Beblia

	Kalenjin Bukuit Ne Tilil HEBRANIK 12


Save Notes

1
Noto anyun, amu kiyiemenech boldet ne o ne bo baorinik eng’ komoswek tugul, ongeiste nyigisindo age tugul, ak tengekto ne isib konamech, ak ongeruai eng’ muitaet eng’ kabeletab ge ne kiginde tainnyo,

2
kegeere Jesu ne kandoindet ak ko kawong’unindet ne bo kayanet, ne kimuita eng’ kimurtoiyot amu boiboiyet ne kiginde tainnyi, ak kosas kalilanet, ak kigotebe eutab tai ne bo ng’echeretab laitornatet ne bo Jehovah.

3
Obwat mising’ inendet ne kimuita eng’ kirindaetab ge ne bo kiptengeginik agobo inendet, si mong’etye, otanuise eng’ sobonwekwok.

4
Tom oyai luget kot kotumdagei korotik, obarege ak tengekto:

5
ak kioutie kateunet, ne ng’alalwok ko u ye king’alaljin werik, kole, Werinnyu, amesas kotigonetab Kiptaiyat, Anan itanui ye kerin kong’ inendet;

6
Amu inendet ne chamei Kiptaitaiyat, kotigoni, Ak kobirei werit age tugul ne taachei.

7
Omuitoi amu kotigonet; yaiywok Jehovah ko u noto ko u ye yachin werik; ng’o werit ne maitigoni kwanda?

8
Ago ngot ko motinye kotigonet, ne kigonyorune tugul yamdaet, o bo sarbuch anyun, ma o werik.

9
Ak kigitinye kwanisiek che bo borwekyok che kiitigonech, ago kigigonyiti ichek: tos ma kaigai kiming’inityige Kwanda ne bo tamirmirik, ak kesopche?

10
Amu kiitigonisiei ichek betusiek che ng’ering’ ko u ye kigeerei kole mie; ago inendet, kotigonisiei agobo toretet, si keegu che yamdoi tililindanyi.

11
Ma toogu kotigonet tugul kele bo boiboiyet eng’ betunnyi; ago bo arogenet: ago ye ibata koiichi icheget che kinetegei noto, logoekab kalyet, choto ko logoekab imanda.

12
Eng’ noto anyun onamji barak eunek che nyalulyotin, ak kutung’oik che meiyotin;

13
ak oyachi kelyekwok ortinwek che lititen, si ma kimaas che king’waldos, ago si kisoob.

14
Ogiilge otebi eng’ kalyet koboto bik tugul, ak tililinoto ne ngo matinyei chi ko maimuchi kogeer Kiptaiyat:

15
ogeer si marartae chi mieindab Jehovah; si mabiit tigitiotab ng’wanindo ak konyalilis, ak komuruon che chang’;

16
si mabiit ne soksei, anan chito ne maiywei Jehovah, ko u Esau, ne kialda etunatennyi ne bo siget agobo amdit agenge.

17
Amu ongen ole kingomach eng’ let konam kaberuret, keesio (amu kima sich boroindo ne bo sigunet) nganda kicheng’ mising’ eng’ beekab kong’.

18
Amu ma oit tulwet ne kimuchi ketwa, ne kilalei, anan tuuindo, ak mesundeito, ak kipchurjuriet,

19
ak cheetab iriaget, ak twegunet ne bo ng’alek, ne kisom ichek che kigasei kole si mata kemwachi ichek ng’olyo age tugul:

20
amu kima imuch komuita eng’ ng’olyondonoto kiging’at kele, Agot ngo twa tiony tulwet, kelage koik;

21
ak noto kitook, ko ki u kiy ne imuisei, kot kole Musa, Aiywei mising’ ak abotani:

22
ago kaoit okwek tulwetab Sion, ak nganaset ne bo Jehovah ne sobei, Jerusalem ne bo kipsengwet, ak tuiyosiek che bo malaikaisiek che ma iitoksei,

23
ak tuiyetab bik tugul ak kaniset ne bo che bo tai eng’ siget che kigesir eng’ kipsengwet, ak Jehovah kiruogindetab tugul, ak tamirmirik che bo bikab imanda che kigiyai koek che igesunotingei,

24
ak Jesu katuiyoindetab kayomiset ne leel, ak korotikab iset, che ng’alali ko mie kosiir che bo Abil.

25
Ogeer, amoesie inendet ne ng’alali. Amu ngot ko kima chililyo ichek ye kingoesio inendet ne kiga koteeita eng’ ng’ony, kesiire ne tia anyun achek ngot keistoege inendet ne iteu eng’ kipsengwet:

26
ne kiitumdum ng’ony kutinnyi betunoto: ago kagoaror anyun nguno, kole, Ta atumdumi kogeny konyil agenge, ma ng’ony kityo, ago kipsengwet agine.

27
Ago ng’olyondonito, kamwa kole, Ta konyilei agenge, koboru istoetab tuguk che kimuchi kitumdum, ko u eng’ tuguk che kigeyai, si kobiit kong’et tuguchoto che magitumdumi.

28
Noto anyun, amu kinyoru bounatet ne magimuchi kitumdum, ko ongeegu che tinyei mieindo, ne kimuchi keyae boisiet ne iboiboi Jehovah mising’, eng’ teegisto ak kaiyweet:

29
amu Jehovah nenyo ko mat ne igesu.


Kalenjin Bukuit Ne Tilil God's word open for all © Bible Society of Kenya, 2020