Beblia

	Kalenjin Bukuit Ne Tilil KALEWENAIK 17


Save Notes

1
Kaigai kererutiet ne yaamat koboto kamuung’et, Kosiir got ne nyiitat igorta ak komi boriet.

2
Bou otwogindet ne boisie ng’omnatet, werit ne ibu kalilanet, Ak nyoru borotet koboto tupchosiek.

3
Bo teret feda che kitilili, ak bo mat ne o tahabu: Ago Jehovah ne tiemei mugulelwek.

4
Epchin it chito ne yamei yaitiet, kutuswekab kiptengeginik; Epchin it kiplembechwet ng’elyepta ne ng’alsei.

5
Age tugul ne chotei kibananiat kogerei kong’ Yaindennyi: Ama kimetoi ama kibir, inendet ne boiboitu ko kanyor alage nyalilda.

6
Chepkuletab boisiek mochogoronikwak; Ak torornatetab lagok kwanisiekwak.

7
Manyoljin ng’alek che kororon abusanet: Kotam nee anyun kutit ne mwaei lembech, eng’ bounindet.

8
U koita ne bo kamanutiet ne o, kitab kagaigaet, eng’ taitab inendet ne tinyei: Borei eng’ ui tugul ole tokyingei.

9
Cheng’ei chamnyet inendet ne tuchei bistoet: Ago ibestos choronok che eechen, inendet ne iboti ng’alek.

10
Chutei keretab kong’ inendet ne tinyei kaguiyet Kosiir birutik bogol eng’ ne berber.

11
Cheng’ei chito ne ya bistoet kityo; Noto anyun kiyokyin inendet chito ne kolgol.

12
Kaigai kotuiyo ak chi tiondo ne u keerit ne kagirebe arekyik, Kosiir ne berber eng’ berberindanyi.

13
Age tugul ne yaaktoi yaitiet eng’ ne mie, Ko maistoegei yaitiet gonnyi.

14
U taunetab boriet ye kiyatei beek; Omete anyun boriet kotom kobiit bolatet.

15
Inendet ne iityin imanda kiptengekyot, ak inendet ne igikyin chitab iman, Choto tuwai ko tuguk che wechei Jehovah.

16
Lyon anyun si kotinyei ne berber kit ne ale ng’omnatet, Ngot ko matinyei naet?

17
Tinyei choruet chamnyet kotugul, Ak kisichei ne tupcho agobo nyalilda.

18
Namegei eunek chito ne matinyei naet, ak chito age koyostos, Si koek tononjinindet eng’ taitab chitab kokwennyi.

19
Chamei bistoet ne chamei boriet: Ak inendet ne itorori kurgennyi kocheng’ei ng’emisiet.

20
Manyoru kiy ne mie inendet ne imaasat muguleldo: Ak ibutyin yaitiet ne tinyei ng’elyepta ne imaasat.

21
Inendet ne sichei ne berber konyoru arogenet: Ak matinyei boiboiyet kwandab ne abusat.

22
Kerichek che miach muguleldo ne igasegei: Ago iyaami kowek tamirmiriet ne katanui.

23
Inemune kiptengekyot tegennyi kitab kagaigaet, Si komaas ortinwekab kiruoget.

24
Mi ng’omnatet taitab inendet ne tinyei naet: Ago mi konyekab ne berber tabanwekab ng’ony.

25
Werit ne berber ko arogenet eng’ kwandanyi, Ak ng’wanindo eng’ inendet ne kisichei.

26
Ma mie kogeny kebir ne bo iman, Anan kebir che toogunotin agobo imandanywa.

27
Tinyei naet ne maiseeri ng’alekyik: Ak tinyei kaguiyet inendet ne tinyei tamirmiriet ne bo muitaet.

28
Agot ne berber, ye sisei, kiiti kele ng’om: Ye ker kutinnyi, kiit kele ng’om.


Kalenjin Bukuit Ne Tilil God's word open for all © Bible Society of Kenya, 2020