Beblia

	Kalenjin Bukuit Ne Tilil TIENWOGIKAL 106


Save Notes

1
Olosu Jehovah, Ee, oweekyi Jehovah kongoi; amu mie inendet: Amu tebyei rirenennyi koigeny.

2
Ng’o ne imuchi komwa boisionikab kamuktaet, che bo Jehovah, Anan ne imuchi komwaita kalosunennyi tugul?

3
Boiboen ichek che ribei kiruoget, Ak inendet ne yaei imanda betusiek tugul.

4
Ibwata, ee Jehovah, eng’ chamet ne ichame biguk; Ee, rutocha eng’ yetuneng’ung’:

5
Si ageer borotetab cheguk che kigelewen, Si abaibait eng’ kagasetab ge ne bo bororieng’ung’, Si alosge koboto boroteng’ung’.

6
Kigechalwogense koboto kwanisiekyok, Kigeyai tengekto, kigeyai ne ya kot.

7
Ma iguiyo kwanisiekyok kwong’utiguk eng’ Misri; Ma ibwat chang’indab rirenosieguk; Ago kiingelelso eng’ ye negit nyanjet, noto Nyanjet ne Birir.

8
Ago kisor ichek amu kainennyi, Si kobiit konaak kimnatennyi ne bo kamuktaet.

9
Kiger kong’ Nyanjet ne Birir agine, ak kiyaam: Kiindochi anyun kobun rirosiek, ko u ye bunei ong’atet.

10
Ak kisor ichek eng’ eutab inendet ne kiwechei ichek, Ak kiitiach ichek eng’ eutab bunyot.

11
Ak kiimaluuch beek bunikwak: Ma ng’et agot agenge eng’ ichek.

12
Kiiyan anyun ng’alekyik; Kitien kalosunennyi.

13
Ne matianit koutie boisionikyik; Ma ingen ng’olyondennyi:

14
Ago kinyor maget ne o eng’ ong’atet, Ak kitiem Kamuktaindet eng’ turguito.

15
Ak kiigochi kit ne kisom; Ago kiigochi kosogityi sobonwekwak.

16
Kiam ng’etkong’ ichek agobo Musa agine eng’ nganaset, Koboto Aron ne tilil ne bo Jehovah.

17
Kiyatak ng’ony ak kilugui Datan, Ak kituch kweanetab Abiram.

18
Ak kilal mat eng’ kweanenywa; Ak kibeel mat bichoto yaachen.

19
Kiitany itondab moita eng’ Horeb, Ak kigutung’ji kanamwet ne kigitanyi.

20
Kiwal anyun telunatenywa Kogergeit ak eito ne ageti.

21
Kiiutie Kamuktaindet, yetindenywa, Ne kiga koyai tuguk che eechen eng’ Misri;

22
Boisionik che kikwong’e eng’ emetab Ham, Ak tuguk che imuisei eng’ ole bo Nyanjet ne Birir.

23
Kimwa anyun kole ng’emei inendet ichek amu noto, Nda kima tonon Musa nenyi ne kigilewen eng’ tainnyi kooiyo, Koweekta neregekyik, si mabar ichek.

24
Ee, kisas ichek emet ne kararan, Ma iyan ng’olyondennyi;

25
Ago kiing’unyng’ung’so eng’ emaisiekwak, Ama epchi it kutitab Jehovah.

26
Kinamji barak anyun eunnyi amu noto, Kole kotoorta kobutyo eng’ ong’atet:

27
Ak koiyestaat iyotenywa koyom bororiosiek, Ak koiyesta ichek eng’ emotinwek.

28
Kinamgei ichek ak Baal-peor, Ak kiam korosek che kigieng’jin che kigobek.

29
Kitach inendet kot konerech amu boisionikwak; Ak king’eet koroito eng’ kwenunywa.

30
Kitonon anyun Pineas, koruoch: Ak kigigirinda koroito.

31
Ak kigiit noto koek imanda eng’ inendet, Agoi ibinwek tugul koigeny.

32
Kitach inendet kogeny eng’ beekab Meriba, Kot koyait noto eng’ Musa amu ichek:

33
Amu kiingelelji tamirmiriennyi, Ak king’alal kosartae eng’ kutinnyi.

34
Ma bar bororiosiek, Ko u ye kiga ng’at Jehovah ichek;

35
Ago kiburuigei koboto bororiosiek, Ak kiinetgei boisionikwak:

36
Ak kiot kanamonikwak; Che kiek mestet eng’ ichek:

37
Ee, kiigochi oik werikwak ak tibikwak koek tiseiywek,

38
Ak kitumda korotik che matinyei tengek, korotikab werikwak ak tibikwak, Che kiigochi kanamonikab Kanan koek tiseiywek; Ak kiging’wanit emet eng’ korotik.

39
Kimuruonitu anyun eng’ boisionikwak, Ak kiyai ibetab ge eng’ boisionikwak.

40
Kilalyo anyun neregekab Jehovah eng’ bikyik. Ak kiwech borotennyi.

41
Ak kiigoito ichek koba eunekab bororiosiek; Ak kiboi ichek che kiwechei.

42
Kiinyalil ichek bunikwak, Ak kigimut ichek kogas it eng’ eunekab bichoto.

43
Kisor ichek konyil che chang’; Ago kiek ngelelik eng’ ng’olyondenywa, Ak kigiyai konyeratitu eng’ tengektanywa,

44
Ago kigeer bichiindanywa, Ye kingogas rirekwak:

45
Ak kiibwat kayomisennyi ne kigayomisyi ichek, Ak kirire ichek ko u chang’indab rirenosiekyik.

46
Kiigochi bik tugul che kiluulei ichek, Korirge.

47
Soruech, ee Jehovah Kamuktaindennyo, Ak iyumech, kemong’une bororiosiek, Si kobiit keweekyi kongoi kaineng’ung’ ne tilil, Ak kilosuge eng’ kalosuneng’ung’.

48
Iberurot Jehovah Kamuktaindetab Israel, Koboch koigeny agoi koigeny. Ak ingomwa bik tugul kole, Amen. Olosu Jehovah.


Kalenjin Bukuit Ne Tilil God's word open for all © Bible Society of Kenya, 2020