Beblia

	MBIVILIA ŨVOO MŨSEO OSEA 2


Save Notes

1
Ĩtai ana-a-inyia menyu, “Andũ makwa,” na eĩtu-a-inyia menyu, “Ala meewĩiwe tei.”

2
Ĩsũvei inyia wenyu, mwĩsũvei; nũndũ o na ti kĩveti kyakwa, o na ndi mũũme wake. Mwĩsũvei avete ũmalwaya ũthyũnĩ wake, na kũveta ũlaalai wake nondonĩ syake.

3
Alea nĩngũmumya ngũa, na ngĩmũtia e mũthei ũndũ wasyaiwe ailyĩ. Nĩngũmũtw'ĩkĩthya ta weũ, na kũmũtw'a nthĩ nyũmũ, na ngĩmũaa na waũni.

4
Ndikew'ĩa syana syake tei, nũndũ nĩ syana sya ũmalwaya.

5
Nyinyia woo nũtw'ĩkĩte ĩlwaya; ũla wamaitavie ekĩte maũndũ me nthoni. Nũndũ nĩwaneenie asya atĩĩ, “Nĩatĩĩa endwa makwa ala manengae lĩu wakwa na kĩw'ũ kyakwa, w'ĩa wakwa wa malondu na ndii nzeo ndũmu, mauta makwa na kya ũnyw'a kyakwa.”

6
Kwoou ngamwiĩĩa na wiio wa mĩw'a, na kwaka ũkũta nĩmũsiĩĩe wĩthĩe vai vandũ wona kasĩla wĩsĩla.

7
Akasembany'a endwa make, ĩndĩ ndakamakwata; akamamantha, ĩndĩ ndakamona. Nĩvo ĩndĩ wĩneena asye atĩĩ, “Nĩngũsyokea mũũme wakwa wa mbee, nũndũ yĩla naĩ nake nĩw'o naĩ kavaa mbee wa yu.”

8
Ndeesĩ kana ninyie namũnengie ngetha ya mbaa mbeke, ndivai, mauta, na kũmwingĩvĩsya thaavu na silĩva ũla watũmĩaa kũthaitha Mbaali.

9
Kwoou ngoosa ngetha yakwa ya mbaa mbeke ĩvinda ya yo, na ndivai yakwa ĩvindanĩ ya yo; ngoosa w'ĩa wakwa wa malondu na ndii nzeo ndũmu, ila syamũvw'ĩkaa ndakekale e mũthei.

10
Yu nĩngũmumya ngũa atiwe e mũthei e mbee wa endwa make, na vai mũndũ wĩmũvonokya kuma vala nĩĩ.

11
Ngaũngamya mboka syake syonthe: Mboka syake sya kĩla mwaka, Mboka syake sya Kũtisa kwa Mwei, Mboka syake sya Savato, na mboka syake syonthe ila itw'ĩtwe.

12
Ngaananga mĩsavivũ yake na mĩkũyũ yake, ĩla waneenaa akasya atĩĩ, “Yĩĩ nĩyo ĩtuvi yakwa yĩla endwa makwa manengete.” Ngatw'ĩkĩthya mĩsavivũ yake na mĩkũyũ yake kĩtheka, na nyamũ sya kĩthekanĩ ikamĩya.

13
Ngamũkany'a nũndũ wa mĩthenya ĩla wavĩvĩisye ngai sya Mbaali ũvani, na kwĩyanakavya na mbete yake na mawanake, na aatĩĩa endwa make oolwa ninyie. Nĩasya ũu nyie Mwĩai Ngai.

14
Kwoou ngamũkusya na ndeto sya kwendeesya, na ngĩmũtwaa weũnĩ, na kũneena nake na ũuu.

15
Ĩtina wa ũu ngamũtũngĩa mĩũnda yake ya mĩsavivũ, na kũtw'ĩkĩthya Mwanda wa Mathĩna mũvĩa wa wĩkwatyo. Akambĩtĩka ũndũ weekaa yĩla waĩ wa mũika, ta ĩvindanĩ yĩla waumie nthĩ ya Misili.

16
Nyie Mwĩai Ngai nĩasya atĩĩ, “Mũthenya ũsu ũkambĩta, ‘Mũũme wakwa,’ na ndũkambĩta ĩngĩ, ‘Mbaali wakwa.’

17
Nũndũ ndiketĩkĩla ũwete masyĩtwa ma ngai sya Mbaali ĩngĩ, na masyĩtwa masyo maikawetwa ĩngĩ.

18
Mũthenya ũsu ngaseũvya ũtianĩo na nyamũ sya kĩthekanĩ, nyũnyi, na tũsamũ tw'onthe tũla twĩ ĩũlũ wa nthĩ nĩ kana iikaũmĩsye andũ makwa. O ta ũu ngavetanga mĩio ya kaũ kuma nthĩ: Mbyũ syonthe na mbũta na ngatuma andũ makwa mekala na mũuo.

19
Ngakwĩvaasya ũtw'ĩke mũka wakwa tene na tene. Ũtw'ĩke wakwa kwa ũlũngalu, ũsili wa katĩ, kwa wendo ũtaolekaa na tei.

20
Ngakwĩvaasya ũtw'ĩke mũka wakwa kwa ũĩkĩĩku, na ũkamanya ninyie Mwĩai Ngai.

21
“Nyie Mwĩai Ngai nĩasya, mũthenya ũsu ngeetĩkĩla vata wa matu wa kwenda kua, namo matu makeetĩkĩla vata wa nthĩ.

22
Nthĩ ĩkeetĩkĩla vata wa ngetha ya mbaa mbeke, ndivai na mauta, nasyo ikeanĩsya vata wa Yesileeli.

23
Ngavanda Ĩsilaeli ĩũlũ wa nthĩ na ngeew'ĩa tei, ‘Ũla Ũtaaĩw'ĩwa tei,’ na ngeea ala neetie, ‘Ti andũ Makwa,’ ‘Mwĩ andũ makwa,’ namo makasya, ‘We wĩ Ngai waitũ.’ ”


Kamba Bible 2011 BIBLE SOCIETY OF KENYA © 2011