Beblia

	Kachin JCLB Bible 2009 SHAKAWN KUNGDAWN 106


Save Notes

1
Dai Madu hpe shakawn nga mu! Shi mai kaja nga ai majaw, dai Madu hpe chyeju dum mu; shi a tsaw ra myit mung htani htana prat ting agrin nga ai.

2
Shi galaw dan sai mauhpa magam amu ni yawng hpe kadai wa tsun hkai dan lu nga a ta? Shi a hpung shingkang arawng sadang nga manga hte hpe kadai wa shakawn lu nga a ta?

3
Shi a hkang da ai ga ni hpe madat mara hkan nang nga nna, ding man ai amu hpe tut nawng e, galaw nga ai ni gaw a nga ai.

4
Madu e, na a amyu masha ni hpe nang karum ndai shaloi, ngai hpe mung dum nga et; shanhte hpe nang hkye hkrang la ai shaloi, ngai hpe mung shalawm la et.

5
Na a amyu masha ni a ngamu ngamai ai lam hpe mung, na a amyu baw a kabu gara ai lam hpe mung, nang madu da ai amyu masha ni a kabu gumrawng ai lam hpe mung ngai hpe mu mada shangun e law.

6
Anhte gaw anhte a kaji kawa ni galaw lai wa sai zawn yubak galaw kau saga ai; shing rai, anhte gaw tara n lang ai ni hte n hkru n shawp ai ni tai mat nga saga ai.

7
Egutu mung hta shanu nga ai anhte a kaji kawa ni gaw Karai Kasang a mauhpa magam amu ni hpe n chye na kau mu ai; shanhte hpe law law lang shi madun dan sai shi a tsaw ra myit hpe shanhte malap kau nna, shanhte gaw, dai Chyahtum Chyalai n-gun rawng ai Madu hpe pyi, dai Nawng Hkyen e gumlau ma ai.

8
Rai ti mung, shi gaw shi a galu kaba ai daru magam n-gun hpe madun dan na matu, ga sadi tawn da sai hte maren, shanhte hpe hkye hkrang la nu ai.

9
Shi Nawng Hkyeng hpe hkang dat ai hte dai gaw hkyet mat nga ai; shing rai, shi a amyu masha ni hpe hkun hkraw nga ai ga ntsa hku woi rap mat wa nu ai.

10
Shi gaw n ju n dawng ai ni a lata na shanhte hpe mawai la nu ai, shanhte a hpyen ni kaw na shi shanhte hpe hkye la nu ai.

11
Rai ti mung, shanhte a gumlau hpyen ni mung hka hta lup si mat nna; langai mi mung n lawt lu nga masai.

12
Dai hpang, shi a amyu masha ni shi tawn da sai ga sadi ni hpe kam sham wa nna; Madu hpe mahkawn shakawn nga ma ai.

13
Rai ti mung, shanhte gaw shi galaw dan sai amu ni hpe alawan malap kau ya mu ai hte; shi a hpaji jaw ai lam ni hpe n la nga ai sha, galaw kau manu ai.

14
Nam mali kata e, shanhte ra marit nga ai lam hpring nga sai hte; Karai Kasang hpe chyam yu mu ai.

15
Dai majaw shanhte hpyi ai lam, shanhte hpe shi jahkrat ya ti mung, shanhte hpe hkrithpa ana ahkya mung, jahkrat ya nu ai.

16
Shanhte gaw dai nam mali kata hkan e, Mawshe hte Madu a chyoi pra ai shangun ma kaja Arun yan hpe yu manawn nga masai.

17
Dai shaloi, lamu ga gaw ga mahka wa nna, Dahtan hpe mayu kau wu ai; Abiram hte shi a dinghku masha ni hpe mung kaput kau wu ai.

18
Shanhte a hpang hkan nang ai ni a ntsa e, wan nan hkrat wa nna; tara n lang ai masha ni hpe hkru jahkat kau mu ai.

19
Shanhte gaw Sina e, ja dumsu kasha sumla galaw nna dai hpe nawku nga ma ai.

20
Shanhte gaw Karai Kasang a hpung shingkang hpe tsingdu sha ai dusat a sumla hte galai kau mu ai.

21
Egutu mung hta shi a mauhpa magam amu ni hte shanhte hpe hkye hkrang da ai Karai Kasang hpe shanhte malap kau mu ai.

22
Dai mung hta shi galaw dan sai amu ni gaw kaning re ai mauhpa wa rai nga a hka! Nawng hkyeng hta shi galaw dan sai magam amu ni gaw kaning re ai mauhpa wa rai nga a hka!

23
Shi gaw shi a amyu masha ni hpe jahten kau na nga, Karai Kasang tsun wu ai shaloi, shi lata la ai shangun ma kaja Mawshe gaw shi a man e, rawt tsap nna, shanhte hpe n shamyit kau u ga, shi a masin kahtet ai hpe shakawp ya wu ai.

24
Shaloi, shanhte Karai Kasang a ga sadi hpe n kam mat ma ai majaw, pyaw ai mungdan de shang sha na, shanhte ningdang kau mu ai.

