv naaic meih nqa'haav hingv nyei jauv ndongc haaix zungv maaih lamh hnamv nyei, yaac maiv zuqc jamv guangc.

19
Yie nyei dorn aah! Meih oix zuqc muangx yaac oix zuqc maaih cong-mengh, aengx bun meih nyei hnyouv mingh wuov diuh jauv.

20
Maiv dungx caux hengx hopv a'ngunc diuv fai mauv nyanc orv nyei mienh yiem,

21
weic zuqc mauv nyanc hopv nquin nyei mienh oix jomc. Mauv m'njormh nyei mienh ziouc zuqv lui-houx-huv.

22
Meih nyei die bun meih maaih maengc, meih oix zuqc muangx ninh. Meih nyei maa gox daaih, maiv dungx mangc piex.

23
Oix zuqc maaiz zien leiz yaac maiv dungx maaic. Oix zuqc maaiz cong-mengh, njaaux nyei waac caux wuonh zaang.

24
Kuv mienh nyei die za'gengh! orn-lorqc haic. Haaix dauh duqv cong-mengh nyei dorn oix weic ninh a'hneiv.

25
Oix zuqc bun meih nyei diex maac a'hneiv, bun meih nyei maa nyorx orn-lorqc.

26
Yie nyei dorn aac, longc hnyouv muangx yie, bun meih nyei m'zing mangc yie nyei jauv,

27
weic zuqc maaic sin nyei m'sieqv dorn se hnangv ndo haic nyei kuotv, buangh liouh nyei m'sieqv dorn hnangv hepc nyei wuom-kuotv.

28
Ninh mei jienv zuov hnangv janx-zaqc, yaac yiem baamh mienh mbu'ndongx bun maiv ziepc zuoqv nyei mienh camv jienv faaux.

29
Haaix dauh maaih kuonx naanh? Haaix dauh maaih you-nzauh? Haaix dauh maaih nzaeng jaax nyei sic? Haaix dauh maaih la'ngopv nyei jauv? Haaix dauh zuqc mun yaac maiv maaih gorn-baengx? Haaix dauh m'zing siqv?

30
Se dongh liouh linh hopv a'ngunc diuv caux mingh seix hopv peux daaih nyei diuv wuov deix mienh.

31
Maiv dungx mangc a'ngunc diuv-siqv yiem gu'nyuoz zaanv aengv njang, hopv njiec se mbiaangc nyei.

32
Setv mueiz naaiv nyungc diuv doqc haic hnangv naang-doqc nyorqv nor, yaac hoic hnangv naang-jieqv nyorqv.

33
Meih nyei m'zing ziouc buatc guv guaix nyei sic. Meih nyei hnyouv yaac lunc, gorngv buv longh buv dangv nyei waac.

34
Meih ziouc hnangv bueix jienv koiv gu'nyuoz nyei mienh, yaac hnangv bueix jienv corng ndie-mbuangh nyei ndiouh gu'nguaaic.

35
Meih ziouc gorngv, “Mienh mborqv yie mv baac yie maiv mun. Ninh mbuo qaqv mborqv yie, yie yaac maiv haiz fungc. Yie haaix zanc cingx nyie? Yie aengx mingh lorz diuv hopv.”


ฉบับอักษรโรมันใหม่ Iu-Mien New 2007 ฉบับอักษรโรมันใหม่ © Thailand Bible Society, 2007