Beblia

	YUDA 1


Save Notes

1
Yesu Hkristu a shangun ma hte Yaku a kanau ngai Yuda gaw, Karai Kasang e shaga la nna Kawa Karai Kasang a tsaw ra ai hte Madu Yesu a makawp maga ai hta asak hkrung nga ai ni hpe ga shana dat nngai.

2
Matsan dum ai ngwi pyaw ai hte tsaw ra ai gaw nanhte hta e hpring tsup law htam wa malit ga law.

3
Nye a tsaw ra ai ni e, anhte yawng jawm kam sham hkap la da sai hkye hkrang la ai lam nanhte hpang de ka dat na ngai grai shakut shaja nga nngai shaloi e, Karai Kasang gaw shi a masha ni hpe prat dingsa a matu lang mi hte sha ap ya da sai makam masham a matu matut nna dakring dalang gasat gala makawp maga sa wa na lam nanhte hpang de kalang ta laika ka nna n-gun jaw shadum shahprang na ra nga ai hpe ngai mu hkrup nngai.

4
Hpa majaw nga yang tara n hkungga ai masha ni n dum shami anhte kaw mayun shang nga ma ai. Shanhte gaw, shanhte a pyaw hpa lam hkan ai n kaja ai arawn alai ni hpe lu magap shalawt na matu anhte a Karai Kasang a chyeju hte seng ai mungga hpe kam ai hku manai makai di kau ma ai hta n-ga, anhte a langai sha rai nga ai Madu Yesu Hkristu hpe mung ningdang kau ma ai. Shanhte hkam la masai daw dan lam hpe moi chyaloi nhkoi kaw nna chyum mungga ni hta tau tsun da nga sai.

5
Karai Kasang gaw Israela amyu masha ni hpe Egutu mung kaw na kalang mi gara hku shaw la sai hpang shi hpe n kam n sham ai ni hpe jahten shabya kau sai lam nanhte chye nga myit ti mung, nanhte hpe ngai bai shadum mayu nngai.

6
Tinang lu tawn da ai ahkang aya kata hta myit n dik nna tinang a nga shara buga hpe kau da nna pru mat wa ai lamu kasa ni hpe mung myit dum nga mu. Karai Kasang gaw shi tara daw dan ai Nhtoi kaba hta shanhte hpe daw dan nna ari jaw na matu nsin sin ai kata hta htani htana re ai hpri sumri ni hte gyit hkang da mu ai.

7
Sodom hte Gomora mare yan hpe mung dai mare yan a grup yin na mare ni hpe mung myit dum nga mu. Dai mare ni kaw na mare masha ni gaw dai lamu kasa ni zawn, num la n se n sa lam hta pyaw daw kadaw nna shing ra maka hte nhtan shai ai hku nga sha ma ai majaw yawng a matu asan sha dan dan leng leng sadi jaw ai hku nna htani htana wan hta ari hkrum sha ma ai.

8
Dai hte maren ndai masha ni mung tinang mu ai matsat shabat re ai yup mang shingran ni gaw shanhte a hkum hkrang ni hpe yubak galaw shangun mu ai. Shanhte gaw Karai Kasang a ahkang aya hpe n kaw n law di kau nna ningtsa de na hpung shingkang rawng ai ni hpe shatan nhkan di roi asawng kau mu ai.

9
Lamu kasa agyi rai nga ai Mihkaela pyi gaw ndai lam n galaw wu ai. Mawshe a moi mang hpe kadai la ang ai ngu ai hte seng nna dai nat hte ga law dangrang hkat ai shaloi, Mihkaela gaw nat hpe mara shagun jahpyak ai ga n tsun wam ai. “Nang hpe Karai Kasang daru sharin shaga u ga!,” nga nna sha tsun ai.

10
Rai ti mung ndai masha ni gaw shanhte n chye n chyang ai hpa hpe mung mara shagun shahpyak chye ma ai. Nam na dusat chyazai ni zawn shanhte a hkritung myit hte chye na lu ai arai ni mung shanhte hpe hten za sum hkrum shangun nga ma ai.

11
Shanhte gaw Ka-in hkan sa ai lam masa hpe hkan sa ma ai majaw shanhte a matu kade hkrithpa rai nga ma hka! ja gumhpraw a majaw Balam galaw shut ai baw mara a lata de shanhte hkum ni hpe ap nawng kau mu ai. Kora gumlau ai zawn shanhte gumlau ma ai majaw, shanhte hpe jahten shaza kau mu ai.

