Beblia

	MBIVILIA ŨVOO MŨSEO NTHIMO 23


Save Notes

1
Wekala nthĩ ũĩsanĩe na mũsumbĩ, sũanĩa mũno ũla wĩ mbee waku nũũ.

2
Ndũkaye mũno, ethĩwa wĩ ĩtomo ya lĩu.

3
Ndũkendeew'e nĩ lĩu wake mũseo, nũndũ nũtonya kwĩthĩwa wĩ lĩu wa ũkũkenga.

4
Ndũkenosye mũno ũtw'ĩke mũthwii, ĩthĩwa na ũĩ wa kwĩsũvĩana na ũndũ ũsu.

5
Kũveny'a na kũsalukya ũthwii ũsu nũthelaa, o mĩtũkĩ nũmeasya nthwau, na kũũlũka welekele matunĩ ta ndiũ.

6
Ndũkaye lĩu wa mũndũ mũtoonu, ndũkendeew'e nĩ lĩu wake mũseo.

7
Nĩkwĩthĩwa ngoonĩ yake ethĩawa aitala thooa wa kĩla ũũya. Aneenaa akakwĩa, “Ya na ũinyw'a,” ĩndĩ ngoo yake ndĩthĩawa vamwe naku.

8
Ũkatavĩka lĩu w'onthe ũla ũĩte, na kũtũnga mũvea kwaku kũyĩthĩwa kwa mana.

9
Ndũkatavye ndia ũndũ, nũndũ ĩkavũthya ũĩ wa ndeto syaku.

10
Ndũkakũĩĩsye ĩkonge ya mũvaka wa tene, o na ndũkalike ithekanĩ sya syana ndiwa,

11
nũndũ mwovosya woo e vinya na akamatetea.

12
Tũmĩa kĩlĩko kyaku kũatĩĩa momanyĩsyo, na ũitũmĩa matũ maku kwĩthukĩĩsya ndeto sya ũmanyi.

13
Ndũkaeke kũkany'a kana; wakakũna na mũnzyũ kaikw'a.

14
Wakakũna na mũnzyũ, ũkatangĩĩa thayũ wako ndũkalike vala maveva ma ala akw'ũ mekalaa.

15
Mwana wakwa, weethĩwa na ngoo yĩna ũĩ, ngoo yakwa o nayo ĩkatana.

16
Thayũ wakwa ũkatana, yĩla wĩneena ndeto sya w'o.

17
Ngoo yaku ndĩkew'ĩe eki ma naĩ kĩwĩu, ĩndĩ mũkĩae Mwĩai Ngai kĩla ĩvinda.

18
Kwa w'o ve wĩkwatyo ĩvindanĩ yũkĩte, na wĩkwatyo waku ndũkethĩwa wĩ wa mana.

19
Mwana wakwa, ĩthukĩĩsye na ĩthĩwa na ũĩ, na ũyĩkalya ngoo yaku nzĩanĩ ya w'o.

20
Ndũkekwatany'e na athengi, kana ala maĩsaa nyama na ĩtomo,

21
nũndũ mũnywi na mũyi matw'ĩkaa ngya, na kwombosya kũtumaa mũndũ ekĩa matani.

22
Ĩthukĩĩsye ĩthe waku ũla wakũsyaie, na ndũkavũthye inyia waku akũa.

23
Thooa ũw'o na ndũkaaũthoosye, thooa ũĩ, ũmanyĩsyo na ũmanyi.

24
Ĩthe wa mwana mũlũngalu nũtanaa mũno, ũla ũsyaa kana koĩ nũtanaw'a nĩko.

25
Ĩthe waku na inyia waku mew'e mũyo, na inyia waku ũla wakũsyaie nĩatane.

26
Mwana wakwa, mbĩthukĩĩsye nesa, na ũiatĩĩa mũendele wa thayũ wakwa.

27
Nũndũ ĩlwaya nĩ ta ĩima ĩliku, na kĩveti kĩte kyaku nĩ ta kĩthima kĩtheke.

28
Kyoveeasya mũndũ ta kĩng'ei, na kũtuma aũme aingĩ methĩwa mate aĩkĩĩku.

29
Nũũ wĩ na kyeva? Nũũ wĩ na kĩmako? Nũũ wĩ na ngananĩo? Nũũ wĩ na mũnyungunyĩsyo? Nũũ wĩ na kũndũ kũũmĩu vate kĩtumi? Nũũ wĩ na metho matune?

30
Nĩ ala manyusaa mũno, ala maendaa kũnyw'a mĩthemba mingĩ ya ũkĩ.

31
Ndũkew'ĩe ndivai ĩtomo nũndũ wa ũtune wayo, yĩla ĩkũtisatisa yĩ kĩkombenĩ, yĩla ĩkũmeleka nesa!

32
Mũminũkĩlyonĩ yĩsaa kũũmana ta nzoka, na kũtonyana ta kĩmbuva.

33
Metho maku makoona syĩndũ ngeni, na ngoo yaku ĩkaneena maũndũ ma ngũlũ.

34
Ĩĩ, ũkeethĩwa ũilyĩ ta mũndũ ũla ũkomaa ũkanganĩ katĩ, kana ta mũndũ ũla ũkomaa mũthyanĩ wa mũtĩ wa kũtwaa meli.

35
Ũkaneena wasye atĩĩ, “Nĩmangũnie ĩndĩ ndyaaũmĩa; nĩmangũnie ĩndĩ ndyaaĩw'a ũndũ. Ngaamũka ĩndĩĩ nĩ kana nĩmanthe ũkĩ ĩngĩ?”


Kamba Bible 2011 BIBLE SOCIETY OF KENYA © 2011