Beblia

	MBIVILIA ŨVOO MŨSEO AEVESO 1


Save Notes

1
Kuma vala nĩĩ nyie Vaũlo mũtũmwa wa Klĩsto Yesũ kumana na kwenda kwa Ngai, Valũa ũũ nĩ kwenyu inyw'ĩ aĩkĩĩi ala mwĩ Eveso, ala mwĩ ma kwĩkwatw'a nthĩnĩ wa Klĩsto Yesũ.

2
Mumo na mũuo nĩsyĩthĩwe nenyu kuma kwa Ngai Asa waitũ, na kwa Mwĩai waitũ Yesũ Klĩsto.

3
Nakathwe Ngai, Ĩthe wa Mwĩai waitũ Yesũ Klĩsto, nĩkwĩthĩwa nthĩnĩ wa Klĩsto nũtũathimĩte na moathimo onthe ma kĩ-veva ĩtunĩ.

4
Nĩwatũnyuvie nthĩnĩ wa Klĩsto o na nthĩ ĩtanombwa, twĩthĩwe atheu na tũtaweteka ũndũ ũthũku methonĩ make. Nũndũ wa wendo wake,

5
Ngai nĩwatũnyuvie kuma tene twĩthĩwe syana syake kwĩsĩla kwa Yesũ Klĩsto, kwĩanana na mũvango wake na kwenda kwake.

6
Nĩtũmũkathe Ngai kwondũ wa mumo wake mũnene, ũla ũtũnengete nthĩnĩ wa mwana wake mwendwa.

7
Nĩkwĩthĩwa kwondũ wa kĩkw'ũ kya Klĩsto nĩtwoovoiw'e, na twaekewa mavĩtyo maitũ kwĩanana na wingĩ wa mumo wa Ngai,

8
ũla ũtũnengete vate kĩthimo. Nthĩnĩ wa ũĩ na ũmanyi wake w'onthe,

9
Ngai nĩweanĩisye kwenda kwake, na atũmanyĩthya kĩmbithĩ kya mũvango wake, ũla watw'ĩte kwĩanĩsya kwĩsĩla kwa Klĩsto.

10
Mũvango ũsu Ngai wĩĩanĩsya ĩvinda yavika nĩ wa kũtũngĩanĩa syĩndũ syonthe vamwe, syĩndũ ila syĩ ĩtunĩ na ila syĩ kũũ nthĩ, na Klĩsto ayĩthĩwa mũtongoi wasyo.

11
Nthĩnĩ wa Klĩsto, Ngai nĩwatwie twĩthĩwe make, nĩkwĩthĩwa nĩwatũnyuvie kuma tene kwĩanana na kwenda kwake, we ũla wĩkaa maũndũ onthe kwĩanana na kĩla ũtw'ĩte kwendanĩ kwake.

12
Ithyĩ ala twaĩ ma mbee kwĩthĩwa na wĩkwatyo nthĩnĩ wa Klĩsto, nĩtwĩthĩwe tũikatha ũkumyo wake.

13
Inyw'ĩ o nenyu nĩmwatw'ĩkie aĩkĩĩi yĩla mweewie ũtũmani wa ũla w'o, naw'o nĩ Ũvoo Mũseo ũla ũtumĩte mũtangĩĩwa. Nĩmwamũĩkĩĩie Klĩsto, nake Ngai amwĩkĩa ũvano kwa kũmũnenga Veva Mũtheu ũla wathaniwe.

14
Veva Mũtheu nĩwe ũĩkĩĩthyo wa kana tũkakwata kĩla Ngai wathĩte aĩkĩĩi, kana we akanenga ala make ũthasyo mwĩanĩu. Nĩtũkathei ũkumyo wake.

15
Kwondũ wa ũu, kuma yĩla neewie ĩũlũ wa mũĩkĩĩo wenyu nthĩnĩ wa Mwĩai Yesũ, na wendo ũla mwĩ na w'o kwa aĩkĩĩi onthe,

16
ndyaaeka kũtũngĩa Ngai mũvea kwondũ wenyu. Nĩnĩmũvoyeaa,

17
na kũmũkũlya Ngai wa Mwĩai waitũ Yesũ Klĩsto, Asa wa ũkumyo, amũnenge veva wa ũĩ na wa kũmũmanya Ngai.

18
Nĩvoyaa mwĩthĩwe na kĩlĩko kĩkũelewa, nĩ kana mũtonye kũelewa nĩ ũndũ wĩkwatyo ũla ũtũnengete ũilyĩ, na ũndũ moathimo make ma kũseng'ya ala wathĩte aĩkĩĩi me na ũthwii mwingĩ,

19
na ũndũ ũtonyi wake ũla ũtethasya wĩa nthĩnĩ waitũ ithyĩ ala tũĩkĩĩaa ũnenevete. Ũtonyi ũsu ũtethasya wĩa nthĩnĩ waitũ, no ũndũ ũmwe na vinya mũnene,

20
ũla watũmĩie yĩla wamũthayũũkisye Klĩsto kuma kwa akw'ũ, na kũmwĩkalya ngalĩko ya kw'oko kwake kwa aũme ĩtunĩ.

21
Klĩsto e kũu nũsumbĩkĩte monene onthe ma yayaya, mokũmũ, motonyi na asumbĩ; e ĩũlũ wa anene onthe ma nthĩ ĩno na ĩla yũkĩte.

22
Ngai nĩwaiie syĩndũ syonthe ungu wa ũkũmũ wa Klĩsto, na amũnengane kwa ĩkanisa ethĩwe Mwĩai wa syĩndũ syonthe.

23
Ĩkanisa nĩ mwĩĩ wa Klĩsto ũla nĩ mwĩanĩu, na ũtumaa syĩndũ syonthe kĩla vandũ syĩthĩwa na wĩanĩu.


Kamba Bible 2011 BIBLE SOCIETY OF KENYA © 2011