Beblia

	Kalenjin Bukuit Ne Tilil GALATIEK 1


Save Notes

1
Paulo, ne kiyoktoi (ma ne bo bik, ama kiyok eng’ chi, ago eng’ Jesu Kristo, ak Jehovah Kwanda, ne kiing’eet inendet komong’ eng’ che kibek),

2
ak tupchosiek tugul che mi kobota, kisirjini kanisosiek che bo Galatia:

3
Ingoteb kobotok mieindo ak kalyet ne bunu Jehovah Kwanda, ak Kiptaiyandennyo Jesu Kristo,

4
ne kiigoitogei agobo tengekwogikyok, si kobiit kosoruech eng’ betusiechu yaachen, ko u magetab Jehovah nenyo ak ko Kwandanyo:

5
nenyi torornatet koigeny ak koigeny. Amen.

6
Akwong’e amu oistoige ochoktoi eng’ inendet ne kiguurok eng’ mieindab Kristo, obe oldab logoiywek che miach che ter;

7
che ma ter: kobate mi alage che iimok, ak machei kowal logoiywek che miach che bo Kristo.

8
Agot ngo achek, anan malaikaiyat ne bunu kipsengwet, ne tos amwok logoiywek alak tugul che miach che ter eng’ choto che kigeamwok, ko ingoek ne chubot inendet.

9
Ko u ye kiga kemwa eng’ tai, amwae nguno kogeny ko u noto ale, ngot koamwok chi age tugul logoiywek alak tugul che miach che ter eng’ choto kiotaach, ko ingoek ne chubot inendet.

10
Tos agoigoi nguno bik anan Jehovah? Anan acheng’e abaibai bik? Ngot ko ta aboiboi bik, ko ma a otwogetab Kristo.

11
Amu aboruok anyun, che kitupche, agobo logoiywek che miach che kiaamdoi, ale mabunu chi.

12
Amu kima ataach eng’ chi, ama kineta, ago eng’ ng’ang’utietab Jesu Kristo.

13
Amu kiogas agobo atebennyu eng’ betusiek che kigosiirto eng’ kayanetab Yahudik, ko u ye kiausausi kanisetab Jehovah kot kosiir, ak kiang’emang’emi:

14
ak kiatese tai eng’ kayanetab Yahudik kosiir siritoikyuk che chang’ eng’ bikab emennyu agiilige mising’ kosiir agobo bitonwekab kwanisiekyuk.

15
Ago ye kingocham Jehovah, ne kiitabana, koboch moetab kamennyu, ak koguura eng’ mieindanyi,

16
si kong’any Werinnyi eng’ ane, si kobiit aamda inendet eng’ Bororiosiek; kima king’alal anyun ak chi eng’ sainato:

17
ama atogoste Jerusalem ole mi ichek che kisib koek che kiyoktoi eng’ ane: ago kiawe Arabia; ak kiaweege agoi Damasko.

18
Kingogesgei anyun kenyisiek somogu atogoste awe Jerusalem si aborjige Kepas, ak abeni oldanyi betusiek taman ak mut.

19
Ago ma ageer alak eng’ che kiyoktoi, kobate Jakobo ne tupcho ak Kiptaiyat.

20
Ara anyun, eng’ tuguk che asirwok, ogeero, eng’ taitab Jehovah ko mamwae lembech.

21
Yeityo anyo korotinwekab Suria ak Kilikia.

22
Ak kitom kogeera togoch kanisosiekab Judea che kimi eng’ Kristo:

23
ago kigas kemwaei kityo kele, Inendet ne kiusech eng’ betusiek alak koamdoi nguno kayanonato king’emang’emi;

24
ak kiitoror ichek Jehovah eng’ ane.


Kalenjin Bukuit Ne Tilil God's word open for all © Bible Society of Kenya, 2020