Beblia

	Kachin JCLB Bible 2009 EZEKELA 13


Save Notes

1
Dai Madu gaw ngai hpe ga shaga nga ai.

2
Shi gaw, “Si chye ai masha wa e, shanhte a myit ra hku htoi ai Israela a myihtoi ni hpe jahpoi kau u. Shanhte hpe dai Madu a ga madat mara na matu htawn tsun u,” ngu nna tsun wu ai.

3
Ndai gaw Tsaw Htum ai dai Madu tsun ai ga rai nga ai: “Ndai angawk angak re ai myihtoi ni gaw ari ahpri hkrum na mara ai! Shanhte gaw tinang a wenyi myit ra ai hku pau tsun ai hte shanhte a myit shingran ni hpe gyin shalat nga ma ai.

4
Israela amyu masha ni e, nanhte a myihtoi ni gaw hten run mat nna katsi katsang rai nga ai mare hta brak hkawm nga ai nam gwi ni zawn akyu n rawng nga ma ai.

5
Dai Madu a nhtoi shani, hpyen majan du wa ai shaloi, shanhte gaw daw agrawp mat sai mare bunghku ni hpe n sin ma ai. Shanhte gaw mare bunghku ni hpe bai gaw gap da ma ai n rai, dai lam ni a majaw Israela gaw makawp maga hkrum lu na ra ai n rai.

6
Shanhte mu ai myit shingran ni gaw n teng n man nga ai; shanhte a myihtoi ga ni mung masu magaw ga ni sha rai nga ai. Shanhte gaw nye a myihtoi ga ni hpe tsun nga ga ai nga nna tsun nga ma ti mung, shanhte hpe ngai shangun ai n rai. Ti mung, shanhte gaw shanhte htoi ai ga teng teng dik wa na hpe myit mada nga ma ai.

7
Ngai gaw shanhte hpe ning ngu tsun nngai: “Nang mu ai ndai shingran ni gaw n teng n man nga ai; nang htoi ai myihtoi ga ni mung masu magaw ga ni rai nga ai. Shanhte htoi ai myihtoi ga ni gaw nye a ga ni re ngu nna nanhte tsun ma ti mung, ngai nanhte hpe tsun ni ai n rai!”

8
Dai rai nna Tsaw Htum ai dai Madu gaw shanhte hpe, “Nanhte tsun ai ga ni gaw n teng n man nga ai; nanhte a myit shingran ni mung masu magaw ga ni hkrai rai nga malit dai. Ngai nanhte hpe ninghkap nngai.

9
N teng n man ai myit shingran mu ai myihtoi ni hte lam woi shadam ai myihtoi ga tsun ai myihtoi nanhte hpe ngai ari jaw na nngai. Nye a amyu masha ni daw dan ai lam galaw na matu shinggyin wa ai shaloi, nanhte a amying ni dai Israela amyu jahpan hta lawm lu na ra ai n rai. Nanhte gaw Israela mungdan de galoi mung nhtang wa lu na myit dai n rai. Ngai gaw Tsaw Htum ai Dai Madu rai nga nngai hpe nanhte chye lu na rai myit dai.

10
Dai n teng n man ai myihtoi ni gaw nye a amyu masha ni hpe byin ai lam mahkra kaja nga ai nga nna tsun let lam woi shadam ma ai. Kaja wa tsun ga nga yang, byin ai lam mahkra kaja nga ai n rai! Nye a amyu masha ni gaw malawk mat ai bunghku nlung ni hpe htuk shachyaw da ma ai; dai hpang n teng n man ai myihtoi ni sa wa nhtawm dai hpe namhtun hte chya da ya nga ma ai.

11
Shanhte a bunghku gaw daw agrawp mat na ra ai nga nna myihtoi ni hpe tsun mu. Ngai gaw marang htu jahkrat dat na nngai. Sin kaba ni mung de a ntsa e hkrat bun na ra ai, shing rai n-gun ja ai laru gaw dai hpe agrawp kau na mara ai.

12
Dai bunghku gaw run hkrat mat na ra ai, shaloi dai namhtun chya da ai gaw kaning rai n kaja ang a ta?, nga nna masha shagu nanhte hpe san na mara ai.”

13
Ya chyawm gaw Tsaw Htum ai dai Madu ning nga nna tsun ai: “Nye a sindawng kahtet ai hta ndai bunghku hpe jahten sharun kau na matu ja la ai nbung laru, marang hte sin kaba ni hpe shangun dat na nngai.

