Beblia

	Kachin JCLB Bible 2009 GA SHAGAWP 17


Save Notes

1
Myit sim myit sa hte muk jahkraw n-gup mi sha lu ai gaw ru yak tsin-yam hte hpring ai nta na lusha poi kaba hta shang lawm ai hta grau nna kaja nga ai.

2
Myit let ai shangun ma gaw madu a manu n dan ai kasha a ntsa e, up hkang lu na ahkaw ahkang hpe hkam la lu nna, sali wunli daw chyen mi hpe mung, hkam la lu na ra ai.

3
Aja hte gumhpraw hpe wan hta ju nna jen yu ai zawn, dai Madu gaw masha a myit masin hpe mung, chyam dinglik yu nga ai.

4
N hkru ai masha ni gaw n shawp n kap ai myit masa lam ni hpe madat nga nna; masu magaw ai masha ni gaw masu ga ni hpe madat nga ma ai.

5
Matsan mayan masha ni hpe nang asawng asang di ai rai yang, shanhte hpe hpan da ai Karai Kasang hpe nang n kaw n law di nga ndai; masha wa a ru yak tsin-yam hpe nang yu kabu ai rai yang, nang ari hkrum sha na rin dai.

6
Shadang sha ni gaw kawa ni a majaw, asak kaba ugut gu sai ni gaw shanhte a kashu ni a majaw gumrawng nga ma ai.

7
Hkungga hkrum sai masha ni gaw masu magaw ga n tsun nga ma ai; angawk ai ni chyawm gaw manu dan ai ga hpe tsun na, hpa mung n lu nga ai.

8
Mayun kumhpa la ai amu gaw lawng mandan hpaji zawn lawan ai hku amu shabyin ya lu nga ai nga nna masha nkau mi myit la nga ma ai; dai gaw kaning re ai lam hpe rai tim, shabyin ya lu nga nna, shanhte dai hpe kam nga ma ai.

9
Masha ni nang hpe ra sharawng na, nang ra marit ai rai yang, shanhte nang hpe shut hpyit ai shaloi, shanhte hpe mara dat ya u; Mara matsing da ai gaw jinghku jingyu ni hpe daw hka kau shangun nga ai.

10
Zai byeng-ya rawng ai masha wa, kalang mi daru hkrum ai kaw na sharin la ai gaw, angawk ai wa shingna lasik latsa lang kayat hkrum sha nna sharin la ai hta grau nga ai.

11
Galoi mung ruyak tsin-yam hpe shalut kabrawng nga ai tara n lang ai wa kaw si du gaw mazut ai kasa langai mi zawn du na ra ai.

12
Angawk ai magam bungli hpe galaw nga ai masha angawk langai mi hte hkrum na hta, kasha shamat kau ai tsap kanu hte hkrum na gaw grau mai kaja nga ai.

13
Kaja ai a malai, n kaja ai hpe nang htang jaw ai rai yang, n kaja ai gaw na a nta kaw nna galoi mung shapraw kau lu na n rai.

14
Dangrang ai a npawt gaw dim da ai namhpai hta kachyi mi sharut gyi ai zawn rai nga ai; dangrang ai lam garai n sawng yang jahkring da u.

15
Tara n lang ai wa hpe mara shalawt dat ai mung, mara n kap ai wa hpe daw dan ai mung, dai Madu n dawng nga ai.

16
Angawk ai wa a matu gumhpraw jai nna hpaji tam na gaw hpa akyu n nga nga ai, hpa majaw nga yang, shi hta chye chyang ai nyan n rawng nga ai majaw rai nga ai.

17
Jinghku ni gaw tut nawng e, shanhte a tsaw ra myit hpe madun dan nga ma ai; ru yak tsin-yam hpe n chye garan hkam la ai rai yang, kaning re ai hpu nau ni daw hkat nga ga ta?

18
Nyan tang ai masha wa chyu sha, langai wa a hka ni hpe pahkam hkam ya chye nga ai.

19
Yubak hpe ra marit ai gaw ru yak shoihpa galaw na hpe ra marit ai rai nga ai; aten tup nang dangrang shakawng ai wa rai yang, nang gaw ru yak shoihpa hpe hpyi sha nga ndai.

20
Kadai rai tim, myit yu ngut ai hpang, n hkru ai hku tsun shaga ai wa gaw mai kaja ai lam mu tam na matu, hpa mung myit mada lu ai n rai; rai ti mung, tsin-yam tsindam hpe chyu sha mu tam la nga ai.

21
N hkru n kaja ai amu hpe galaw shapraw ai kasha gaw kawa a matu, myit ru hpa hte yawn hpa shara hta lai nna, kaga hpa mung n nga nga sai.

22
Kabu gara ai gaw nang hpe hkam kaja shangun nga ai, aten tup myi man muk muk rai nga ai wa gaw angwi sha si wa ai lam rai nga ai.

23
Gumhpraw marin ai tara agyi ni gaw mayun kumhpa hpe la sha ai majaw; tara malang ai amu hpe n galaw ya nga ma ai.

24
Zai byeng-ya rawng ai masha gaw shamu shamawt lam hpe hpaji rawng ai hku yu shading nga ti mung angawk ai wa chyawm gaw man ang ai de rawt sa wa nga ai.

25
Angawk ai shadang sha gaw kawa hpang de yawn hkyen ai lam hpe gun sa nna; ladu lai yawn hkyen lam hpe kanu hpang de la wa nga ai.

26
Mara n kap ai masha wa hpe shawa sha na, lam n jaw nga ai myit malang ai masha ni daw dan ari jaw hkrum ai shaloi, teng man ai tara lam yit mat nga ai.

27
Tinang kadai rai nga ai hpe chye na ai wa gaw aten shagu hta ga n shaga nga ai; atsin sha nga ai wa gaw myit kraw hpaji hpe teng teng lu la nga ai.

28
Kaja wa tsun ga nga yang, angawk ai masha wa pyi gaw shi a n-gup pat da nna atsin sha nga ai rai yang, hpaji rawng ai wa hpe zawn, nawn chye nga ai.


Kachin Jinghpaw Bible 2009 Jinghpaw Common Language Bible © Bible Society of Myanmar, 2009