Beblia

	Kalenjin Bukuit Ne Tilil EPESOEK 1


Save Notes

1
Paulo, ne kiyoktoi ne bo Kristo Jesu eng’ magetab Jehovah, asirjini bik che tililen [che mi Epeso], koboto che bo kayanet eng’ Kristo Jesu:

2
Ingoteb mieindo kobotok ak kalyet che bunu Jehovah Kwandanyo ak Kiptaiyat Jesu Kristo.

3
Iberurot Jehovah Kwandab Kiptaiyandennyo Jesu Kristo, inendet ne kigoberurech eng’ kaberuret age tugul ne bo tamirmiriet eng’ komoswekab kipsengwet eng’ Kristo:

4
ko u ye kilewenech eng’ inendet ye kitom kelumda ng’ony, si keegu che tililen che matinyei lelut eng’ tainnyi eng’ chamnyet:

5
ko u ye kiga sib kolewenech kenamech keegu werik eng’ Jesu Kristo eng’ inendet, ko u chamet ne mie ne bo magennyi,

6
agoi kalosunetab torornatetab mieindanyi, ne kigonech eng’ aiyebindo eng’ Chamanet:

7
ne kitinye eng’ inendet katiagennyo eng’ korotikyik, nyoetab kaat ne bo chalwogikyok, ko u magornatosiekab mieindanyi,

8
che kiyai kotesak eng’ achek eng’ ng’omnatet tugul ak naet,

9
ko kagoboruech ung’otiet ne bo magennyi, ko u chamennyi ne mie ne kichob eng’ inendet

10
agoi tononjinet ne bo ripsetab betusiek che yamegei, si koyum tuguk tugul eng’ Kristo, tuguk che mi kipsengwet, ak tuguk che mi ng’ony; eng’ inendet,

11
ne kiyaech eng’ inendet keegu borotennyi, ko kasib kolewenech, ko u magetab inendet ne yaei tuguk tugul ko u kabwatetab magennyi;

12
si kobiit keegu kalosunetab torornatennyi, achek che kiga kisib kimang’u Kristo.

13
Kiogas ak okwek eng’ inendet ng’olyotab imanit, logoiywek che miach che bo yetuneng’wong’ - eng’ inendet, ne kingo kaoyan, ko kiging’ochak eng’ Tamirmiriet ne Tilil ne bo arorutiet,

14
ne tongoaniatab borotennyo, agoi katiagetab borotennyi, eng’ kalosunetab torornatennyi.

15
Amu nito anyun, kingo kaagas agobo kayanet ne mi kwenung’wong’, eng’ Kiptaiyat Jesu, ak chamnyet eng’ tugul che tililen,

16
ko mata asis agoito kongoi agobo okwek, ak amwaok eng’ sautikyuk;

17
ale ingogonok Jehovah ne bo Kiptaiyandennyo Jesu Kristo, Kwanda ne bo torornatet, tamirmiriet ne bo ng’omnatet ak ng’ang’utiet eng’ naetab inendet;

18
ko kagokweng’ogis konyekab mugulelwekwok, si kobiit onai kit ne u kamang’unetab kuursennyi, ak magornatosiekab torornatet ne bo borotennyi eng’ che tililen,

19
ak kit ne u oindo ne siirtoot ne bo kamuktaennyi eng’ achek che kiyani, ko u boisionoto bo kimnatetab kamuktaennyi

20
ne kiyai eng’ Kristo, ye kingong’eet inendet komong’ eng’ che kibek, ak konde inendet kotebe eunnyi ne bo tai eng’ komoswekab kipsengwet;

21
ne toror kosiir laitornatet tugul, ak bounatet, ak kamuktaet, ak kiptainatet, ak kainet age tugul ne mwaat, ma kityo eng’ kenyisiechu, ago eng’ choto bwanei:

22
ak kiinde tuguk tugul kogas it eng’ keldebesaikab kelyekyik, ak kogochi inendet koek metit eng’ tuguk tugul eng’ kaniset,

23
noto ko bortanyi, nyiietab inendet ne inyiiti tugul eng’ tugul.


Kalenjin Bukuit Ne Tilil God's word open for all © Bible Society of Kenya, 2020