25
Shanhte gaw shanhte a sum ni hta nga nga nna aput angun nga ma ai; Madu a hkang da ai ga ni hpe mung n kam madat nga masai.

26
Dai re ai majaw, Madu shanhte hpe nam mali kata e, si jahtum kau shangun na wu ai majaw mung,

27
shanhte a aru arat ni hpe n kam n sham ai ni a mungdan hkan e, shabra kau na wu ai majaw mung, maigan mungdan hkan e, si mat shangun na lam ni a majaw mung, dagam dala ga hte shanhte hpe sadi jaw wu ai.

28
Dai hpang, Karai Kasang a masha ni Bala hpara hpe Peura shara hta nawku daw jau nga ma ai; hpara chyasi ni hpe nawng jau ai hkungga shan ni hpe mung sha nga ma ai.

29
Shanhte gaw shanhte galaw ai amu ni hte Madu a sindawng kahtet ai hpe jasu shalut ya nga ma ai majaw, hkrithpa ana zinli mung, shanhte hta byin pru wa nga masai.

30
Rai ti mung, Hpineha rawt tsap ai hte mara kap ai ni hpe ari jaw kau wu ai majaw, ana zinli hkoi mat wa nga sai.

31
Dai Hpineha galaw ai akyu hpe dai ni du hkra tut nawng e, myit adum nga ma ai; dai hpe prat mi hte prat mi adum nga na mara ai.

32
Amyu masha ni gaw Meriba hka hpawk hta e, dai Madu hpe pawt sindawng shangun mu ai; shanhte galaw shapraw ai arawn alai a majaw, Mawshe mung ru yak tsin-yam hkrum nu ai.

33
Shanhte gaw Mawshe hpe ahkup ahka nga hkra, myit machyi shangun mu ai majaw, shi n myit yu ai sha, ga shaga kau nu ai.

34
Shanhte gaw maigan amyu masha ni hpe sat shamyit kau na matu, Madu shanhte hpe hkang da sai ga hpe n hkan shatup ai sha n ga,

35
maigan amyu masha ni hte shanhte dinghku de ma ai hte maigan htung tara ni hpe shanhte hkap la nga mu ai.

36
Karai Kasang a amyu masha ni gaw hpara sumla ni hpe nawku daw jau mu ai, dai gaw shanhte byak ai lam hpe shabyin ya nga sai.

37
Shanhte gaw shanhte a shayi shadang sha ni hpe shagu hkungga hku nna; Hkanan hpara sumla ni hpe nawng ya mu ai.

38
Shanhte gaw mara n kap ai kashu kasha ni hpe sat nawng ma ai; mungdan gaw masha sat amu galaw ai ni a majaw awu asin rai mat sai.

39
Shanhte galaw ai amu ni hte shanhte hkum hpe awu asin di kau nna; Karai Kasang hta sadi sahka myit n dung mat nga masai.

40
Shing rai, Madu gaw shi a amyu masha ni hpe pawt sindawng nga nna; shanhte hpe shi matsat kau wu ai.

41
Shi shanhte hpe masha amyu baw ni a n-gun atsam de ap kau nna; shanhte a gumlau hpyen ni shanhte hpe up hkang nga ma ai.

42
Shanhte gaw shanhte a gumlau hpyen ni a dip gamyet zingri ai hpe hkrum sha nga ma ai; gumlau hpyen ni a npu hta tsep kawp shanhte taw nga ma ai.

43
Madu gaw law law lang, shi a amyu masha ni hpe mawai la nga ai; shanhte shi hpe gumlau na lam, lata la nga ma ai majaw, yubak nawng de grau nna lup shang mat wa masai.

44
Ti mung, shanhte hpyi jahtau ai shaloi, Madu na ya wu ai; shanhte a myit ru myit tsang ai lam hpe shi dum ya mu ai.

45
Shi gaw shanhte a akyu a matu, shi a ga shaka hpe dum ya wu ai; shi a kaba la ai tsaw ra myit a jaw e, shi a pawt sindawng ai myit hpe shakawp kau wu ai.

46
Shanhte hpe zingri zingrat nga ai ni yawng a myit masin kraw lawang kata hta; shanhte hpe yu matsan dum la shangun mu ai.

47
Anhte a Madu, Karai Kasang e, anhte hpe hkye hkrang la mi; Masha amyu ni a kata kaw nna anhte hpe woi nhtang wa mi. Shing rai, na a chyoi pra ai mying nsang hpe shakawn nna, anhte nang hpe chyeju dum shakawn nga na ga ai.

48
Dai Madu Israela a Karai Kasang, hpe shakawn nga mu! Shi hpe ya kaw nna, htani htana shakawn kungdawn nga mu! Masha hkum shagu, “Amen” ngu nna tsun nga mu ga law! Dai Madu hpe shakawn mu!


Kachin Jinghpaw Bible 2009 Jinghpaw Common Language Bible © Bible Society of Myanmar, 2009