Beblia

	Kalenjin Bukuit Ne Tilil KALEWENAIK 25


Save Notes

1
Kalewenaikab Solomon chuto agichek, che kisirei bikab Hesekia laitoriatab Juda.

2
Torornatetab Kamuktaindet kouny kiy: Ago torornatetab laitorinik kocheng’ ng’olyo age tugul.

3
Ko u ye maisiagaksei tororindab kipsengwet, ak looindab ng’ony, Ko u noto agine mugulelwekab laitorinik.

4
Kenende michikyigek eng’ feda, Si kobiit teret ne bo katililindetab feda:

5
Iste kiptengekyot eng’ taitab laitoriat, Si kigimit eng’ imanda ng’echerennyi ne bo laitornatet.

6
Amelosuge eng’ taitab laitoriat, Ametonon eng’ komostab bik che eechen:

7
Amu kaigai ngelenjin, Togosu; Kosiir kiming’inin eng’ taitab bounindet, Ne kaigeer.

8
Amat isib iyai boriet, Si mabetun kit ne iyae eng’ let, Ye kagotewerin chitab kokweng’ung’.

9
Oruoch ak chitab kokweng’ung’ inegei, Amat ing’any ung’otietab chito age:

10
Si maitewerin inendet ne kasei, Ak konamin tewernateng’ung’.

11
U logoekab tahabu che mi kerebonikab feda Ng’olyot ne kemwaei eng’ sait ne nyolu.

12
U munaiyetab itit ne bo tahabu, ak lelestab tahabu che kororon, Kotigonindet ne ng’om ne kere kong’ itit ne kase it.

13
U kaititietab teluchi eng’ betusiekab kesisiet, Chito ne kiyoktoi ne kiyani, eng’ ichek che iyoktoi inendet; Amu igoigoi sobonwekab kiptainikyik.

14
U bolik ak usonet ne matinyei ropta, Ne ilosunegei konunoikyik eng’ lembech.

15
Kigoigoi kiruogindet eng’ muitaet ne o, Ak iriei ng’elyepta ne tala kowet.

16
Tos kiinyoru kumik? Am che te che yamin; Si mebiye, ak ing’ung’u.

17
Ametiech gotab chitab kokweng’ung’ kotugul; Si mang’et agobo inye, ak kowechin.

18
Chito ne baorianjin chitab kokwennyi eng’ lembech Ko kergei ak kiriswet, ak rotwetab chok, ak kipchabet ne ng’atib.

19
U keldet ne kigoil, ak keldo ne kigobunuk Kamang’unet ne kimang’u chito ne magiyani, eng’ betutab nyalilda.

20
U chito ne ireegu ngoriet eng’ betusiekab kaititiet, ak ko u siki che kirong’jin munyat, Inendet ne tienjin tienwogik muguleldo ne nyigis.

21
Ngo am rubet bunyondeng’ung’, ibai; Ak ngo am melel, inage koee:

22
Amu irurukyini ng’etetiot metinnyi, Ak kogeerun Jehovah.

23
Ibu ropta usonetab murot ne bo katam: Ibu ko u noto chemereret neregek.

24
Kaigai kemeny taban eng’ got barak, Kosiir kemeny got ne o ak kwondo ne bolin.

25
U beek che kaitit eng’ ne amei melel, Logoiywek che miach che bunu emet ne loo.

26
U ole kutune beek che turur, ak kondab beek ne bulot, Chito ne bo iman ne igochingei kiptengekyot.

27
Ma mie keam kumik che chang’: Ko u noto ngo cheng’jigei bik teegistanywa ko ma teegisto.

28
U nganaset ne kigebut ama tinyei irimet, Chito ne maribegei.


Kalenjin Bukuit Ne Tilil God's word open for all © Bible Society of Kenya, 2020