Beblia

	MBIVILIA ŨVOO MŨSEO ESEKIELI 13


Save Notes

1
Mwĩai Ngai nĩwaneenie nakwa ambĩa atĩĩ,

2
“Mwana wa mũndũ, athanĩa athani ma Ĩsilaeli ũthũku; athanĩa ala mathanaa maiatĩĩa mosũanĩo moo ũmee atĩĩ: ‘Ĩthukĩĩsyei ũndũ Mwĩai Ngai ũkwasya!’

3
Ũũ nĩ w'o Mwĩai Ngai Mũsumbĩ ũkwasya, ‘Kyeva nĩ kwenyu inyw'ĩ athani atumanu, ala mũatĩĩaa veva wenyu na vai woni mwonete!’

4
We Ĩsilaeli, athani maku methĩĩtwe ta mbĩwa syĩ kũndũ kũombokangu.

5
Mayaathi kũsunga kũla kwĩ myanya, o na mayaatũngĩĩa ũkũta wa kũsiĩĩa andũ ma Ĩsilaeli, nĩ kana wĩthĩe nĩmatonya kwĩyũkitĩa mũthenyanĩ wa Mwĩai Ngai.

6
Nĩmaneenete ũvũngũ na makathana ũkengani. Maneenaa makasya, ‘Mwĩai Ngai easya,’ o yĩla nyie Mwĩai Ngai ndamatũmĩte, na ũu wĩ o vo, mayĩkwatya nyie Mwĩai Ngai nĩanĩsye wathani woo.

7
Inyw'ĩ nũndũ mũteũmanya kana mwonete mawoni ma ũvũngũ, na mwĩathana ũkengani mavinda onthe yĩla mũkwasya, ‘Mwĩai Ngai easya,’ o na kau ndyĩthĩawa nĩneenete nenyu?”

8
Yu ĩndĩ Mwĩai Ngai Mũsumbĩ easya atĩĩ, “Nĩkwĩthĩwa nĩmũneenete ũvũngũ na kwona mawoni ma ũkengani, manyai kana nyie nĩ na ũndũ nenyu. Nĩasya ũu nyie Mwĩai Ngai Mũsumbĩ.

9
Ngasilĩla athani ala monaa mawoni ma ũvũngũ na kwathana ũkengani; maikekala nzamanĩ ya andũ makwa, o na maikaandĩkwa ũtalonĩ wa andũ ma Ĩsilaeli, na o na maikalika nthĩ ya Ĩsilaeli. Mũkamanya kana ninyie Mwĩai Ngai Mũsumbĩ.

10
Nĩkwĩthĩwa nĩmaĩtye andũ makwa makamea, ‘Kwĩ mũuo,’ yĩla kũte mũuo, na nĩkwĩthĩwa yĩla andũ maaka ũkũta ũte mũlũmu, athani asu nĩmaũvakaa sokaa.

11
Tavya andũ asu mavakaa ũkũta sokaa ũmee kana ũkũta ũsu ũkavalũka! Kũkaua mbua nene yĩ na mavia manene na yĩ na kĩseve kĩ vinya.

12
Yĩla ũkũta ũsu wĩvalũka, inyw'ĩ mũkakũlw'a atĩĩ, ‘Ũĩva yu sokaa ũla mũnavakĩte?’

13
Kwoou ũũ nĩ w'o Mwĩai Ngai Mũsumbĩ ũkwasya: Ũthatunĩ wakwa ngaete kĩuutani kĩ vinya, na mbua nene yĩ na mavia manene ĩwanange.

14
Ngaomboa ũkũta ũsu mũvake sokaa; ngakũvalũkya nthĩ wĩthĩe wambĩlĩĩlyo waw'o watiwa ũtheinĩ. Yĩla ũkũta ũsu wĩvalũka ũkamũmina, na mũkamanya kana ninyie Mwĩai Ngai.

15
Ũu nĩ w'o nĩthatĩa ũkũta ũsu vamwe na ala maũvakie sokaa, na nganeena nenyu nĩmwĩe atĩĩ, ‘Ũkũta ndwĩ vo, o na ala maũvakie sokaa mai vo:

16
Athani ma Ĩsilaeli ala mathanĩaa Yelũsalemu ũseo, na kũmyonea mawoni ma mũuo, o yĩla kũtaĩ mũuo. Nĩasya ũu nyie Mwĩai Ngai Mũsumbĩ.’

17
“Naku we mwana wa mũndũ, thyũũa ũthyũ waku ũwelekelye aka ma mbaĩ yaku, ala mathanaa kũatĩĩa mosũanĩo moo. Mathanĩe ũthũku

18
ũmee atĩĩ, ‘Ũũ nĩ w'o Mwĩai Ngai Mũsumbĩ ũkwasya: Kyeva nĩ kwenyu inyw'ĩ aka ala mũtumĩaa andũ ithitũ sya kwĩkĩa moko, na kũtumĩa andũ onthe, anene na anini, itambaa sya kwova mĩtwe, nĩ kana mũsyĩme mathayũ moo! Mwĩona ta mwĩkwatya mathayũ ma andũ makwa na mũteo, nenyu mũyĩkalya mathayũ menyu ũsũvĩonĩ?

19
Nĩmũtumĩte nĩvũthw'a nĩ andũ makwa mũimantha kũkwata kakundi ka nganũ ĩla yĩtawa mbaale na tũlungu twa mũkate. Nĩmũaĩte andũ ala mataĩlĩte kũawa, na mũkaeka thayũ andũ ala mataĩlĩte kwĩkala thayũ, kwa kũkenga andũ makwa, ala metĩkĩlaa ndeto sya ũvũngũ.

20
“ ‘Kwondũ wa ũu, ũũ nĩ w'o Mwĩai Ngai Mũsumbĩ ũkwasya: Nĩna ũndũ na ithitũ syenyu ila mũtũmĩaa kũsyĩma mathayũ ma andũ, na ngaitila syume mokonĩ menyu, na ngĩthasya mathayũ ma andũ ala mũsyĩmaa ta nyũnyi.

21
O na itambaa syenyu sya kwĩyova mũtwe ngaitembũanga na kũvonokya andũ makwa kuma ũtonyinĩ wenyu, na maieka kwĩthĩwa nzyĩma yĩ ũtonyinĩ wenyu, na mũkamanya kana ninyie Mwĩai Ngai.

22
Nĩkwĩthĩwa nĩmũtũmĩĩte ũvũngũ kwĩw'ĩthya woo andũ ala alũngalu, o na vala nyie ndyaamew'ĩthya woo, na nĩmũthangaaĩtye ala athũku maendee kwĩka ũthũku, vandũ va kũekana naw'o, maũtie na maitangĩĩa mathayũ moo.

23
Mũisyoka kwona ĩngĩ mawoni ma ũvũngũ o na mũisyoka kwathana. Ngavonokya andũ makwa kuma ũtonyinĩ wenyu. Nĩvo ĩndĩ mwĩmanya kana ninyie Mwĩai Ngai.’ ”


Kamba Bible 2011 BIBLE SOCIETY OF KENYA © 2011