Beblia

	Kalenjin Bukuit Ne Tilil HOSEA 2


Save Notes

1
Omwachi ng’etab kametwagikwok olenji, Ami; ak omwachi chepkametwagikwok olenji, Ruhama.

2
Ogaigai komet, ogaigai; amu inendet ko ma osotiondennyu, ama a manong’otiondennyu: ak ingometo kugoinatosiekyik che mi togennyi, ak ingometo ibetab ge ne mi tegennyi;

3
si mareegune ngoroikyik, ak achuunde kotebi ach ngor, ko u betut ne kigisichei, ak ayai inendet koek ong’atet, ak agochi inendet koigei emet ne yaamat, ak abare melelda:

4
ee, marire lagokyik; amu icheget lagokab kugoinatet.

5
Amu kiyaei kamet kugoinatet: kiyai inendet ne kimanachi ichek, tewernatet: amu kimwa kole, Asuboti chamanikyuk, che kona amitwogikyuk ak beekyuk, koboto kororikyuk che bo kechirek, ak mabutekyuk, mwanikyuk ak tuguk che aee.

6
Keer anyun-o, ayieme oreng’ung’ katok, ak ang’ot inendet si manyor ortinwekyik.

7
Ak kosubot chamanikyik, ago manyoru ichek; ak kocheng’ ichek, ago manyoru: yeityo komwa kole, Kaweekyige manong’otiondennyu ne bo tai; amu kiagaigai eng’ betusiechoto kosiir nguno.

8
Amu ma nai kole ane ne kiagochini bek, ak divaik, ak mwanik, ak atesyi feda ak tahabu, che kiyae Baal.

9
Aweechi anyun bekyuk eng’ betusiekyik, ak aweech divaikyuk eng’ kenyisiekwak, ak arebe kororikyuk che bo kechirek ak mabutekyuk che kota tugegei.

10
Ak ang’anye tewernatennyi eng’ taitab chamanikyik, ama biitu chi ne soru inendet eng’ eunnyu.

11
Ak agesu kogeny boiboiyennyi, igorwekyik, ak betut ne kaleel arawet, ak sabatosiekyik, ak tuiyosiekyik tugul che kiging’at.

12
Ak ang’em ketikyik che bo sabibuk, ak mogoonikyik, che kigomwa kole, Chu ko tuguk che kialena chamanikyuk: ak ayai tuguchoto koek osnet, ak koam tiong’ikab timin.

13
Ak aipchi inendet biret agobo betusiekab Baalik, che kobeeljin nyamdutik; ye kilelesanjinegei munaokyik koboto tugukyik che bo lelesta, ak kwo kosubot chamanikyik, ak koutiena, mwaei Jehovah.

14
Noto anyun, ogeero, agaigai inendet, ak amut inendet kwo ong’atet, ak amwachi ng’alek che agaigae.

15
Ak agochi inendet mbarenikyik che bo sabibuk eng’ oloto, ak agochi inendet atebwetab Akor, koek kurgetab kamang’unet; ak koyanwa eng’ oloto, ko u eng’ betusiekab ming’inatennyi, ak ko u eng’ betut ne kimong’u kotogosu eng’ emetab Misri.

16
Ak iguurena eng’ betunoto, Isi, mwaei Jehovah; ama iguurena Baali.

17
Amu aistoi kainaikab Baalik eng’ kutinnyi, ama kibwati kogeny kainaikwak.

18
Ak ayai arorutiet eng’ betunoto agobo ichek koboto tiong’ikab timin ak taritikab barak, ak tuguk che ichuutegei ng’ony: ak airi kwanget ak rotwetab chok, ak aiste luget eng’ emet, ak agochi koruiyo eng’ chametab ge.

19
Ak achob ale atunin koigeny; ee, achobe atunin eng’ imanda, ak eng’ kiruoget, ak eng’ chamnyet ne tala, ak eng’ rirenosiek.

20
Achobe atunin eng’ imanda: ak inai Jehovah.

21
Ak tun awolu eng’ betunoto, mwaei Jehovah, awoljini kipsengwetisiek, ak kowolji ichek ng’ony;

22
ak kowolji ng’ony bek, ak divaik, ak mwanik; si kowolji choto Jesreel.

23
Ak agoljige inendet eng’ emet; ak arire inendet ne kima kirire; ak alenji ichek che kima ko bikyuk, O bikyuk; ak kole, I Kamuktaindennyu.


Kalenjin Bukuit Ne Tilil God's word open for all © Bible Society of Kenya, 2020