Beblia

	Kachin JCLB Bible 2009 HEBRE 12


Save Notes

1
Ya anhte a matu ndai daram law ai sakse ni gaw anhte hpe wang shinggrup da nga mi ai. Dai re ai majaw, anhte gaw lam e dingbai dingna re ai lam shagu hpe mung, anhte ni hta grai ngang hkra kap noi nga ai yubak hpe mung, yeng seng kau nhtawm, anhte gat na matu myit mada daw dan da ai bandung shadaw du hkra shakut sharang rai gat shadu wa ga.

2
Anhte a makam masham hpe npawt ndung hkren jahkum shatsup ya ai wa Yesu hpe azi yu nga ga, Madu gaw shi hkam la na rai nga ai shi hpe ala nga ai dai kabu gara ai lam a majaw, dai wudang hta si hkam ai kaya kahpa hpe hpa zawn n nawn ai sha wudang lam hpe lata la nna ya Karai Kasang a tingnyang hkra maga de wa dung nga sai.

3
Yubak mara lu ai ni e laja lana di nna n ju n dawng ai lam hpe dai Madu gaw gade daram hkam nu ai hpe nanhte myit tau yu mu. Dai rai nna nanhte hta myit daw myit hten asum jaw ai lam n nga shangun u ga.

4
Nanhte gaw yubak mara hte hkrum katut gasat hkat ai lam hta ya du hkra sat kau hkrum na madang du hkra garai n hkap daw ra myit dai.

5
Chyum Laika hta Karai Kasang gaw, “Ngai sha e, dai Madu nang hpe sharai shading yang, madat mara u, shi nang hpe daru sharin yang, myit daw myit hten hkum rai et.

6
Hpa majaw nga yang, Karai Kasang gaw shi tsaw ra ai masha shagu hpe sharin shaga nna, Shi a kasha hku hkap la mala hpe ari jaw chye nga ai,” nga nna nanhte hpe shi a kasha ni re ai hku nna n-gun jaw tsun shaga ai ga ni hpe nanhte malap kau manit ni?

7
Nanhte hkrum hkra nga ai nni nkri hpe kawa a sharin shaga ai zawn hkam sharang nga mu; nanhte hkrum hkra ai nni nkri gaw, nanhte hpe Karai Kasang gaw shi a kasha ni jaw ai hku sharin ai lam rai nga ai. Shi a kawa n daru sharin ai kasha kanang nga yu a ta?

8
Shi a kasha ni yawng hkam ga ai zawn daru sharin ai hpe n hkam la myit yang gaw nanhte gaw kasha majing n rai, n-gyi ma ni sha rai nga myit dai.

9
Anhte hpe daru sharin ai shinggyim kawa ni hpe anhte hkungga lara di ga ai. Dai rai yang, anhte a Wenyi hte seng ai Kawa a npu e grau nna taw nga let asak hkrung nga ra ga ai n rai hka!

10
Shinggyim kawa ni gaw anhte hpe tawng marang mi sha shanhte jaw ang ai ngu nna sawn nawn ai hte maren daru sharin chye ma ai; rai ti mung Karai Kasang chyawm gaw, anhte a mai kaja ai lam a matu mara, shi zawn chyoi pra wa mu ga, nga nna anhte hpe daru sharin mi ai.

11
Anhte daru sharin hkrum ai shaloi kabu hpa n rai nga ai, daru sharin hkrum ai ten hta yawn hpa zawn rai nga ai. Rai ti mung dai gaw htawm hpang e she daru sharin hkam ai a marang e tara hkan ai masha ni tai wa ai hte ding hpring ai asak hkrung lam a ngwi pyaw ai kumhpa hpe shu la shangun nga ai. s Matsun Ai Lam Ni Hte Sadi Jaw Ai Lam Ni

12
Dai re ai majaw nanhte a tsu ba nna kya mat ai lata ni hpe sharawt malan nna, nanhte a lapyin n rawng nna gari nga ai lahput ni hpe n-gun shaja dating nga mu.

13
Ding ai lam ni hta matut nna hkawm sa nga mu, shaloi she hten ai lagaw n mai hkawm mat hkra n byin ai sha mai tsai mat wa na ra ai.

14
Masha shagu hte ngwi pyaw ai hku nga lu hkra mung, chyoi pra ai asak hkrung lam hpe lu la hkra mung, tam shakut nga mu. Hpa majaw nga yang, dai zawn re ai asak hkrung lam hte n rai yang kadai mung dai Madu hpe mu lu na n rai.

