Beblia

	Kachin JCLB Bible 2009 GA SHAGAWP 23


Save Notes

1
Ahkyak ai masha wa hte rau dung nna lu sha sha yang, shi kadai rai nga ai hpe, na a myit masin hta dum nga u.

2
Nang sha mu ai rai yang, na hkum nang shadawn sharam galaw u.

3
Shi daw jau ai dwi sau mu mai ai lusha hpe hkum marin nga et, shi gaw nang hpe zai hku nna maw mawn nga nhten!

4
Sutsu wa lu hkra, na hkum nang hki si ba si hkum galaw et, dai hta hpaji rawng nga u.

5
Na a ja gumhpraw gaw singkaw tu wa ai zawn rai nna, galang zawn pyen mat wa na ra ai.

6
Maji ai masha wa a sha ku ntsa na lusha hpe hkum hta sha et; shi daw jau ai dwi sau mu mai ai lusha hpe hkum marin nga et.

7
Shi gaw, “Sa rit, lu ga, sha ga, jat sha ga,” nga nna tsun ti mung, shi gaw dai hku myit rawng ai n rai, shi kraw e myit ai hte maren shi rai nga ai.

8
Nang sha bang dat ai lusha hpe nang madawn shapraw kau na ra ai hte na a abawk ai ga mung lahpawt lama rai mat na ra ai.

9
Angawk ai wa hpe lachyum sung ai ga, tsun dan na hkum shakut et; shi gaw dai hpe manu chye shadan lu ai n rai.

10
Moi moi na madu da lu sai masat shadaw hpe galoi mung hkum sit kau et; jahkrai ma ni madu da lu sai lamu ga hpe, hkum la kau ya et.

11
Dai Madu gaw shanhte a matu daru magam n-gun hte hpring nga nna makawp maga ai wa rai nga ai Shi gaw shanhte a amu hpe nanhte hte shai ai hku dara ya na ra ai.

12
Na sara wa a ga hpe madat u, shing rai nang sharin hkam la na lam yawng mayawng hpe dang lu ai made sharin la u.

13
Ma kaji hpe hkang sharin na matu, hkum kanung nga et; kaja ai hku gayat sharin ai lam gaw shi hpe si shangun lu nga ai n rai.

14
Dai gaw kaja wa, shi a asak hpe hkye hkrang la na ra ai.

15
Sha e, nang hpaji rawng ai wa tai yang, ngai grai kabu gara na nngai.

16
Nang tsun shaga ai hpaji ga hpe ngai na lu yang, ngai gumrawng lu na nngai.

17
Yubak kap ai masha ni hpe hkum manawn et; Dai Madu hpe na a asak prat tup hkrit kamyin nga u.

18
Dai rai yang, na a shawng lam grai awng dang na ra ai.

19
Ngai sha e, nye a ga hpe madat nna hpaji rawng nga u; nang asak hkrung ai lam hpe sung sung myit yu u.

20
Sabyi ntsin lu lai ai ni hte lusha marim ai ni hte hkum kanawn et.

21
Tsa chyaru nang ai ni hte nakru kinru ai ni gaw matsan chyaren re mat na mara ai. Nang galaw ai lam yawng hta yup ai hte sha ai rai yang, loi hkring mi rai yang, tsupni hpun ai nang hkrum na rin dai.

22
Na nwa a ga hpe madat mara u, shi a majaw n rai yang, nang nga pra lu na n rai; asak kaba sai na nnu hpe shareng hkungga ai lam madun dan u.

23
Teng man ai, hpaji byeng-ya sharin achyin ai hte chye chyang ai ni hpe manu jahpu jaw nna mari la ging nga ai rai tim, dai gaw manu nau dan ai majaw dut kau na lahpawt lama kaba rai nga ai.

24
Ding hpring ai wa a kawa gaw kabu gara lu na matu, ging dan nga ai; hpaji rawng ai kasha hta nang gumrawng lu na ra ai.

25
Na nnu yan nwa nang hta kabu gumrawng lu mu ga; na nnu hpe kabu gara lam jaw ya u.

26
Sha e, atsawm sha madat la u; nye a asak hkrun lam gaw na a matu kasi tai shangun u.

27
Shawa num ni hte nse nsa ai num ni gaw si shangun lu ai mahkam rai nga ai.

28
Shanhte gaw damya ni zawn nang hpe mayun ala nga nna la law law hpe sadi n dung shangun kau nga ma ai.

29
Hkyeng hkyeng rai nhtawm gawm hta kabrim kabram rai nga ai hte lu pyaw na nsan ai sabyi ntsin rai tim pyi, dai gaw nang hpe hkum gunglau jahten shangun et.

30
Hpang jahpawt du jang, atuk rawng ai lapu e achye kau ai zawn nang hkam sha na ra ai.

31
Hkrit hpa sumla gaw na a myi hta dan pru wa nna dai hpe nang asan sha n chye myit la ai hte n chye tsun dan na rin dai.

32
Nang gaw nammukdara ntsa kaw hka leng e kanawng adawt shatsang hkrum nna tsaw dat nem dat rai nga ai sanghpaw li a sumpan shadaw ntsa e sanghpaw nang let noi goiwat taw nga ai wa zawn, hkam sha na ra ai.

33
Nang gaw, “Ngai adup anut hkrum sam ni ai, ngai kayat ahpat ai hkrum ti mung, dai hpe ngai n dum nngai. Ngai hpa majaw n lu hprang ai kun? Ngai bai jat lu ra nga nngai,” nga nna nang tsun na ra ai.


Kachin Jinghpaw Bible 2009 Jinghpaw Common Language Bible © Bible Society of Myanmar, 2009