Beblia

	Kalenjin Bukuit Ne Tilil 2 PETERO 1


Save Notes

1
Simon Petero, otwogindet ak ko ne kiyoktoi ne bo Jesu Kristo, asirjini ichek che kigenyoru tugul kayanet ne kararan mising’ eng’ imandab Jehovah nenyo ak ko Yetindennyo Jesu Kristo:

2
Ingotesak mieindo ak kalyet eng’ okwek eng’ naet ne ongen Jehovah ak Jesu Kiptaiyandennyo.

3
Amu kigonech kamuktaetab Jehovah tuguk tugul che nyoljin sobondo ak kaiyweet ne kiywei Jehovah, eng’ naet ne kinae inendet ne kiguurech eng’ torornatennyi ak mieindanyi;

4
kigogonech eng’ choto arorutik che miachen mising’ ak ko eechen inne; si kobiit oegu eng’ chuto yamdoikab atebetab Jehovah, ko kaochililye ng’emisiet ne mi ng’ony amu maget ne ya.

5
Ee, amu ng’olyondonito ye kaotes kagiiletab ge tugul eng’ komostang’wong’, otesyi mieindo kayaneng’wong’; ak otesyi naet mieindo;

6
ak otesyi ribetab ge naet; ak otesyi muitaet ribetab ge; ak otesyi kaiyweetab Jehovah, muitaet;

7
ak otesyi chametab tupchosiek kaiyweetab Jehovah; ak otesyi chamnyet chametab tupchosiek.

8
Amu ngot komitei eng’ okwek tuguchuto ak kotesak, koyaok si mochorirense anan ko che maiyiei logoek eng’ naetab Kiptaiyandennyo Jesu Kristo.

9
Amu inendet ne matinyei tuguchuto, ko kipkoratiat ak kogeerei kit ne mi ole negit kityo ak koutie katililet eng’ tengekwogikyik che bo keny.

10
Eng’ noto anyun, che kitupche, ogiilge mising’ inne, oyai kuureng’wong’ ak leweneng’wong’ kogimit: amu ngot oyai tuguchuto ko magoi obutye matiny:

11
amu kigonok ko u noto eng’ chang’indo ochut bounatetab koigeny ne bo Kiptaiyandennyo ak ko Yetindet Jesu Kristo.

12
Noto anyun achobege kotugul abwatwok tuguchuto, agot ngongen choto, ak o lumdotin eng’ imanit ne otinye.

13
Ak abwati ale mie ko ta ami eng’ bori, ang’eetak eng’ kabwatet ne abwatwok;

14
angen ale nyonei kochogu metoetab bortanyu, ko u ye kiga mwawa Kiptaiyandennyo Jesu Kristo.

15
Ee, agiilige si ye tun kaame omuch obwat tuguchu tugul eng’ boroindo age tugul.

16
Amu kima kisub atindonik che kigichobei eng’ ng’omnatet, ye kingemwawok kimnatet ak nyonunetab Kiptaiyandennyo Jesu Kristo, kigi baorinik che kigigeer etunatennyi,

17
amu kitaach teegisto ak torornatet eng’ Jehovah Kwanda, ye kinyonji inendet kutit ne kibunu lilindo ne bo etunatet, kole, Ni ko Werinnyu chamanennyu, ne abaibai mising’ eng’ inendet:

18
ak kigigas kutinito kobunu kipsengwet, ye kigimi koboto inendet eng’ tulwet ne tilil.

19
Ak kitinye ng’olyotab maoinatet ne bo iman inne; ne oyae ne mie ye orib, ko u tait ne ikweng’sei eng’ ole imen, kot koeech, ak kochorji mugulelwekwok taboiyatab karon:

20
ye kaonai ni korok, ole mami maoinatetab sirutik ne iboru chito inegei kaguiyennyi.

21
Amu mami maoinatet ne kigobiit eng’ magetab chi: ago king’alali bik eng’ Jehovah, kondochin Tamirmiriet ne Tilil.


Kalenjin Bukuit Ne Tilil God's word open for all © Bible Society of Kenya, 2020