Beblia

	Kalenjin Bukuit Ne Tilil KALEWENAIK 23


Save Notes

1
Ye oamisie ak bounindet, Ibwat komie ne mi taing’ung’;

2
Ak inde rotwet moktang’ung’, Ngo i kipkeiya.

3
Amat imach amitwogikyik che anyiny; Amu amitwogikab kaberberisiet choto.

4
Ameiimge ile iegu magorio; Ametiiege ng’omnateng’ung’.

5
Tos igase miat kit ne mami? Amu yachingei magornatet kebebaik, Ko u ye tirireni kipsichit kotokyingei barak.

6
Ameam amitwogikab inendet ne tinyei kong’ ne ya, Amemach amitwogikyik che anyiny:

7
Amu u inendet kabwatutikyik: Lenjinin, Amisie ak ieeise; Ago mami muguleldanyi koboten.

8
Ing’ung’u kererutiet ne keam, Ak kobetyo ng’aleguk che anyiny.

9
Amat ing’alal kogasei ne berber; Amu sasei ng’omnatetab ng’aleguk.

10
Ameiste kiwotet ne bo keny; Amewe mbarenikab che matinyei kwanisiek;

11
Amu kim katiagindenywa; Tononjin ichek eng’ ng’alek kogirindoin.

12
Igochi muguleldang’ung’ konetisiet, Ak igochi itiguk kogas ng’alekab ng’omnatet.

13
Ameesie itigon lakwet: Amu mameei ngibir.

14
Bire kirokto, Si isoru sobondanyi eng’ oldab che kigobek.

15
Werinnyu, ngo ng’om muguleldang’ung’, Kobaibai muguleldanyu, ee, baibai muguleldanyu:

16
Ee, boiboitu muguleldanyu, Ye kemwa tuguk che bo iman.

17
Amat koam ng’etkong’ muguleldang’ung’ agobo kiptengeginik: Ago konyit Jehovah betut komugul:

18
Amu mitei iman melekto; Ama kiistoi kamang’uneng’ung’.

19
Kas anyun, werinnyu, ak ing’omitu, Ak indochi muguleldang’ung’ eng’ oret.

20
Amotebi ak eeikab divaik; Koboto kipkeinik che amei banyek:

21
Amu egu bononik kibogitinik ak kipkeinik: Ak ilaakyin ruondo chito mararenik.

22
Epchi it kwandang’ung’ ne kisichin, Amesas komet ko kagoosit.

23
Al imanit, amealde; Ee, al ng’omnatet, ak konetisiet, ak kaguiyet.

24
Baibaitu mising’ kwandab ne bo iman: Ak inendet ne sichei lakwet ne ng’om, kobaibaitune inendet.

25
Ingogasgei kwandang’ung’ ak komet, Ingobaibait komet ne kisichin.

26
Werinnyu, kona muguleldang’ung’, Ingobaibaitune konyeguk ortinwekyuk.

27
Amu keringet ne loo chepkugoniot; Keringet ne mariich kwondo ne ma neng’ung’.

28
Ee, saptoi ko u rebindet, Ak kotesei kaberberik eng’ bik.

29
Ng’o ne rirei kole, Bwa? Ng’o ne arogeni? Ng’o ne bolei? Ng’o ne ing’unyng’unyi? Ng’o ne kigiguoten buch? Ng’o ne biriren konyek?

30
Ichek che eei divaik agoi; Ichek che cheng’oti maiyek che burugotin.

31
Ameiit maiyek ye kagobiriritu, Ye toogu itondanyi eng’ kikombet, Ye rektoi komie:

32
Eng’ let kosus ko u erenet, Ak kouut ko u melmeldo.

33
Keerei konyeguk karusiek, Ak komwa muguleldang’ung’ tuguk che imaasotin.

34
Ee, iigeitu inendet ne rue nyanjet kwen, Anan ko u inendet ne rue toloitab melit.

35
Ile, Kagokwera, ago ma ama kiy; Kagobira, ama agas: Agosu au, si acheng’at kogeny?


Kalenjin Bukuit Ne Tilil God's word open for all © Bible Society of Kenya, 2020