14
Ngai gaw shanhte namhtun hte chya da ai bunghku hpe agrawp daw kau ai hte adawt sharun kau nna de a npawt nhpang nlung ni hpe chyu sha ngam da na myit tawn nngai. Dai bunghku gaw ru hkrat wa nna nanhte yawng hpe gamyet sat na myit dai. Ngai nan dai Madu rai nga nngai hpe masha shagu chye lu na mara ai.

15
Dai bunghku hte dai hta namhtun chya ai ni gaw nye a pawt sindawng ai n-gun hkam sha na mara ai. Shaloi ngai gaw bunghku hte dai hpe namhtun hte chya ai ni htum mat na masai ngu nna nanhte hpe tsun na nngai.

16
Yawng hte n kaja nga ti mung, yawng hte kaja nga ai nga nna Yerusalem hpe tsun shangang ai myihtoi ni htum mat na masai!,” nga nna dai Tsaw Htum ai dai Madu shi nan tsun wu ai.

17
Dai Madu gaw, “Ya chyawm gaw, si chye ai masha wa e, na a amyu masha ni hta e shanhte a myit ra ai hku hkan nna myihtoi htoi ai num ni hpe yu yu u. Shanhte hpe ninghkap let daru u,

18
Tsaw Htum ai dai Madu gaw shanhte hpe hpa tsun nga ai lam htawn tsun u: “Num nanhte gaw dingnye hkrum nga myit dai! Hpa majaw nga yang, nanhte gaw masha shagu a matu lata lahkawn hkaw wang ni hte shanhte a baw ntsa e magap na baw sumpan ni hpe chywi ya myit dai; shaloi shanhte gaw kaga masha ni a asak hkrun lam hta daru magam n-gun hkam la lu nga ma ai. Nanhte gaw nye a amyu masha ni a ntsa e asak hte si hkrung si htan hte seng ai hpung dagu madu la mayu myit dai, dai hpe nanhte a akyu a matu jai lang mayu nga myit dai.

19
Nanhte gaw nye a amyu masha ni a man e muk-yaw mam latup nkau mi hte muk hkyep loi mi lu la na matu ngai hpe n kaw n law di myit dai. Nanhte gaw n si ging ai amyu masha ni hpe sat kau myit dai; n jahkrung da ging ai amyu masha ni hpe jahkrung da nga myit dai. Nanhte gaw nye a amyu masha ni hpe masu magaw ga tsun nhtawm shanhte gaw nanhte tsun ai ga hpe kam nga ma ai,” ngu nna tsun wu ai.

20
Da ndai gaw Tsaw Htum ai dai Madu tsun ai mungga rai nga ai: “Asak hte si hkrung si htan hpe hkang lu na matu shakut shaja let galaw chyam yu na matu nanhte lang ai lata lahkawn hkaw wang hpe ngai n dawng nngai. Ngai gaw nanhte a lahpum ni hpe gang je kau nhtawm nanhte hkang na matu shakut chyam yu ai nye a amyu masha ni hpe shalawt dat na nngai.

21
Ngai gaw nanhte a baw magap ai du bat sumpan ni hpe gang je kau ya na nngai, nye a amyu masha ni gaw nanhte e hkyuk da ai hpung dagu kata kaw nna kalang lata lawt lu na mara ai. Dai shaloi, ngai nan dai Madu rai nga nngai hpe nanhte chye lu na rai myit dai.

22
“Ngai nchyi nmu n byin shangun mayu ai ndai mai kaja ai amyu masha ni hpe nanhte a masu magaw ga ni hte myit shadaw ya myit dai. N hkru ai masha ni gaw n hkru ai amu hpe kau da nna, shanhte a asak mawai la lu na, nanhte hkum da myit dai.

23
Dai rai nna, ya chyawm gaw nanhte a n teng n man ai shingran ni hte lam woi shadam ai myihtoi htoi ai ga ni gaw lai mat wa sai. Ngai gaw nye a amyu masha ni hpe nanhte madu la mayu ai hpung dagu kata kaw nna hkye mawai da ni ai. Dai re ai majaw ngai nan dai Madu rai nga nngai hpe nanhte chye lu na marin dai.”


Kachin Jinghpaw Bible 2009 Jinghpaw Common Language Bible © Bible Society of Myanmar, 2009