12
Shanhte gaw kaya kahpa n chye hkra garu kachyi nga nna lu sha nga ma ai majaw, shanhte a kanawn mazum ai lu sha hpawng gaw matsat shabat ginra zawn rai nga ai. Shanhte gaw shanhte a akyu hpe sha tam ma ai; shanhte gaw marang n lawm ai nbung e shapoi hkawm ai sumwi ni hte mung, nshung shang wa mahka du wa tim asi n si nna ru hte hpawn gang baw tawn ai hte tsep kawp si mat ai hpun hte mung bung ma ai.

13
Ja la ai panglai hka leng ni hte mung bung ma ai; shanhte a kaya kahpa amu ni hpe panglai hka leng hkum bawp zawn dan leng pru wa shangun nga ai. Shanhte gaw prang hkawm nga ai shagan zawn rai ma ai. Shanhte hpe Karai Kasang gaw sung dik ai ningsin kata hta shanhte a matu shara langai mi lajang da ya manu ai.

14
Adam a prat kaw nna ading tawk yu hkrat wa ai prat sanit ngu na Enuk gaw moi chyaloi nhkoi kaw nna ndai masha ni a lam hpe, “Dai Madu gaw shi a chyoi pra ai lamu kasa mun mun sen sen hte du sa nna,

15
Masha yawng a ntsa e dai tara jeyang na ra ai; masha yawng mayawng hpe shanhte galaw ai n hkru n kaja ai amu ni a matu mung Karai kata ai masha ni Karai Kasang hpe ninghkap ai hku tsun shaga kau ai hkrithpa ga ni yawng a matu mung jeyang daw dan na ra ai!,” nga nna myihtoi ga hta tsun da sai.

16
Ndai masha ni gaw galoi mung aput angun nga nna masha kaga ni hpe mara sha shagun nga ma ai; shanhte gaw shanhte a n hkru n kaja ai, ra marin ai hta hkan nang ma ai. Shanhte gaw tinang a lam hpe shakawng gumrawng chye ma ai; shanhte gaw tinang a akyu pru hkra masha wa hpe kawng sharawt ya masu ai hku hkalem ai ga chye tsun ma ai.

17
Rai ti mung tsaw ra ai ni e, lai wa sai ten e anhte Madu Yesu Hkristu a kasa ni nanhte hpe tsun dan manit dai ga ni hpe adum nga mu.

18
Shanhte gaw, “Hpang jahtum nhtoi ni du ai shaloi e, nanhte hpe jahpoi asawng ai masha ni, Karai kata ai, tinang a hkum shan a ra marin ai lam hta hkan sa ai masha ni paw pru na mara ai,” nga nna nanhte hpe tsun dan manit dai.

19
Ndai masha ni gaw hpung kata hta hka bra wa ai lam hpe shabyin ai ni, tinang a hkum shan ra marin ai lam ni hta hkan sa ai lam ni, Wenyi n lu la ai ni rai ma ai.

20
Rai ti mung nanhte chyawm gaw, tsaw ra ai ni e, nanhte a chyoi pra dik ai nawku makam masham hta npawt de nna tinang dai matut nna galu kaba sa wa mu. Chyoi pra ai wenyi n-gun atsam hta shamyet nna akyu hpyi mu.

21
Madu Yesu Hkristu gaw shi a matsan dum ai myit hte nanhte hpe jaw na rai nga ai nhtum nwai asak lu la hkra Karai Kasang a tsaw ra ai myit hta anga nga mu.

22
Kam shut ung ang nga ai ni hpe matsan dum nga mu.

23
Bai kaga nkau mi hpe wan hta na gare la ai zawn hkye hkrang la mu. Bai kaga nkau mi hpe hkrit kang ai hte matsan dum nga mu, rai ti mung shanhte hkum shan ngang kayut ai hta na matsat shabat kap nga ai hpun palawng ni hpe pyi n dawng n yawt nga mu.

24
Ya chyawm gaw, nanhte kataw katan n rai hkra bau sin lu ai hte shi a hpung shingkang a man e shut hpyit mara n kap nna kabu gara ai lam jaw lu ai,

25
anhte a langai sha rai nga ai Karai Kasang hkye hkrang la ai Madu kaw anhte a Madu Yesu Hkristu a marang e, hpung shingkang daru magam hpung dagu hte ahkang aya, chyi nma pri npra aten kaw nna, ya e rai ti mung, htani htana prat dingsa e rai ti mung anga nga u ga law. Amen.


Kachin Jinghpaw Bible 2009 Jinghpaw Common Language Bible © Bible Society of Myanmar, 2009