15
Karai Kasang a chyeju kaw na htak mat wa ai lam n byin u ga, makawp maga nga mu. Hka ai hpun ru gaw tu kaba wa nna shi a gung hte jam jau law law jaw lu ai zawn, nanhte kadai hta mung dai zawn n byin u ga, sadi nga mu.

16
Lai kyang n kaja nna wenyi makam masham n rawng ai hte shat ma mi a matu sha shi a hpu lat aya dut sha kau ai Esaw zawn, nanhte kadai hta mung n byin u ga, sadi nga mu.

17
Nanhte chye nga ai hte maren, shi gaw hpang e she kawa kaw na shaman chyeju lu la mayu wu ai, rai ti mung shi n lu wu ai, hpa majaw nga yang, shi galaw lai wa sai lam hpe bai sharai na lam hpe myi prwi hte tam katu wu ti mung, n mu la nu ai.

18
Nanhte gaw Israela amyu masha ni zawn lata hte nan jum hkra lu ai wan grung nga ai, achyang amang re ai, nsin chyip mak re ai, laru ru ai,

19
pahtau ngoi ai hte ga nsen ngoi pru ai Sina bum de nanhte du yu manit dai n rai. Shanhte gaw dai nsen hpe na lu ai shaloi kaga nsen langai mi mung bai n na lu nu ga, hpyi nem ma ai.

20
Hpa majaw nga yang, shanhte gaw, “Yam nga langai mi pyi dai bum hpe sa hkra jang, nlung hte kabai sat kau mu,” nga nna hkang da ai mungga hpe n hkam lu ma ai.

21
Mu lu ai lam ting gaw hkrit kajawng hpa rai nga ai majaw Mawshe pyi, “Ngai nachying hkrit gari mat ni ai,” nga nna tsun ai.

22
Nanhte chyawm gaw Sina Bum a malai Ziun Bum hte lamu kasa mun sen nga ai ahkrung nga ai Karai Kasang a mare ngu ai sumsing lamu na Yerusalem mare de du nga manit dai.

23
Nanhte gaw Sumsing lamu na jahpan hta lawm ai kasha alat ni a kabu gara hpawng de nga ai hpawng de du nga manit dai. Masha amyu yawng hpe tara dara ai wa ngu ai Karai Kasang hpang de mung, jahkum shatsup hkrum sai ding hpring ai ni a wenyi ni hpang de mung, du nga manit dai.

24
Nanhte gaw, Ga Shaka Ningnan hpe gaw lajang da ya ai Yesu hpang de mung, Abela a sai hta grau kaja ai ga sadi ni ngu ai lapri bun ai asai hpang de mung, du nga manit dai.

25
Nanhte gaw, dai mungga tsun ai wa hpe n madat ya ai sha ningdang kau ai lam n byin u ga, sadi nga mu. Ndai ga ntsa e shadum shahprang ai wa a ga hpe na la na ningdang kau ai ni yubak ari hta na n lawt lu ma ai, Dai rai nna, anhte gaw, Sumsing lamu kaw nna tsun ai wa hpe shingdu kayin kau ga yang gaw yubak ari kaw na anhte lawt na lam grau n nga mali ai.

26
Dai aten hta Karai Kasang a nsen gaw ginding aga hpe ashun dat wu ai, rai ti mung ya gaw, “Ginding aga hpe sha n rai, Sumsing lamu hpe mung ngai kalang mi naw ashun dat we ai,” nga nna ga sadi tawn da nu ai.

27
“Lang mi naw,” ngu ai ga a lachyum gaw, hpan da hkrum ai arai ni yawng hpe ashun dat nna yeng seng kau na rai nna, n shamu n shamawt lu ai arai ni sha ngam nga na ra ai, nga ai rai nga ai.

28
Dai rai nna anhte lu la ai mungdan gaw n shamu n shamawt lu ai rai nna, anhte Karai Kasang hpe chyeju dum nga ga. Anhte gaw chyeju dum let hkrit hkungga ai myit hte Madu sharawng awng na hku Karai Kasang hpe nawku daw jau nga ga.

29
Hpa majaw nga yang, anhte a Karai Kasang gaw hkru jahten kau chye ai wan nan rai nga ai.


Kachin Jinghpaw Bible 2009 Jinghpaw Common Language Bible © Bible Society of Myanmar, 2009